އަމިއްލަ ކެންޑިޑޭޓުންގެ ކެންޑިޑެސީ ބަލައިގެންފި
އަމިއްލަގޮތުން ތިން ބޭފުޅުން ވާދަކުރައްވާއިރު، ސިޔާސީ ޕާޓީތަކުން ފަސް ބޭފުޅުން ވާދަކުރައްވާ
އުމަރު، އިލެކްޝަންސް ކޮމިޝަނަށް ފޯމު ހުށަހަޅުއްވަނީ
އަންނަ މަހު ބާއްވާ ރިޔާސީ އިންތިޚާބުގައި ވާދަކުރެއްވުމަށް ކުރިމަތިލެއްވި އަމިއްލަ ކެންޑިޑޭޓުންގެ ކެންޑިޑެސީ އިލެކްޝަންސް ކޮމިޝަން (އީސީ)ން ބަލައިގެންފިއެވެ.
ރިޔާސީ އިންތިޚާބަށް 8 ފަރާތަކުން ކުރިމަތިލައްވާފައިވާއިރު، ސިޔާސީ ޕާޓީތަކުން 5 ފަރާތެއް ވަނީ ކުރިމަތިލައްވާފައެވެ. އަމިއްލަ ގޮތުން ވާދަކުރައްވަނީ އަހުމަދު ފާރިސް މައުމޫނާއި އުމަރު ނަސީރާއި ހަސަން ޒަމީލެވެ. އީސީގެ ނައިބު ރައީސް އިސްމާއީލް ހަބީބު ވިދާޅުވީ މިބޭފުޅުން ހުށަހެޅުއްވި ފޯމުގައިވާ މައުލޫމާތާއި ތަކެތި، އިލެކްޝަންސް ކޮމިޝަނުގެ ފަރާތުން ބަލައި ޗެކްކުރިއިރު، ގާނޫނުގައިވާ ގޮތުގެ މަތީން، މި ބޭފުޅުންނަކީ ރިޔާސީ އިންތިޚާބަށް ޝަރުތު ހަމަވާ ބޭފުޅުންކަމުގައި ބަލައި، އެހުށަހެޅުއްވުންތައް އިލެކްޝަންސް ކޮމިޝަނުން ގަބޫލުކޮށްފައިވާކަމަށެވެ.
އުމަރު ނަސީރުގެ ރަނިންމޭޓެއްގެ ގޮތުގައި ހަމަޖައްސާފައިވަނީ އަހްމަދު ސަލީމު (މާޒް ސަލީމް)އެވެ. ފާރިސް މައުމޫންގެ ރަނިންމޭޓެއްގެ ގޮތުގައި ހަމަޖައްސާފައިވަނީ ޑރ. އަބްދުއްސައްތާރު ޔޫސުފެވެ. ޒަމީލްގެ ރަނިންމޭޓަކީ އޭނާގެ އަނބިކަަބަލުން މަރިޔަމް އަލީމެވެ.
ރިޔާސީ އިންތިޚާބުގެ ގާނޫނުގައިވާގޮތުން، އިންތިޚާބުގައި އަމިއްލަގޮތުން ވާދަކުރައްވާ ކެންޑިޑޭޓުން އޭނާއަށް ތާއީދުކުރާ 1،500 މީހުންގެ ސޮއި ހުށަހަޅުއްވަންޖެހެއެވެ. ރިޔާސީ އިންތިޚާބުގައި ސިޔާސީ ޕާޓީތަކުން ވާދަކުރައްވާ ކެންޑިޑޭޓުންގެ ކެންޑިޑެސީ ހޯމަ ދުވަހު އީސީން ވަނީ ގަބޫލުކޮށްފައެވެ.
މިއަހަރުގެ ރިޔާސީ އިންތިޚާބުގައި ދެން ވާދަކުރައްވަނީ ރައީސުލްޖުމްހޫރިއްޔާ އަދި އެމްޑީޕީގެ ކެންޑިޑޭޓު އިބްރާހީމް މުހައްމަދު ސާލިހާއި، ޕީއެންސީގެ ކެންޑިޑޭޓް ޑރ. މުހައްމަދު މުއިއްޒުއާއި، ދަ ޑިމޮކްރެޓްސްގެ ކެންޑިޑޭޓް އިލްޔާސް ލަބީބާއި، ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހީމާއި، އެމްއެންޕީގެ ކެންޑިޑޭޓު މުހައްމަދު ނާޒިމެވެ.
