އައްޑޫ ސިޓީގައި އާރުޓީއެލް ފެރީގެ ޚިދުމަތް ދޭން ތައްޔާރުވަނީ
10 އޯގަސްޓު 2023 | ބުރާސްފަތި 03:37އާރުޓީއެލް ފެރީ ނިޒާމު ޤާއިމުކުރުމަށް ރާއްޖެ 6 ޒޯނަކަށް ބަހާލައިގެން އަންނަނީ މަސައްކަތް ކުރަމުން
އާރުޓީއެލް ފެރީގެ ޚިދުމަތް އައްޑޫ ސިޓީގައި ފެށުމަށް މައުލޫމާތު ދެނީ
ރާއްޖެ ޓްރާންސްޕޯޓް ލިންކް، އާރްޓީއެލް ފެރީގެ ޚިދުމަތް އައްޑޫ ސިޓީގައި ފެށުމަށްޓަކައި އެ ސަރަޙައްދުގެ މުވައްސަސާތަކާއި ޢާއްމުން ހޭލުންތެރިކުރުވުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، (އެމް.ޓީ.ސީ.ސީ)ން ފަށައިފިއެވެ.
އާރްޓީއެލްގެ ޚިދުމަތް އައްޑޫ ސިޓީގައި ފެށުމަށް ސަރުކާރުން އަންނަނީ ތައްޔާރުވަމުންނެވެ. މިކަމަށް ތައްޔާރުވުމުގެ ގޮތުން އައްޑޫ ސިޓީގެ އެކި ރަށްތަކުގެ ކައުންސިލްތަކާއި، ސަރުކާރުގެ އެކި މުއައްސަސާތަކާއި ބައްދަލުކޮށް، ޚިޔާލުހޯދާ މަޝްވަރާކޮށް، އެޚިދުމަތް ވިހާވެސް އަވަހަށް ފެށުމަށް ތައްޔާރުކުރުވުމުގެ މަސައްކަތް އެމް.ޓީ.ސީ.ސީން އަންނަނީ ކުރަމުންނެވެ. އެމްޓީސީސީން ބުނީ، އައްޑޫ ސިޓީ ގަމާއި ހުޅުމީދޫ، ފޭދޫ އަދި ހިތަދޫގައި އާންމުން ހޭލުންތެރި ކުރުމުގެ ސެޝަންތަކެއް ބާއްވާފައިވާކަމަށެވެ.
އާރުޓީއެލް ފެރީ ނިޒާމު ޤާއިމުކުރުމަށް ރާއްޖެ 6 ޒޯނަކަށް ބަހާލައިގެން އަންނަނީ މަސައްކަތް ކުރަމުންނެވެ. މީގެ ދަށުން މިހާތަނަށް ހއ. އަތޮޅާއި، ހދ. އަތޮޅު އަދި ށ. އަތޮޅުގެ މީހުން ދިރިއުޅޭ ރަށްތަށް ފެރީ ނިޒާމުން ވަނީ ގުޅާލާފައެވެ. އަދި ޅ. އަތޮޅާއި ހުވަދޫ އަތޮޅުގައި ވެސް އާރްޓީއެލްގެ ޚިދުމަތް މިހާރު ވަނީ ފަށާފައެވެ.
މިއަހަރު ނިމުމުގެކުރިން ދެކުނުގެ ހުރިހާ އަތޮޅެއް އާރުޓީއެލް ފެރީ ނިޒާމުން ގުޅާލެވޭނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަނީ ވިދާޅުވެފައެވެ. އެމްޓީސީސީން މަސައްކަތްކުރަމުން އަންނަނީ އަންނަ އަހަރު ނިމެންވާއިރަށް ރާއްޖޭގެ ހުރިހާ ރަށެއް އާރުޓީއެލް ފެރީ ނިޒާމުން ގުޅާލުމަށެވެ.
