ކުރީގެ ވެރިން ބަދަލުކުރުމަށް ރައްޔިތުން ނުކުތީ ހެޔޮ ވެރިކަމެއް ނުކުރެވޭތީ: ރައީސް

ކުރިން ވެރިކަން ކުރެއްވި ބޭފުޅުންގެ ވެރިކަން ބަދަލު ކުރުމަށް ރައްޔިތުން އެއް އަޑެއްގައި ނުކުތީ އެ ބޭފުޅުންނަށް ހެޔޮ ވެރިކަމެއް ނުކުރެވޭތީ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެއެވެ.

"އުފާވެރި އަމާން ރާއްޖެ" ކެމްޕޭނަށް ރ. ކިނޮޅަހަށް ވަޑައިގެން އެ ރަށުގައި ބޭއްވި ބައްދަލުވުމުގައި ރައީސް ވިދާޅުވީ ކޮންމެ މީހަކުވެސް ވެރިކަމަށް އަންނަނީ ރައްޔިތުންނަށް ކޮށްދޭން ގިނަ ވައުދުތަކަކާއެކުގައި ކަމަށެވެ. އެގޮތުން، ވެރިކަމެއްގައި ހުންނަން ޖެހޭ އެންމެ މުހިންމު ސިފަޔަކީ "ހެޔޮ ވެރިކަމެއް" ގެ ސިފަ ކަމަށާއި އެމްޑީޕީން 2008 ވަނަ އަހަރުން ފެށިގެން ކޮންމެ އަހަރަކު ވެސް މި ސިޔާސަތު މެނިފެސްޓޯގައި ހިމަނަނީ އެ ސަބަބާހުރެ ކަމަށް ވިދާޅުވިއެވެ.

Advertisement

ރައީސް ވިދާޅުވީ ހެޔޮވެރިކަމެއް ކުރެވޭނީ ތިމާއަށް ފެންނަ ގޮތަކީ އެއީ ހަމައެކަނި ގޮތްކަމުގައި ނުބަލައި ރައްޔިތުންގެ އަޑު އަހައިގެންކަމަށެވެ. އަދި ރައޔްިތުންގެ މުހުތާދުތައް ދެނެގަނެ، ރައްޔިތުން ބޭނުންވާ ގޮތަށް ވެރިކަން ކުރުމަކީ ހެޔޮ ވެރިކަމެއްގެ ސިފަތައް ކަމަށް ވެސް އެމަނިކުފާނު ވިދާޅުވިއެވެ.

މީގެ ކުރިން ވެރިކަމެއް ނިމި އިންތިޚާބެއް އަންނައިރު ހުރިހާރައްޔިތުން ތިބެނީ އެއް އަޑަކުން ވެރިކަން ބަދަލު ކުރުމަށް ނުކުމެކަން ފާހަގަކުރައްވައި ރައީސް ވިދާޅުވީ އެކަން އެގޮތަށް ވަނީ ރައްޔިތުން ބޭނުންވާ ހެޔޮ ވެރިކަން ނުކުރެވޭތީ ކަމަށެވެ.

ރައީސް ވިދާޅުވީ މި ސަރުކާރުން ކުރިއަށް އޮތްތަނާގައި ވާ ވައުދުތައްވެސް ފުއްދަމުންދާނެކަމުގެ ޔަގީންކަން މިއަދު ރައްޔިތުންނަށް އެބައޮތް ކަމަށެވެ. އެގޮތުން، ހެޔޮ ވެރިކަމެއްގެ ތެރެއިން ލާމަރުކަޒުކޮށް ބާރުތައް ދޫކޮށްލައި ރައްޔިތުންނާ ވީހާ ގާތުން މަސައްކަތް ކުރުމުގެ ފުރުސަތު ލިބިފައި އޮތުން މުހިންމު ކަމަށާއި ބާރުތަށް ދޫކޮށްލުމުން ބައެއް ފަރާތްތަކަށް ދަތިވިޔަސް އެއީ އެކަން ކުރަން އެންމެ ރަނގަޅުގޮތް ކަން އެމަނިކުފާނު ފާހަގަކުރެއްވިއެވެ. އަދި ކަންކަން ނިމިގެންދާއިރު މިންތީގެ ހަމަހަމަކަން ހޯދައި ދެ ޖިންސުގެ ބަސް ހިމަނަން ޖެހޭކަމަށާއި އަންނަ ދައުރެއްގައި އެކަންކަން އިތުރަށް ފެނިގެންދާނެކަމަށް ވެސް ރައީސް ވިދާޅުވިއެވެ.

ރައީސް ވަނީ ދެވަނަ ދައުރެއްގައި ކިނޮޅަހަށް ކޮށްދެއްވާނެ ކަންކަމުގެ މައްޗަށް ވެސް އަލިއަޅުއްވާލައްވާފައެވެ. އެގޮތުން، އެ ރަށަކީ ރަށު ފަތުރުވެރިކަމަށް ފައްކާވެފައިވާ ރަށެއް ކަމަށާއި އެ ކަމަށް ޝައުގުވެރިވާ ފަރާތްތަކަށް ލުއި ލޯނު ލިބޭނެ އިންތިޒާމު ހަމަޖެހިގެންދާނެކަން އެމަނިކުފާނު ފާހަގަކުރެއްވިއެވެ. އަދި ރަށުގެ ބޮޑެތި މަގުތައް ޒަމާނީ ފެންވަރަށް ތަރައްގީކޮށް ކައުންސިލަށާއި ސްކޫލާއި ހެލްތު ސެންޓަރަށް ބޭނުންވާ ޖާގައިގެ ދަތިތަކަން ހައްލު ކުރުމަށް ކައުންސިލް އައު އިމާރާތަކާއި ސްކޫލުގެ މަލްޓިޕާޕަސް ހޯލާއި ހެލްތު ސެންޓަރގެ އެކްސްޓެންޝަން މަސައްކަތް ކުރައްވާނެ ކަމަށް ވިދާޅުވިއެވެ.

މީގެ އިތުރުން ޒުވާނުން ކުޅިވަރު ކުޅުމަށް ބޭނުންވާ ވަސީލަތްތައް ފޯރުކޮށްދިނުމަށް އިންޑޯ ސްޕޯޓްސް ހޯލެއް އަޅާއިދެއްވާނެ ކަމަށާއި ރައްޔިތުންނާ މަޝްވަރާ ކުރައްވައި އިތުރު ކަންކަން ވެސް އެ ރަށަަށް ކޮށްދެއްވާނެ ކަމުގެ ޔަގީންކަން ރައީސް ދެއްވިއެވެ.