ގަސް އިންދުމަކީ ގިނަ ބަޔަކު އެކަމަށް ޝަޢުޤުވެރިވާ ކަމެކެވެ. މީގެ ދެތިން އަހަރު ކުރިން މުޅި ދުނިޔެ ފުރަބަންދުކޮށްލި ކޮވިޑް-19ގެ ބަލިމަޑުކަމުގެ ތެރޭގައި ކިތަންމެ ރަނގަޅަކަށްވެސް އެކަން ހާމަވެގެން ހިނގައްޖެއެވެ. ކަން މިހެން އޮތް ނަމަވެސް، ގަސް އިންދާ ބެލެހެއްޓުމަކީ ކޮންމެކޮންމެ މީހަކަށް ކުރެވޭނެ ކަމެއް ނޫނެވެ. ބައެއް މީހުންނަކީ ކިތަންމެ ބޭނުންވިއަސް، ގަސް އިންދާ، ހެއްދުމުގައި ނާކާމިޔާބު ފިޔަވާ އިތުރު ނަތީޖާއެއް ލިބޭ ބަޔަކަށް ނުވާ އިރު، މާ ލުއިލުއި ގޮތަކަށް އެކަމުގެ ތެރޭގައި އުޅެލައިގެން ބޮޑެތި ޖަންގަލިތައް ހައްދާ، ބަލަހައްޓާ މީހުން އެބަ އުޅެއެވެ.
ލީބިޔާއަށް އުފަން، ޙުސައިން ބިން ސާސީއަކީ މި ދެންނެވި ކަހަލަ މީހެކެވެ. ލީބިޔާގެ އައްސޭރިފަށުގެ ސިޓީއެއް ކަމަށް ވާ އަލް-ޚުމްސްގެ އަލް-މަރްޤަބު ޖަންގަލީގައިވާ ގަސްތައް ބެލެހެއްޓުމުގެ ޒިންމާ ކޮނޑުއަޅައިގެން ހުރި މީހަކީ 65 އަހަރުގެ ޙުސައިންއެވެ. މޫސުމީ ނޭދެވޭ ބަދަލުތަކުގެ ގަދަ އޮއެވަރުގައި ދުނިޔެ ޖެހިފައި އޮތް މި ދަނޑިވަޅުގައި، ޖަންގަލިތަކަށް މީހުން ދޭ ސަމާލުކަންވެސް އޮތީ އިންތިހާއަށް ކުޑަ ވެފައި ކަމުން، ޙުސައިން އުފުލަމުން ދާ ޒިންމާއަކީ ކުޑަ ކަމެކޭވެސް މުޅި އަކުން ނުދެންނެވޭނެއެވެ.
މިދިޔަ އަހަރުތަކަށް ބަލާއިރު އަހަންނަށް ފާހަގަވި ކަމަކީ، ގަސް އިންދާ ވަރާ ބަލާފަ، އެ ގަސްތަކަށް ފެން ދިނުމުގެ މަޝްރުޢޫތަކެއް ކުރިޔަށް ނުގެންދާ ކަން. މިކަމައިގެން ކުރިއަށްދާން އަހަންނަށް ހިތްވަރު ލިބުނީ 2019 ވަނަ އަހަރު. އެއީ، ޖަންގަލިތަކުގައި ގަސް ޖަހަން ހިންގި ކެމްޕޭންތަކަށް ފަހުވެސް، ޖަންގަލިތަކުގައި ގަސްތައް ހެދިފަ ނެތްކަން އެނގުނު ހިސާބުން. އެހާ ހިސާބުން އަހަރެން ނިންމީ، ގަސް އިންދަން ހިންގާ ކެމްޕޭންތަކާއެކީގަ ފޮލޯއަޕް ކެމްޕޭންތައްވެސް ކުރިއަށް ގެންދަން ޖެހޭނެ ކަމަށް.ޙުސައިން ބިން ސާސީ؛ ތިމާވެއްޓަށް ލޯބިކުރާ މީހެއް
ޙުސައިންގެ ޙަޔާތުގެ ބޮޑު ބައި ހޭދަ ކޮށްފައި ވަނީ ތިމާވެށީގެ ޙައްޤުގައި ކުރި އެކި މަސައްކަތްތަކުގައެވެ. ޖަންގަލިތަކުގައި ގަސްގަހާގެގި އާލާ ކުރުމާއި ތިމާވެއްޓާ މެދު މީހުންގެ ހޭލުންތެރިކަން އިތުރު ކުރުމަށް ކެމްޕޭންތައް ހިންގުމުގެ މަސައްކަތުގައެވެ.
މިދިޔަ އަހަރުތަކުގަ ވާރޭ ވެހުނު މިންވަރު މަދުވުމާއި، އާދަޔާ ޚިލާފަށް ހޫނު ގަދަވުމާއި، ޖަންގަލިތަކަށް މީހުން ވެރިވެގަތުމުގެ ޢަމަލުތަކާ ހެދި، ޖަންގަލިތަކުން ގިނަ ޢަދަދެއްގެ ގަސް ވަނީ ނެތި ގޮސްފަ. އެހެންވެ، މި ފާއިތުވެދިޔަ އަހަރުތަކުގަ އަހަރެން ހުންނާނެ ޖަންގަލިތައް އާރާސްތު ކުރުމާ ގުޅޭ ކެމްޕޭންތައް ހިންގާފަވެސް. ﷲ އަށް ޙަމްދު ހުރި. ގަސްތަކަށް ފެން ދިނުމަށް އަހަރެން ކުރި މަސައްކަތުން، ޖަންގަލީގެ ގަސްތަކަށް މިއޮތީ އާ ދިރުމެއް ލިބިފަ.ޙުސައިން ބިން ސާސީ؛ ތިމާވެއްޓަށް ލޯބިކުރާ މީހެއް
އެގޮތުގައި ކިތަންމެ ގިނަ މަސައްކަތްތަކެއް ކުރި ކަމުގައި ވީ ނަމަވެސް، ހަމަ އެކަނި ގަސް އިންދައިގެން ވާ ނެތް ކަން ޙުސައިންއަށް ވިސްނުނެވެ. ގަސްތަކަށް ދިރުން ލިބި، ރަނގަޅު ގޮތުގައި ގަސްތައް ހެދޭނެކަން ކަށަވަރު ކުރުމަށްޓަކައި، އަލް-މަރްޤަބް ޖަންގަލީގެ ގަސްތަކަށް ފެން ދޭން ޙުސައިން ނިންމިއެވެ. އެކަން ކުރަނީ އޭނާ އަމިއްލައަށެވެ. އެތައް މަސައްކަތުން އެތައް ސަތޭކަ ގަހެއް ވަނީ ސަލާމަތް ކުރެވިފައެވެ.
ވަރަށް ބުރަ ކަމެއް މީ. ވަރަށް ބޮޑު ތަކުލީފެއް. ވަރަށް ވަރުބަލިވޭ. އެކަމަކު، ގަހެއް ހެދޭތަން ފެނުނީމަ، ޖަންގައްޔާއި ޖަންގަލިން ބޭރުގަ ހުރި ގަސްތަކަށް ފެންދޭ ހިތް ޖެހޭ ވަކިން ބޮޑަށް... އަހަރަމެންގެ މަސައްކަތުން، ޖަންގަޔަށް މިއޮތީ އާ ދިރުމެއް ގެނެވިފަ. މި މަސައްކަތުން 3000 ނޫނީ 4000 އެއްހާ ގަސް ސަލާމަތްކޮށް، ހެއްދިއްޖެ.ޙުސައިން ބިން ސާސީ؛ ތިމާވެއްޓަށް ލޯބިކުރާ މީހެއް
ތަރައްޤީއާ ބެހޭ އދގެ މަޝްރޫޢު (ޔޫއެންޑީޕީ)ގެ ރެކޯޑްތަކަށް ބަލާއިރު، ލީބިޔާއަކީ މޫސުމީ ނޭދެވޭ ބަދަލުތަކުން ކުރާ އަސަރުގެ ނަޒަރުން ބަލާއިރު އެންމެ ނާޒުކު ފައްތަރުގައި އޮތް ޤައުމުތަކުގެ ތެރެއިން ޤައުމެކެވެ. ދުނިޔެ މޫސުން ކުރިޔަށް ލަފާ ކުރާ ގޮތަށް ބަލާއިރު، ދެންވެސް އޮތީ އާދަޔާ ޚިލާފަށް ހޫނު ގަދަވެގެން ދާނެ ދުވަސްވަރެކެވެ. ވާރޭ ވެހުން މަދުވެ، ކަނޑުގެ ލޮނުގަނޑު އުފުލި، ރައްކާތެރި ފެނުގެ ސަޕްލައިއަށް ނުރައްކާ ކުރިމަތިވުމުގެ ފުރުޞަތު ބޮޑެވެ. އަދި އައްސޭރިފަށުގައި ވަޒަންވެރިވެފައި ވާ އާބާދުތަކުގެ ފުރާނާއަށްވެސް ނުރައްކާ ބޮޑެވެ.
