ފެންނަނީ އެމްޑީޕީން އެކަނި ރިޔާސީ އިންތިޚާބަށް ތައްޔާރަށް ތިބިތަން: މާރިޔާ

ފެންނަނީ އެމްޑީޕީން އެކަނި ރިޔާސީ އިންތިޚާބަށް ތައްޔާރަށް ތިބިތަން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ރިޔާސީ ކެމްޕެއިންގެ ތަރުޖަމާނު މާރިޔާ އަހުމަދު ދީދީ ވިދާޅުވެއްޖެއެވެ.

ސޯލްޓް ކެފޭގައި ބޭއްވި ނޫސްވެރިންގެ ބައްދަލުވުމެއްގައި މާރިޔާ ވިދާޅުވީ އެމްޑީޕީން އެތެރޭގެ އިންތިޚާބެއް ބާއްވައިފި ކަމަށާއި ހުރިހާ އެންމެންނަށް ބަސް ބުނުމުގެ ފުރުސަތު ދިނުމާއެކު ކެންޑިޑޭޓަކު އިހްތިޔާރުކޮށްފި ކަމަށެވެ.

ކެމްޕޭނަށް ނިކުމެ ތިބިއިރު މެނިފެސްޓޯ ތައްޔާރުވެފައިވާ ކަމަށް ވެސް މާރިޔާ ވިދާޅުވިއެވެ. މާރިޔާ ވިދާޅުވީ 186 ރަށުގައި އެމްޑީޕީގެ ޓީމުތަކުން ހަރަކާތްތެރިވަމުންދާ ކަމަށާއި 18 އަތޮޅެއްގެ 108 ރަށަށް އެމްޑީޕީގެ އެކި ޓީމުތަކުން ދަތުރުކޮށްފި ކަމަށެވެ.

މިހާތަނަށް ކެމްޕޭންގައި ރައީސް 64 ރަށަކަށް ދަތުރުކުރައްވައިފި ކަމަށް ވެސް ވިދާޅުވިއެވެ. އެމްޑީޕީގެ މެމްބަރުން ކައިރީގައި ރައްޔިތުންނަށް ބަސްބުނުމުގެ ފުރުސަތު އެބައޮތް ކަމަށާއި ބިރުވެރިކަމެއް ނެތް ކަމަށެވެ. އެއްބުރުން އިންތިޚާބު އެމްޑީޕީއަށް ކާމިޔާބު ކުރެވޭނެކަމާމެދު ޝައްކު ނުކުރައްވާ ކަމަށް ވެސް މާރިޔާ ވިދާޅުވިއެވެ.

މާރިޔާ ވަނީ އެމްޑީޕީން ކެމްޕޭން ހަރަކާތްތައް ފޯރިއާއެކު ހިންގަމުންދާކަން ފާހަގަކުރައްވާ އެހެން ކެންޑިޑޭޓުންގެ ފަރާތުން އެ މަންޒަރު ނުފެންނަ ކަމަށް ވެސް ވިދާޅުވެފައެވެ.

ރިޔާސީ އިންތިޚާބު އަންނަ މަހު ބޭއްވުމަށް ހަމަޖެހިފައިވާއިރު ރިޔާސީ އިންތިޚާބަށް ކުރިމަތިލެއްވި ކެންޑިޑޭޓުންގެ ނަންބަރު ވަނީ ތަރުތީބުކޮށްފައެވެ.

މިއަހަރުގެ ރިޔާސީ އިންތިޚާބުގައި ވާދަކުރައްވަނީ ރައީސުލްޖުމްހޫރިއްޔާ އަދި އެމްޑީޕީގެ ކެންޑިޑޭޓު އިބްރާހީމް މުހައްމަދު ސާލިހާއި، ޕީއެންސީގެ ކެންޑިޑޭޓް ޑރ. މުހައްމަދު މުއިއްޒުއާއި، ދަ ޑިމޮކްރެޓްސްގެ ކެންޑިޑޭޓް އިލްޔާސް ލަބީބާއި، ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހީމާއި، އެމްއެންޕީގެ ކެންޑިޑޭޓު މުހައްމަދު ނާޒިމް، އަދި އަމިއްލަ ގޮތުން ވާދަކުރައްވާ ކެންޑިޑޭޓުން ކަމަށްވާ އަހުމަދު ފާރިސް މައުމޫނާއި އުމަރު ނަސީރާއި ހަސަން ޒަމީލެވެ.

މިއަހަރުގެ ރިޔާސީ އިންތިޚާބަކީ މިހާތަނަށް ރިޔާސީ އިންތިޚާބެއްގައި އެންމެ ގިނަ ބޭފުޅުން ވާދަކުރައްވާ އިންތިޚާބެވެ. މި އިންތިޚާބުގައި 282،395 މީހުންނަށް ވޯޓު ލުމުގެ ހައްގު ލިބެއެވެ.