ގޯއްޗަށް ގުރުނެގުން ކުރިޔަށްގެންދާނީ ހަމައެކަނި ގަލޮޅު ދަނޑުގައި
17 އޯގަސްޓު 2023 | ބުރާސްފަތި 02:18"ބިންވެރިޔާ' ސްކީމުގެ ދަށުން ގޯއްޗަށް ޝަރުތު ހަމަވާ 18،955 މީހުންގެ ނަން ދާއިމީ ލިސްޓުގައި ހިމަނާފައިވޭ
"ބިންވެރިޔާ ސްކީމް"ގެ ދަށުން ގޯތި ލިބޭ މީހުންނަށް ދޫކުރާ ގޯތިތަކުގެ ގުރުއަތުލުން
"ބިންވެރިޔާ ސްކީމް"ގެ ދަށުން ގޯތި ލިބޭ މީހުންނަށް ދޫކުރާ ގޯތިތަކުގެ ގުރުއަތުލުން ކުރިޔަށްދާނީ ހަމައެކަނި ގަލޮޅު ދަނޑުގައިކަމަށް މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން ބުނެފިއެވެ.
ގޯތި ލިބޭ މީހުންގެ ގުރުނަގަން ފަށާފައިވަނީ މިމަހުގެ 15 ވަނަ ދުވަހުއެވެ. ކުރިން އޮތީ 15 އަދި 16 ވަނަ ދުވަހު ގަލޮޅު ދަނޑުގައި ގުރުނެގުން ކުރިޔަށް ގެންދިޔުމަށްފަހު ދެން ހެންވޭރު ދަނޑުގައި ގުރުނެގުން ކުރިޔަށްގެންދާގޮތަށެވެ. ނަމަވެސް ހައުސިންގ މިނިސްޓްރީން ކޮށްފައިވާ އިއުލާނެއްގައި ބުނެފައިވަނީ މިހާރު ގުރުނެގުން ކުރިޔަށްދާނީ ހަމައެކަނި ގަލޮޅު ފުޓްބޯޅަ ދަނޑުގައި ކަމަށެވެ.
އެހެންކަމުން ކޮންމެ ފަރާތަކުންވެސް "ގެދޮރުވެރިން ޕޯޓަލް" އަށް ލޮގިން ވުމަށްފަހު އެމީހަކު ގުރުއަތު ނެގުމަށް ދާންޖެހޭ ގަޑި ބަލައި، އެފޯމުގެ ބައިވެރިންގެ ތެރެއިން އެކަކު ނުވަތަ ފޯމްފައިވާ ފަރާތްތަކުން ކަނޑައަޅާ ފަރާތެއް ގުރުއަތު ނެގުމަށް ހާޒިރުވުމަށް އެދޭކަމަށް ހައުސިންގ މިނިސްޓްރީން ބުނެއެވެ. އަދި ގުރުނެގުމަށް ކަނޑައަޅާފައިވާ ވަގުތުގައި ނާދެވޭ ފަރާތްތަކުގެ ގުރުނަގާނީ ހައުސިންގ މިނިސްޓްރީން އެކަމަށް ކަނޑައަޅާފައިވާ އޮފިޝަލުންނެވެ.
ގުރުއަތު ނެގުމުން ގޯތި ލިބޭ ތަނާއި ޕްލޮޓް ނަމްބަރު އެނގިގެންދާނެއެވެ. ރައީސް އިބްރާހީމް މުހައްމަދު ޞާލިހު ވަނީ މިދައުރު ނިމުމުގެ ކުރިން ގޯތިތަކުގެ ރަޖިސްޓްރީ ދެއްވާނެ ކަމަށް ވިދާޅުވެފައެވެ.
މާލެ ރައްޔިތުންނަށް ގޯތި ދެނީ ހުޅުމާލޭގެ އިތުރުން ގުޅިފަޅު އަދި ގިރާވަރު ފަޅުންނެވެ. "ބިންވެރިޔާ' ސްކީމުގެ ދަށުން ގޯއްޗަށް ޝަރުތު ހަމަވާ 18،955 މީހުންގެ ނަން ދާއިމީ ލިސްޓުގައި ވަނީ ހިމަނާފައެވެ.
