ބިންވެރިޔާ ސްކީމްގެ ދަށުން ގޯތި ލިބޭ ފަރާތަކީ ބަންޑާރަ ގޯއްޗެއް އޮތް ފަރާތެއްނަމަ އެ ގޯތި ދޫކޮށްލުމަށް ކުރިން އޮތް މުއްދަތައް ސަރުކާރުން ބަދަލު ގެނެސްފިއެވެ.
މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ، ގޯތި ލިބޭ ފަރާތަކީ ބަންޑާރަ ގޯއްޗެއް އޮތް ފަރާތެއްނަމަ އެ ގޯތި ދޫކޮށްލުމަށް ކުރިން އޮތް މުއްދަތައް ސަރުކާރުން ބަދަލު ގެނެސްފައިވާ ކަމަށެވެ. އަދި މިހާރު ހަމަޖައްސާފައިވަނީ ސޮއިކުރާ ތާރީޚުން ފެށިގެން 5 (ފަހެއް) އަހަރު ތެރޭގައި ކުރިން ލިބިފައިވާ ގޯތި ދޫކޮށްލުމަށެވެ.
އަކްރަމް ވިދާޅުވީ، އެއްބަސްވުމަށް ބަދަލު ގެނެސް އައު އެއްބަސްވުން ޕޯޓަލް މެދުވެރިކޮށް ގޯތި ލިބޭ ފަރާތްތަކަށް ފެންނާނެ ކަމަށެވެ.
ބަންޑާރަ ގޯތި ދޫކުރުމުގެ އެއްބަސްވުމުގައި ބުނެފައިވަނީ މާލެ ސަރަހައްދު (މާލެ، ހުޅުމާލެ، ވިލިނގިލި)ގައި، ގޯތި ލިބޭ ފަރާތުގެ އަމިއްލަ ނަމުގައި 600 (ހަސަތޭކަ) އަކަފޫޓަށްވުރެ ކުޑަ ބަންޑާރަ ގޯއްޗެއް ރަޖިސްޓަރީކޮށްފައި ވާނަމަ، އެ ގޯއްޗެއް ރަޖިސްޓަރީ ކުރެވިފައިވާ އެއްމެދު މިލްކުވެރިންނަށް ބަދަލަކާނުލައި ދޫކޮށްލުމަށް ގޯތި ލިބޭ ފަރާތުން އެއްބަސްވާ ކަމަށެވެ. އަދި މި ގޯތީގެ އިތުރު އެއްމެދު މިލްކުވެރިއެއް ނެތްނަމަ ދައުލަތަށް ދޫކޮށްލުމަށް ގޯތި ލިބޭ ފަރާތުން އެއްބަސްވާ ކަަމަށެވެ.
މާލޭ ސަރަހައްދުން ބަންޑާރަ ގޯއްޗަކުން ބަހައިގެން ގޯތި ލިބޭ ފަރާތަށް ވާރުތައިން ލިބެން އޮންނަ ބައި މި ގޯތީގެ ބާކީ ތިބި ވާރިސުންނަށް ބަދަލަކާނުލައި ދޫކޮށްލުމަށް ގޯތި ލިބޭ ފަރާތުން އެއްބަސްވާ ކަމަށާއި، މި ގޯތީގެ އިތުރު ވާރިސެއް ނެތް ހާލަތުގައި އެ ބައެއް ދައުލަތަށް ދޫކޮށްލުމަށް ގޯތި ލިބޭ ފަރާތުން އެއްބަސްވާ ކަމަށެވެ.
ގޯތި ލިބޭ ފަރާތަކީ މިއެއްބަސްވުމުގެ 2 ވަނަ މާއްދާގައި ބަޔާންކޮށްފައިވާ ބަންޑާރަ ގޯއްޗެއް އޮތް ފަރާތެއްނަމަ، އެ ގޯތި ދޫކޮށްލުމުގެ ގޮތުން މި އެއްބަސްވުމުގައި ސޮއިކުރާ ތާރީޚުން ފެށިގެން 5 އަހަރު ތެރޭގައި، ޝަރުއީ މަރުހަލާ ފުރިހަމަކޮށް، ދޫކޮށްލި ގޯތީގެ ރަޖިސްޓަރީން ގޯތި ލިބޭ ފަރާތުގެ ނަން އުނިކޮށް، އެކަން ގޯތި ދޫކުރާ ފަރާތަށް އެންގުމަށް ގޯތި ލިބޭ ފަރާތުން އެއްބަސްވާ ކަމަށްވެސް ބަންޑާރަ ގޯތި ދޫކުރުމުގެ އެއްބަސްވުމުގައި ބުނެފައިވެއެވެ.
މީގެ އިތުރުން މި އެއްބަސްވުމުގެ 3 ވަނަ މާއްދާގައި ބަޔާންކޮށްފައިވާ ގޮތުގެ މަތިން ގޯތި ދޫކޮށްލުމުގެ ގޮތުން، ގޯތި ލިބޭ ފަރާތަށް ވާރުތައިން ލިބެން އޮތް ގޯތީގެ މިލްކުވެރި ފަރާތް ނިޔައުވާތާ 90 (ނުވަދިހަ) ދުވަހުގެ ތެރޭގައި ނިޔާވި މީހާގެ ގޯތިން، ގޯތި ލިބޭ ފަރާތަށް ލިބެން އޮންނަ ބައި ދޫކޮށްލުމަށް ކަމާބެހޭ ކޯޓަށް ހުށަހަޅައި އެކަން ގޯތި ދޫކުރާ ފަރާތައް އަންގަންޖެހޭ ކަމަށެވެ. އަދި ޝަރުއީ މަރުހަލާ ނިމޭތާ 30 (ތިރީސް) ދުވަހުގެ ތެރޭގައި އެކަން ގޯތި ދޫކުރާ ފަރާތައް އަންގަންޖެހޭ ކަމަށް އެއްބަސްވުމުގައި ބުނެފައިވެއެވެ.
މިއެއްބަސްވުމުގެ 4 ވަނަ މާއްދާ އަދި 5 ވަނަ މާއްދާގައިވާ ގޮތުގެ މަތިން ގޯތި ލިބޭ ފަރާތުން އަމަލު ނުކޮށްފިނަމަ މިއެއްބަސްވުމުގެ ދަށުން ދޫކުރާ ގޯތި އެއްވެސް ބަދަލެއް ދިނުމަކާނުލައި ގޯތި ދޫކުރާ ފަރާތަށް އަނބުރާ ނެގޭނެއެވެ.
