މަޖިލީހުގެ ރައީސްގެ އިތުބާރު ނެތްކަމުގެ މައްސަލަ އިތުރަށް ލަސްކުރާ ކަމަށް ބުނެ މެމްބަރުން ތަޅުމުގައި ނުރުހުން ފާޅުކޮށްފި
އެޖެންޑާގައި އޮތީ މެންބަރުން ތަމްސީލުކުރާނެ ގޮތަށް ގެނެވޭ ބަދަލާގުޅޭ މައްސަލަ
މަޖިލީހުގެ މިއަދުގެ ޖަލްސާގެ ތެރެއިން
މަޖިލީހުގެ ރައީސްގެ އިތުބާރު ނެތްކަމުގެ މައްސަލަ އިތުރަށް ލަސްކުރާ ކަމަށް ބުނެ މެމްބަރުން މަޖިލީހުގެ ތަޅުމުގައި ނުރުހުން ފާޅުކޮށްފިއެވެ.
ހޯމަ ދުވަހުގެ ޖަލްސާ ފެށި އިރު ޖަލްސާ އަށް ހާޒިރުވެވަޑައިގެން ތިއްބެވީ 29 މެމްބަރުންނެވެ. ހޯމަ ދުވަހުގެ އެޖެންޑާގައި އޮތީ ރައްޔިތުންގެ މަޖިލީހުގެ ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކަށް ނިސްބަތްވެވަޑައިގަންނަވާ މެންބަރުންނާއި، ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރާނެ ގޮތަށް ގެނެވޭ ބަދަލާގުޅޭ މައްސަލަ އެކަންޏެވެ.
ރިޔާސަތުން އަންގާ އެންގެވުން އަންގަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ މަޖިލީހުގައި ޕާޓީއަކަށް ނިސްބަތްވާ މެމްބަރުންގެ ގޮތުގައި ތިއްބެވި މެމްބަރުންގެ ތެރެއިން މެދު ހެންވޭރު ދާއިރާގެ މެމްބަރު އަލީ އާޒިމާއި، މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ އާއި މަޑަވެލީ ދާއިރާގެ މެމްބަރު ހުސެއިން ފިރުޝާން ދަ ޑިމޮކްރެޓްސް އާއި ގުޅިވަޑައިގެންފައިވާ ކަމަށެވެ. އެކަމާއި ގުޅޭ ލިޔުންތައް މަޖިލީހަށް ލިބިވަޑައިގެންފައިވާތީ އެ މެމްބަރުންނަކީ ދަޑިމޮކްރެޓްސް އަށް ނިސްބަތްވާ މެމްބަރުންގެ ގޮތުގައި ހިމަނާފައިވާކަން ނަޝީދު ވަނީ އިއުލާންކުރައްވާފައެވެ.
މި ބަދަލާއި ގުޅިގެން މަޖިލީހުގައި މެމްބަރުން ހިމެނޭ ގޮތަކީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) 54، ޕްރޮގްރެސިވް ޕާޓީ އޮފް ދަ މޯލްޑިވްސް (ޕީޕީއެމް) 5، ޕީޕަލްސް ނޭޝަނަލް ކޮންގރެސް (ޕީއެންސީ) 3، މޯލްޑިވްސް ނޭޝަނަލް ޕާޓީ 3، ޑިމޮރެކްޓްސް 3، މޯލްޑިވްސް ޑިވެލޮޕްމެންޓް އެލަޔަންސް (އެމްޑީއޭ) 2 އަދި ޖުމްހޫރީ ޕާޓީ (ޖޭޕީ) 2 އެވެ. އަދި ޕާޓީ އަކަށް ނިސްބަތް ނުވާ 15 މެމްބަރުން އެބަތިއްބެވިއެވެ.
10 ޖުލައިގައި ދައުރުން ބޭއްވި ޖަލްސާގައި ދާއިމީ ކޮމިޓީގައި މެމްބަރުން ހިމެނޭނެ ގޮތް ވަނީ ފާސްކޮށްފައެވެ. އަދި އެ ބަދަލާއި އެއްގޮތަށް ޕާޓީތަކުން ވަނިީ ކޮމިޓީތަކަށް މެމްބަރުންގެ ނަން ވެސް ފޮނުވާފައެވެ. އެހެންނަމަވެސް މިއީ ޑިމޮކްރެޓްސް މަޖިލީހުގައި ހިމެނޭ ޕާޓީތަކުގެ ދަފްތަރުގައި ހިމެނުމުގެ ކުރީގައި ގެންނެވި ބަދަލަކަށް ވެފައި، މަޖިލީހުގެ ދަފްތަރުގައި ޑިމޮކްރެޓްސް މިހާރު ރަޖިސްޓްރީކޮށްފައިވާތީ އެހެން މެމްބަރުން އެޕާޓީއަށް ވެދެވަޑައިގަންނަވާ ނަމަ އެ ސިޓީ ފޮނުވާދެއްވުމަށް އެ ޕާޓީގެ މެމްބަރުން ގެ ކިބައިން ނަޝީދު އެދިވަޑައިގެންނެވިއެވެ. އެކަން ކުރުމުން މަޖިލީހުގެ ދާއިމީ ކޮމިޓީތައް ކަނޑައެޅި، ކޮމިޓީތަކުގައި ހުރި އިތުބާރު ނެތްކަމުގެ މައްސަލަތަކަށް ވަގުތު ކަނޑައެޅޭނެ ކަމަށް ނަޝީދު ވަނީ ވިދާޅުވެފައެވެ.
ނަޝީދު އެހެން ވިދާޅުުވުމުން މެމްބަރުން ވަނީ ނުރުހުން ފާޅުކުރައްވަން ފައްޓަވާފައެވެ. އަދި އުސޫލުން ބޭރުން ނަޝީދު ކަންކަން ކުރައްވާ ކަމަށް މެމްބަރުން ދިޔައީ ވިދާޅުވަމުންނެވެ. މެމްބަރުން ވަނީ ނަޝީދު މަޖިލީހުގައި އަމަލުކުރައްވާ ގޮތަށް ވަރަށް ބޮޑަށް ފާޑު ވިދާޅުވާން ފައްޓަވާފައެވެ. އެ ހިސާބުން މަޖިލީހުގެ ރައީސް ކުރާ އަމުރަށް ކިޔަމަން ނުވުމުން ކަމަށް ވިދާޅުވެ، ދާންދޫ ދާއިރާގެ މެމްބަރު ޔައުގޫބު އަބްދުﷲ (ދާންދޫ)، ކެލާ ދާއިރާގެ މެމްބަރު އިބްރާހިމް ޝަރީފް، ތިނަދޫ އުތުރު ދާއިރާގެ މެމްބަރު އަބްދުލްމުގުނީގެ ނަން ނަޝީދު ވަނީ އިއްވަވާފައެވެ.
އޭގެ ފަހުން ކެޔޮދޫ ދާއިރާގެ މެމްބަރު ހުސައިން ގާސިމް މަޖިލީހުން ބޭރަށް ނުކުންނަވަން އުޅުމުން އެކަމާއި ހިތްހަމަޖެހިވަޑައި ނުގެން ދެއްކެވި ވާހަކަފުޅުގައި ކެޔޮދޫ ދާއިރާގެ މެމްބަރަށް ތަޅުން ދޫކޮށް ވަޑައި ނުގެންނެވޭނެ ކަމަށް ވެސް ނަޝީދު ވިދާޅުވިއެވެ. ގާނޫނު އަސާސީ އަށާއި ޤާނޫނުތަކަށް ބޯލަނބަން ޖެހޭނެ ކަމަށާއި މަޖިލީހުގައި އަމަލުކުރަން ޖެހޭނީ އެތަނުގެ ހަމަތަކުގެ މަތިން ކަމަށް ނަޝީދު ވިދާޅުވިއެވެ.
ހޯމަ ދުވަހުގެ ޖަލްސާ ނަޝީދު މެދުކަނޑާލެއްވީ މަޖިލީހުގެ ގަވާއިދަށް މެމްބަރުން އަމަލު ނުކުރައްވާ ކަމަށް ވިދާޅުވެއެވެ.
