މާލެ ސަރަހައްދުގައި 24 ގަޑިއިރު ބަހުގެ ޚިދުމަތް ދޭން ފަށައިފިއެވެ.

އެމްޓީސީސީން މާލެ ސަރަހައްދުގައި 24 ގަޑިއިރު ބަހުގެ ޚިދުމަތް ދޭން ފަށާފައިވަނީ 31 އޮގަސްޓުން ފެށިގެންނެވެ. އެގޮތުން މާލެ އާއި ހުޅުމާލެ ގުޅުވައިދޭ ވެސްޓް ޕާކު ރޫޓްތަކުގެ ދަތުރުތައް 24 ގަޑިއިރު ވަނީ ދޭން ފަށާފައެވެ. އެގޮތުން ކޮންމެ ދުވަހަކުވެސް ދަންވަރު 00:00 އަދި 00:15 ގައި އޮންނަ ދަތުރަށް ފަހު ފަތިހު 05:15 ވަންދެން ކޮންމެ އެއް ގަޑިއިރަކުން ބަސް ދަތުރެއް އޮންނާނެއެވެ. އަދި ފަތިހު 05:45 ގައި ވެސް ބަސް ދަތުރު ކުރާނެއެވެ. މީގެ ކުރިން ރޭގަނޑުގެ ފަހު ދަތުރު ކުރަނީ 00:15 ގައެވެ.

ރާއްޖެޓީވީން ގެނެސްދޭ "އުފާވެރި އަމާން ރާއްޖެ މެނިފެސްޓޯ" ޕްރޮގްރާމްގައި ވާހަކަފުޅުދައްކަވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ ބަސް ދަތުރުތައް 24 ގަޑިއިރަށް ބަދަލުކުރީ މާލެ އާއި ހުޅުމާލޭގައި ދަންވަރު ގަޑީގައި ދަތުރުކުރާ ފަރާތްތަކަށް ކުޑަ އަގެއްގައި ދަތުރުކުރެވޭނެ މަގު ފަހިކުރުމުގެ ގޮތުންކަމަށެވެ. އެގޮތުން ދަންވަރު ޑިޔުޓީތަކަށް ދާ ފަރާތްތަކަށް މިކަމުގެ ސަބަބުން ފަސޭހަތަކެއް ލިބިގެންދާނެކަމަށާއި ފުރަތަމަ ރޭވެސް 27 ފަރާތަކުން އެގަޑީގައި ބަހުގައި ދަތުރުކޮށްފައިވާކަމަށް އާޒިމް ވިދާޅުވިއެވެ.

އެމްޓީސީސީން އަންނަނީ ހުޅުމާލެއިން މާލެއަށް ދުވާލު ކޮންމެ 15 މިނެޓަކުން ބަސް ދަތުރު ކުރުމުންނެވެ. އަދި ބަހުގެ ޚިދުމަތަށް ރައްޔިތުން ބޭނުންވާގޮތަށް އަންނަނީ ބަދަލުތައް ގެންނަމުންނެވެ.