އިންތިޚާބާ ގުޅޭ ކޮރަޕްޝަނާއި ގުޅުންހުރި މައްސަލަތައް އަވަހަށް ބެލޭނެ އިންތިޒާމު ވަނީ ހަމަޖެހިފައި: އޭސީސީ

ރިޔާސީ އިންތިޚާބާއި ގުޅިގެން ހިންގާ އިންތިޚާބީ ރިޝްވަތުގެ މައްސަލަ އޭސީސީއަށް ހުށަހެޅުމަށް ޚާއްސަ ޕޯޓަލްއެއް ގާއިމުކޮށްފައިވާއިރު ހުށަހެޅޭ މައްސަލަތައް އަވަހަށް ބެލޭނެ އިންތިޒާމު ހަމަޖެހިފައި ހުންނާނެކަމަށް އެންޓި ކޮރަޕްޝަން ކޮމިޝަން (އޭސީސީ)ން ބުނެފިއެވެ.

ރިޝްވަތުގެ މައްސަލަ ހުށަހެޅުމަށް އޭސީސީން ހަދާފައިވާ ޕޯޓަލް އާ ގުޅޭގޮތުން ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ކޮމިޝަންގެ މެމްބަރ ޝިޔާމާ މުހައްމަދު ވިދާޅުވީ ޕޯޓަލް މެދުވެރިކޮށް ޝަކުވާ ހުށަހަޅަން ހުޅުވާލީ ފަސޭހަކަމާއެކު ޝަކުވާ ހުށަހެޅޭނެ އިންތިޒާމު ހަމަޖެއްސުމަށްކަމަށެވެ. ޕޯޓަލް މެދުވެރިކޮށް ކާކުކަން ނޭނގޭ ގޮތަށް ޝަކުވާ ހުށަހެޅޭއިރު ފޯމު ފުރިހަމަވެގެން އަންނައިރު އިންތިޚާބީ ޝަކުވާ އާއި އެނޫން ޝަކުވާ ވަކިކުރަންވެސް ފަސޭހަވާނެކަމަށް ޝިޔާމާ ވިދާޅުވިއެވެ.

ޕޯޓަލް މެދުވެރިކޮށް އަންނައިރު ފޯމުތައް އަންނާނީ ފިލްޓަރ ވެގެންކަމަށާއި އެހެންކަމުން ޝަކުވާ ބަލަން ފަސޭހަވާނެކަމަށް ޝިޔާމާ ވިދާޅުވިއެވެ. އަދި ކުރީ އަހަރުތަކާއި ޚިލާފަށް މިއަހަރު އިންތިޚާބީ ޝަކުވާ ބަލަން ވަކި ޓީމެއް ނޯންނާނެކަމަށާއި އެހެންވުމުގެ ސަބަބުންވެސް އަވަހަށް ޝަކުވާ ބެލޭނެކަމަށް ޝިޔާމާ ވިދާޅުވިއެވެ.

ޕްރޮގްރާމްގައި ވާހަކަދައްކަވަމުން ކޮމިޝަންގެ މެމްބަރ ޝަޒްނާ ހާޝިމް ވިދާޅުވީ އިންތިޚާބާއި ގުޅިގެން ހުށަހަޅާ މައްސަލަތަކީ އެކަމުގެ މުއާލާތް ނުކެނޑެނީސް ބެލެންޖެހޭ މައްސަލަތައްކަމަށާއި އެހެންކަމުން މިޕޯޓަލް އާއެކު އަވަހަށް މައްސަލަތައް ބެލިގެންދާނެކަމަށެވެ. ކޮންމެ މީހަކަށްވެސް ފޯނުން ފަސޭހަކަމާއެކު މައްސަލަ ހުށަހެޅުމުގެ ފުރުސަތު މިހާރު އޮންނާނެކަމަށް ޝަޒްނާ ވިދާޅުވިއެވެ.

މީގެއިތުރުން އިންތިޚާބާއި ގުޅިގެން ހޭލުންތެރިކުރުމުގެ ޕްރޮގްރާމްތައްވެސް އޭސީސީން ހިންގަމުންދާކަމަށް ޝަޒްނާ ވިދާޅުވިއެވެ. އެގޮތުން ވަކިން ޚާއްސަކޮށް ޒުވާނުންނަށް އަދި އަލަށް ވޯޓުލާ ޒުވާނުންނަށް އަމާޒުކޮށްގެން ޕްރޮގްރާމްތައް ހިންގާކަމަށް ޝަޒްނާ ވިދާޅުވިއެވެ. ހދ، ޅ އަދި ގއ އަތޮޅުގައި ޕްރޮގްރާމްތައް ކުރިޔަށްގެންދާކަމަށް ޝަޒްނާ ވިދާޅުވިއެވެ.