ޑްރަގް މައްސަލައެއްގައި ފުލުހުން ހޯދަމުންދާ މީހާއަކީ ކުރީގެ މެޖިސްޓްރޭޓެއް
އޭނާއަކީ ކުރިން ގދ. ތިނަދޫ ކޯޓުގެ މެޖިސްޓްރޭޓުގެ މަޤާމުގައި ހުންނެވި ފަރާތް
މި އަމުރާ ގުޅިގެން ހޯދަމުންދަނީ ގދ. ތިނަދޫ / ގާކުރެލި، އިބްރާހީމް ރަޝީދު (46އ)
ކުރިމިނަލް ކޯޓަށް ހުށަހަޅާފައިވާ މައްސަލައަކާ ގުޅިގެން އެ ކޯޓަށް ހާޒިރު ކުރަން ބޭނުންވެ ހާޒިރު ކުރެވިފައިނުވާ މީހަކު ބަންދުގައި ބަހައްޓައިގެން ކޯޓަށް ހާޒިރު ކޮށްދިނުމަށް ފުލުހުންގެ މައްޗަށް ކޮށްފައިވާ އަމުރަކާ ގުޅިގެން އެމީހާ ހޯދުމުގެ މަސައްކަތް ފުލުހުން ފަށައިފިއެވެ.
މި އަމުރާ ގުޅިގެން ހޯދަމުންދަނީ ގދ. ތިނަދޫ / ގާކުރެލި، އިބްރާހީމް ރަޝީދު (46އ)އެވެ. އޭނާއަކީ ކުރިން ގދ. ތިނަދޫ ކޯޓުގެ މެޖިސްޓްރޭޓުގެ މަޤާމުގައި ހުންނެވި ފަރާތެކެވެ.
އަދި އޭނާއަކީ ޖޭއެސްސީގެ ތާރީހުގައި ފަނޑިޔާރަކު މަގާމުން ވަކި ކުރަން މަޖިލީހަށް ހުށަހެޅި، އަދި ފާސްކުރި ފުރަތަމަ ފަރާތްވެސްމެއެވެ.
ފުލުހުން އިބްރާހީމް ރަޝީދު ހޯދަމުންދަނީ ދައުލަތުން ދަޢުވާކުރާ ޑައިމޯފިނުން މުއާމަލާތްކުރުމުގެ ކުށުގެ މައްސަލައައާ ގުޅިގެން ކޯޓަށް ހާޒިރުކުރަން ބޭނުންވެ ހާޒިރުކުރެވިފައިނުވާތީ ބަންދުގައި ބަހައްޓައިގެން 2023 އޮގަސްޓް 23 ވަނަ ދުވަހުގެ 09:45 އަށް ކްރިމިނަލް ކޯޓަށް ހާޒިރުކޮށްދިނުމަށް ފުލުހުންގެ މައްޗަށް ކޮށްފައިވާ އަމުރާ ގުޅިގެންނެވެ.
އިބްރާހީމް ރަޝީދު އާބެހޭ އެއްވެސް މައުލޫމާތެއް ލިބިފައިވާ ފަރާތެއް ވާނަމަ ފުލުހުންގެ ކަސްޓޯޑިއަލް ނަންބަރު 9991442 އަށް ގުޅުއްވައި ހިއްސާކުރެއްވުމަށް ފުލުހުން އެދިފައިވެއެވެ.
އޭނާ މަޤާމުން ވަކިކޮށްފައިވަނީ އަންހެނަކާ ދިމާލަށް މަގުމަތީގައި ހުރެ އާންމު އަހުލާގީ މިންގަނޑާ ހިލާފު ހަޑި ހުތުރު އެއްޗެހިތަކެއް ގޮވި މައްސަލައެއްގައެވެ. އެ މައްސަލަ ޖޭއެސްސީ އަށް ހުށަހަޅާފައިވަނީ 25 އޭޕްރިލް 2013 ގައެވެ.
