އިންޑިޔާގެ ތަރައްޤީގެ ދަތުރުގައި އަންހެނުންގެ ހިއްސާ ވަރަށް ބޮޑު- މޯދީ
15 އޯގަސްޓު 2023 | އަންގާރަ 09:07އެންމެ ގިނަ އަންހެން ޕައިލެޓުން ތިބީވެސް އިންޑިޔާގައި ކަމަށް ފަޚުރުވެރިކަމާއެކު ބުނެވެން އެބައޮތް ކަމަށް މޯދީ ވިދާޅުވި
އިންޑިޔާގެ ބޮޑުވަޒީރު ނަރެންދުރަ މޯދީ
އިންޑިޔާގައި އަންގާރަ ދުވަހު އެ ގައުމުގެ މިނިވަންދުވަސް ފާހަގަކުރަމުން ދާއިރު، ގައުމުގެ ތަރައްޤީގައި އަންހެނުންގެ ދައުރު ވަރަށް ބޮޑުކަމަށް ބޮޑުވަޒީރު ނަރެންދުރަ މޯދީ ވިދާޅުވެއްޖެއެވެ.
މިނިވަން ދުވަސް ފާހަގަކުރުމަށް ދެއްވި ދިހަވަނަ ތަޤްރީރުގައި މޯދީ ވަނީ ގައުމު ކުރިޔަށް ގެންދިއުމުގައި އެންމެ އިސް ދައުރެއް އަދާކުރާ އެއްކަމަކީ އަންހެނުން އިސްވެ ތިބެ ހިންގާ ތަރައްޤީގެ ހަރަކާތްތައްކަމަށް ވިދާޅުވެފައެވެ. އަދި އެގައުމުން ކުރިޔަށްގެންދާ ޗަންދުރަލަޔާން ސްޕޭސް މިޝަންގައި އިސްކޮށް ތިބީވެސް އަންހެން ސައިންޓިސްޓުންކަން މޯދީ ފާހަގަކުރައްވާފައިވެއެވެ.
މީގެ އިތުރުން ސިވިލްއެވިއޭޝަން ދާއިރާގައި އެންމެ ގިނަ އަންހެން ޕައިލެޓުން ތިބީވެސް އިންޑިޔާގައި ކަމަށް ފަޚުރުވެރިކަމާއެކު ބުނެވެން އެބައޮތް ކަމަށް މޯދީ ވިދާޅުވެފައިވެއެވެ. ގައުމުގެ މަންމައިންނާއިން އުޚްތުންގެ އިތުރުން އަންހެން ދަރިންނަށް ބުނެލަން ބޭނުންވަނީ މިއަދު ގައުމު މިވަރަށް ކުރިޔަށް ގޮސްފައިމިވަނީ ތިޔަ ކަނބަލުންގެ ހިއްވަރުންކަމަށް މޯދީގެ ތަޤްރީރުގައި ވިދާޅުވެފައި ވެއެވެ.
އިންޑިޔާގެ ސްޕޭސް މިޝަންގެ ތެރޭން މިހާރުވެސް ވަނީ ހަނދަށް އުޅަދެއް ފޮނުވާފައެވެ. މިދަތުރުން އިންޑިޔާއިން ހާސިލުކުރުމަށް މަސައްކަތްކުރަމުން ދަނީ ހަނދުގައި "ސޮފްޓް ލޭންޑިންގ" އެއް ކާމިޔާބު ކުރި ހަތަރުވަނަ ގައުމަކަށް ވުމަށެވެ. މީގެ ކުރިން މިކަން ހާސިލުވެފައިވަނީ އެމެރިކާ ރަޝިޔާ އަދި ޗައިނާ އަށެވެ. ޖުލައި 14 ވަނަ ދުވަހު އުދުއްސާލި ސްޕޭސް ކްރާފްޓްގައި އުފުލާ ޚާއްސަ އުޅަނދެއް އޮގަސްޓް 23 ވަނަ ދުވަހު ހަނދުގައި ޖެއްސުމަށް ވަނީ ހަމަޖެހިފައެވެ.
ދަނޑުވެރިކަމުގެ ރޮނގުން އިންޑިޔާ މިއަދު ހޯދާފައިވާ ކުރިއެރުމާއި ކާމިޔާބީތައް ފާހަގަކުރައްވާ މޯދީގެ ތަޤްރީރުގައި އިންޑިޔާގެ ދަނޑުވެރިންނަށްވެސް ވަނީ ޚާއްސަ ޝުކުރެއް އަދާކުރައްވާފައެވެ.
