އަވަށްޓެރި ގައުމަކަށް ޓެރަރިސްޓް ހަމަލާއެއް ދޭން އުޅުނު ކަމުގެ ތުހުމަތު 4 ދިވެއްސަކަށް ކޮށްފިއެވެ.

ފުލުހުން ބުނީ 2017 ވަނަ އަހަރުގެ ފަހުކޮޅު 4 ދިވެއްސަކު ރާއްޖެއާއި އަވަށްޓެރި ގައުމެއްގައި ޓެރަރިސްޓް ހަމަލާއެއް ދިނުމަށް ރާވައި، ރާއްޖެއިން ބޭރުގެ ޓެރަރިސްޓް ޖަމާއަތަކަށް މާލީ އެހީތެރިކަން ފޯރުކޮށްދީ ޓެރަރިޒަމްގެ އަމަލެއް ހިންގުމަށް އެހީތެރިކަން ފޯރުކޮށްދީފައިވާކަމުގެ ހެކި އެކުވެރި ދެދައުލަތަކުންކޮށްފައިވާ ތަޙްޤީޤުން ހާމަވެފައިވާތީ އެގައުމުތަކުގެ ޤާނޫނު ތަންފީޒުކުރާ އިދާރާތަކުން ފޯރުކޮށްދީފައިވާ މައުލޫމާތާއި ހެކީގެ އަލީގައި 3 ތަނެއް ބަލާފާސްކުރެވިފައިވާ ކަމަށެވެ. މީގެ ތެރެއިން 3 މީހުންގެ ޑިޖިޓަލް ޑިވައިސްތައް ތަޙްޤީޤު ބޭނުމަށް ހިފެހެއްޓިފައިވާ ކަމަށް ފުލުހުން ބުނެއެވެ.

ފުލުހުން ބުނީ މިމައްސަލަ ފުލުހުން އިތުރަށް ތަހްޤީގުކުރަމުންދާ ކަމަށެވެ. އަދި މިމައްސަލައިގައި މައުލޫމާތު ފޯރުކޮށްދީފައިވާ ގައުމުތަކުގެ ތަޙްޤިޤަށް ބޭނުންވާ އެހީތެރިކަން ދިވެހި ފުލުހުންގެ ޚިދުމަތުން ފޯރުކޮށްދެމުންދާ ކަމަށް ފުލުހުން ބުނެފައިވެއެވެ.