މެންޗެސްޓަރ ޔުނައިޓެޑަށް މާ މޮޅަށް ކުޅެވޭނެ ކަމަށް އެ ޓީމުގެ ކޯޗު އެރިކް ޓެން ހާގް ބުނެފި އެވެ.

އޭނާ މިހެން ބުނީ އިނގިރޭސި ޕްރިމިއާ ލީގުގައި ވުލްވްސްއާ ދެކޮޅަށް ކުޅުނު މެޗުން މޮޅުވުމަށްފަހު ވާހަކަ ދައްކަމުންނެވެ. އޭނާ ބުނީ، ވުލްވްސް މެޗަކީ ވަރަށް ޓަފް މެޗެއް ކަމަށެވެ. އޭނާ ދެކޭ ގޮތުގައި ޔުނައިޓެޑުގެ ކުޅުންތެރިންނަށް ބޯޅައާއެކު، ކުދި ގޯސްތަކެއް ހެދުނު ނަމަވެސް އެކަން ރަނގަޅު ކުރެވޭނެ ކަމަށެވެ. އޭނާ ބުނީ، ސީޒަންގެ ފުރަތަމަ މެޗު މޮޅަކުން ނިންމާލުމަކީ ހިތްހަމަ ޖެހުމެއް ކަމަށާއި، ދެން ފޯކަސް ކުރަން ޖެހޭނީ ކުރިއަށް ހުރި މެޗުތަކަށް ކަމަށެވެ. ޓެން ހާގް ބުނީ ޔުނައިޓެޑަކީ ކޮން ފެންވަރެއްގެ ޓީމެއްކަން މިދިޔަ ސީޒަނާއި، އޭގެ ކުރިން ޕްރީ ސީޒަންގައި ވެސް ދައްކައިދީފައިވާ ކަމަށެވެ. ނަމަވެސް ޕްރީ ސީޒަނާ އަޅާ ބަލާއިރު، ލީގުގައި ކޮންމެ ޓީމެއް ވެސް ވަރަުގަދަކަން އޭނާ ވަނީ ފާހަގަކޮށްފަ އެވެ.

ޓެން ހާގް ބުނީ ކުޅުންތެރިން ކުރާ މަސައްކަތާމެދު އޭނާ ހިތްހަމަ ޖެހޭ ކަމަށެވެ. ނަމަވެސް އަދިވެސް ބޯޅަ ހިފައްޓައިގެން ކުޅެ، ބޯޅައާއެކު ހެދޭ ގޯސްތަައް މަދުކުރުމަށް ޚާއްސަ ސަމާލުކަމެއް ދޭން ޖެހޭ ކަމަށް އޭނާ ދެކެ އެވެ. ޓެން ހާގް ދެކޭ ގޮތުގައި ސީޒަންގެ ކުރީކޮޅު އެކަންކަމަށް ޚާއްސަ ސަމާލުކަމެއް ދީގެން، ރަނގަޅު ކުރުމަށް މަސައްކަތްކޮށްފި ނަމަ، މުޅި ސީޒަންގައި ޔުނައިޓެޑަށް އެކަމުގެ ފައިދާ ކުރާނެ އެވެ. އެހެންކަމުން ކުރިއަށް އޮތް ދުވަސްތަކުގައި އެކަމަށް ސަމާލުކަން ދޭނެ ކަމުގައި ވެސް އޭނާ ވަނީ ބުނެފަ އެވެ.

މިދިޔަ ސީޒަންގެ ޕްރިމިއާ ލީގު ޔުނައިޓެޑުން ނިންމާލީ ތިން ވަނައިގަ އެވެ. އެ ޓީމުގެ ކޯޗުކަމާ އެރިކް ޓެން ހާގް ހަވާލުވިފަހުން އެ ޓީމު އަންނަނީ ރަނގަޅު ނަތީޖާތަކެއް ވެސް ނެރެމުންނެވެ.