އެކްސިޑެންޓުވި ޕީއެސްޖީގެ ކީޕަރު، ތިން މަސް ފަހުން ހޮސްޕިޓަލުން ދޫކޮށްލައިފި

ފްރާންސް ލީގުގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ)ގެ ދެ ވަނަ ގޯލް ކީޕަރު ސާޖިއޯ ރިކޯ ތިން މަސް ދުވަސް ފަހުން ހޮސްޕިޓަލުން ދޫކޮށްލައިފިއެވެ.

އުމުރުން 29 އަހަރުގެ ކުޅުންތެރިޔާއަށް އަނިޔާވީ އަސް ދުއްވަން އުޅުމުގެ ތެރޭގައި އަހުން ވެއްޓިއެވެ. އަހުން ވެއްޓި، ރިކޯގެ ބޮލަށް ލިބުނު އަނިޔާގެ ސަބަބުން އޭނާއަށް ވަނީ ސްޕެއިންގެ ސެވިއްޔާގައި ހުންނަ ހޮސްޕިޓަލެއްގެ އައިސީޔޫގައި ވެސް ފަރުވާ ދީފައެވެ. ރިކޯއަށް އައިސީޔޫގައި ފަރުވާ ދޭން ފެށީ، ހޮސްޕިޓަލަށް ގެންދިޔުމަށްފަހު އެންމެ ފުރަތަމަ އޭނާގެ ބޮލުގެ ޚާއްސަ ޓެސްޓުތަކެއް ހަދައި، ލިބުނު އަނިޔާ ސީރިއަސް ކަމަށް ޑަކްޓަރުން ބުނުމުންނެވެ. އައިސީޔޫއިން ރިކޯ ނަގާފައިވަނީ މިދިޔަ ޖޫން މަހުގެ 19 ވަނަ ދުވަހުއެވެ.

ހޮސްޕިޓަލުން ދޫކޮށްލުމާއެކު މީޑިއާތަކާ ވާހަކަދައްކަމުން ރިކޯ ބުނީ، ގިނަ ދުވަސްތަކަކަށްފަހު ހޮސްޕިޓަލުން ދޫކޮށްލުމުން އުފާވާ ކަމަށެވެ. އޭނާ ބުނީ މިދިޔަ ދުވަސްތަކުގައި ވަރަށް ގިނަ ބައެއްގެ އެހީތެރިކަމާއި ހެޔޮ އެދުންވެސް ލިބުނު ކަމަށެވެ. އެ އެންމެނަށް ޝުކުރު އަދާކުރާ ކަމަށް ރިކޯ ވަނީ ބުނެފައެވެ. ރިކޯ ވަނީ އޭނާގެ އަންހެނުން، މައިންބަފައިން އަދި އާއިލާގެ އެންމެހައި މެމްބަރުންނަށް ޚާއްސަ ޝުކުރެއް އަދާކޮށްފައެވެ. ޚާއްސަކޮށް އަންހެނުންގެ ފަރާތުން ލިބުނު އެހީތެރިކަން އޭނާ ފާހަގަކުރެއެވެ. އެގޮތުން ރިކޯ ބުނީ އޭނާގެ އަންހެނުން ދުވާލަކު މަދުވެގެން 20 ގަޑިއިރު ހޭދަކުރަނީ އޭނާ ގާތު ކަމަށެވެ. މީގެ އިތުރުން ރިކޯ ބުނީ ހޮސްޕިޓަލުން އޭނާ ދޫކޮށްލުމާއެކު ރިކަވަރީގެ ކަންކަން ކުރިއަށްދާނެ ކަމަށާއި، އެއަށްފަހު އަނެއްކާވެސް އެނބުރި ކުޅުމުގެ ތެރެއަށް އަންނާނެ ކަމަށެވެ.

ރިކޯ އަންނަނީ ލޯނު އެއްބަސްވުމެެއްގެ ދަށުން ސްޕެނިޝް ލީގުގެ މަޔޯކާއަށް ކުޅެމުންނެވެ. އޭނާ އެންމެ ފުރަތަމަ ޕީއެސްޖީއަށް ބަދަލުވީ ލޯނު އެއްބަސްވުމެއްގެ ދަށުން 2019 ވަނަ އަހަރެވެ. އެއް އަހަރު އެ ކުލަބަށް ކުޅުމަށްފަހު 2020 ވަނަ އަހަރު ވަނީ ދާއިމީ އެއްބަސްވުމެއް އެކުލަވާލާފައެވެ. އެ އެއްބަސްވުމުގެ މުއްދަތު ހަމަވާނީ އަންނަ އަހަރުއެވެ. ލޯނު އެއްބަސްވުމެއްގެ ދަށުން ރިކޯ މަޔޯކާއަށް ބަދަލުވީ މިދިޔަ އަހަރުއެވެ.