ފަހަތުން އަރައި ލިވަޕޫލްއިން ބޯންމައުތު ބަލިކޮށް، ސީޒަނުގެ ފުރަތަމަ މޮޅު ހޯދައިފި

ފަހަތުން އަރައި 3-1 ގެ ނަތީޖާއަކުން ބޯންމައުތު ބަލިކޮށް، ލިވަޕޫލްއިން މި ސީޒަނުގެ ފުރަތަމަ މޮޅު ހޯދައިފިއެވެ.

ލިވަޕޫލްގެ ފުރަތަމަ މެޗުން ވަނީ ޗެލްސީ ކައިރިން އެއްވަރުވެފައެވެ. ބޯންމައުތާ ދެކޮޅަށް ކުޅުނު މެޗުގެ ތިންވަނަ މިނެޓުގައި ބޯންމައުތުގެ އެންޓޮއިން ސެމެންޔޯ ވަނީ ލަނޑެއް ޖަހައި އެ ޓީމަށް ކުރިހޯދަދީފައެވެ. އޭގެ ތިން މިނެޓު ފަހުން ލިވަޕޫލްގެ ކެޕްޓަން، ވެން ޑައިކް ފޮނުވާލި ބޯޅަ އަމާޒުވެފައިވަނީ ގޯލުގެ މަތީ ދަނޑިއަށެެވެ.

ލިޕަލޫލުން ވަނީ ފުރަތަމަ ހާފު ނިމުމުގެ ކުރިން ދެ ލަނޑު ޖަހައި، ލީޑު ނަގާފައެވެ. މެޗުގެ 27 ވަނަ މިނެޓުގައި ލިވަޕޫލްގެ ފުރަތަމަ ލަނޑު ކާމިޔާބުކޮށްދިނީ ލުއިސް ޑިއާޒް އެވެ. އޭގެ އަށް މިނެޓު ފަހުން ސޮބޮސްލައި އަށް ކުރި ފައުލް އަކާ ގުޅިގެން ލިވަޕޫލްއަށް ވަނީ ޕެނެލްޓީ އެއް ލިބިފައެވެ. މުހައްމަދު ސަލާހު ޖެހި ޕެނެލްޓީ ބޯންމައުތުގެ ކީޕަރު ނެޓޯ ވަނީ މަތަކޮށްފައެވެ. ނަމަވެސް އޭނާގެ އަތުގައި ޖެހިފައި ނުކުތް ބޯޅަ، ސަލާހު ވަނީ ގޯލުގެ ތެރެއަށް ފޮނުވާލާފައެވެ.

ދެވަނަ ހާފުގައި ލިވަޕޫލްއަށް ހާސްކަން އިތުރުވީ، މި ހޫނުމޫސުމުގައި އެ ޓީމަށް ގެނައި މެކަލިސްޓާ އަށް ރަތް ކާޑެއް ދެއްކުމާ ގުޅިގެނެވެ. އެންފީލްޑުގައި އޭނާ ލިވަޕޫލްއަށް ކުޅުނު ރަސްމީ ފުރަތަމަ މެޗުގައި ރަތް ކާޑު ދައްކާފައިވަނީ ބޯންމައުތުގެ ރަޔާން ކްރިސްޓީއަށް ކުރި ނުރައްކާ ފައުލަކާ ގުޅިގެނެވެ. މެޗުގެ 58 ވަނަ މިނެޓުން ފެށިގެން ލިވަޕޫލްއިން 10 ކުޅުންތެރިންނާއެކު ކުޅުނު ނަމަވެސް، އޭގެ ފަސް މިނެޓު ފަހުން ޑިއޯގޯ ޔޮޓާ ވަނީ ލަނޑެއް ޖަހައި ލިވަޕޫލަށް ލީޑު ފުޅާކޮށްދީފައެވެ.

މި މޮޅާއެކު ލިވަޕޫލްއަށް ވަނީ ކުޅުނު ދެ މެޗުން ހަތަރު ޕޮއިންޓް ލިބިފައެވެ. މި ސީޒަނުގައި ޕްރިމިއަރ ލީގަށް ޕްރޮމޯޓްވި ބޯންމައުތަށް ލިބިފައިވަނީ އެއް ޕޮއިންޓެވެ.