ފިލްމާއި ޑްރާމާތަކުގެ އެންމެ ވަރުގަދަ ކިއްލާގެ ގޮތުގައި ސިފަ ކުރަމުން އަންނަ، އެމެރިކާގެ ލޮސް އެންޖަލީސްގެ ހޮލީވުޑަށް، މި އަހަރުގެ ހޫނު މޫސުމުގެ ދުވަސްވަރަކީ ބަނަ، އަނދިރި ދުވަސްވަރެކެވެ. ފިލްމީ ތަރިންނާއި ލިޔުންތެރިން ކުރަމުންދާ ސިލްސިލާ ހަޅުތާލުތަކާ ހެދި ހޮލީވުޑްގެ މަސައްކަތްތައް ހުއްޓުމަކަށް އައިސްފައި ވާ އިރު، އެކަމުގެ އަސަރު، އެހެން ދާއިރާތަކުންވެސް ދަނީ ފެންނަމުންނެވެ. އެހެން ނޫނީ ވިއްޔާ އެންމެ ކާރޫބާރޫ ބޮޑުވެގެންދާ އަހަރުގެ ހޫނު މޫސުމުގެ ދުވަސްވަރު، މަސައްކަތެއް ނުކޮށް ތިބީ ހަމަ އެކަނި ލިޔުންތެރިންނާއި އެކްޓަރުންނެއް ނޫނެވެ. ލައިމްލައިޓް ކޭޓަރިންގެ ޓްރަކްތައްވެސް އޮލީވުޑްގެ ގަދަ ހޫނުގައި ޕާކު ކޮށްފައި ހަމަ އޮތީއެވެ. ޓިންސެލްޓައުންގެ ގޮތުގައިވެސް މުޚާޠަބު ކުރާ ހޮލީވުޑްގެ އެތައް ވިޔަފާރިއެއްގެ އަދުގެ ހާލަކީވެސް ހަމަ މިއެވެ.
'އެންސީއައިއެސް ލޮސް އެންޖަލީސް' އާއި 'ދަ ހޭންގް އޯވަރ' ފަދަ އުފެއްދުންތަކުގެ އިތުރުންވެސް، ހޮލީވުޑްގެ ވަރުގަދަ އުފެއްދުންތަކެއްގައި މަސައްކަތް ކުރާ މީހުންގެ ކެއިންބުއިމުގެ ކަންކަމުގައި އެންމެ ހަރަކާތްތެރިކޮށް އުޅުނު އެއް ބަޔަކީ ލައިމްލައިޓް ކޭޓަރިންގއެވެ. އެ މަސައްކަތުގައި ލައިމްލައިޓް ކޭޓަރިންގ އުޅޭތާ މިހާރު 20 އަހަރަށް ވުރެ ގިނަ ދުވަސްވެއްޖެއެވެ. ނަމަވެސް، މިދިޔަ 3 މަހެއްހާ ދުވަހަކީ، ލައިމްލައިޓް ކޭޓަރިންގގެ ބަދިގެތަކަށް ހިމޭން ދުވަސްވަތަކެކެވެ. މުޅި ތަނަށް ފެތުރިފައި އޮތީ ފަޅުކަމެވެ.
އެގްޒެކެޓިވް ޝެފް އަދި ލައިމްލައިޓް ކޭޓަރިންގްގެ ކޯ-އޯނަރެއް ކަމަށް ވާ ކޭކަސްޓްރޯ ރާޖީ ބުނި ގޮތުގައި، މީގެ ކުރިން އޭނާ ގާތު، 70 ވަރަކަށް މީހުން މަސައްކަތް ކުރަމުން ދިޔައެވެ. ހަޅުތާލުތަކުގެ ސަބަބުން، ހުރިހާ އެންމެންނަށްވެސް ތަކުލީފުތަކެއް އުފުލަން މަޖުބޫރުވެފައި ވާ ކަމަށް ރާޖީ ވަނީ ފާހަގަ ކޮށްފައެވެ.
އަހަރަމެންގެ މައިގަނޑު މަސައްކަތަކީ ފިލްމުތަކާއި ސީރީޒްތަކުގަ މަސައްކަތް ކުރާ މީހުންގެ ކެއިންބުއިމުގެ ކަންކަން ހަމަޖެއްސުން. ކަލޭމެންނަށް ފެންނަން މި އޮތް ގޮތަށް، އަހަރަމެން ކުރާނެ މަސައްކަތެއް މިހާރަކު ނެތް. 4 މަހެއްހާ ދުވަސް ވެދާނެ އަހަރަމެން މަސައްކަތް ނުކުރާތާ. އެއްވެސް މުވައްޒަފަކު މިހާރު މަސައްކަތެއް ނުކުރާނެ. ކޮންމެ މީހަކީވެސް ހަތަރު، ފަސް މީހުންގެ ޢާއިލާއެއް ބަލަހައްޓާ މީހެއް. މިތަނުގަ އުޅުނު 60، 70 ވަރަކަށް މީހުން... އަހަރަމެންގެ މަސައްކަތުގަ. މިހާރު އެ އެންމެން ހަމަ ގޭގަ ތިބެނީ. ހަޅުތާލާ ހެދި، އެންމެނަށްވެސް ނޭދެވޭ އަސަރު ފޯރާފަ މިއޮތީ.ކޭކަސްޓްރޯ ރާޖީ؛ ލައިމްލައިޓް ކޭޓަރިންގްގެ ކޯ އޯނަރެއް
ޕާކު ކޮށްފައި ހުރި އުޅަނދުތައް ބަލާ ފާސް ކުރަމުން ދިޔަ ރާޖީ ބުނި ގޮތުގައި، އާންމު ދުވަހެއްގައި ވިއްޔާ އެ ސަރަޙައްދު އޮންނާނީ ހުހަށެވެ. ހުރިހާ ޓްރަކެއްވެސް އުޅޭނީ ކޮންމެވެސް ފިލްމެއް ނުވަތަ ޑްރާމާއެއްގެ މަސައްކަތް ކުރިއަށް ދާ ސައިޓްގައެވެ. އެ މަސައްކަތުގައި އުޅޭ 300 އެއްހާ މީހުންގެ ކެއިންބުއިމުގެ ކަންކަން ހަމަޖައްސާ ދިނުމުގައި އަވަދިނެތިއެވެ. ކުރާނެ މަސައްކަތެއް މިއަދު ނެތުމުގެ ސަބަބުން، ރާޖީއަށް މާޔޫސްކަމާ ކުރިމަތިލާން ޖެހިފައި ވާ ކަންވެސް އޭނާ ވަނީ ފާހަގަ ކޮށްފައެވެ.
ވަރަށް މާޔޫސީ ހިތްދަތި ގޮތަކަށް މިތަން މި އޮންނަނީ. ކުދިވެރިންވެސް ގުޅާލާނެ. ފިލްމެއްގަ މަސައްކަތްކޮށްލަން ލިބޭނެ ވަޤުތެއް ބަލަން ގުޅާލާނެ. އެކަމަކު، އަހަރަމެންނަކަށް ނޭނގެ ދޭނެ ޖަވާބެއް. އަހަރަމެން ކޮންމެ މީހެއްގެވެސް ޢާއިލާއެއް އޮންނާނެތާ. 5 މީހުން، 6 މީހުން، 2 މީހުންގެ ޢާއިލާތައް މި އޮންނަނީ. ހުރިހާ ޢާއިލާތަކެއް އެއްކޮށްލީމަ ތިބޭނެ މީހުންގެ ޢަދަދު ވިސްނާލާ ކަލޭމެން ނިކަން. އެއްވެސް ކަމެއް ނުކޮށް، ގޭގަ އެމީހުން އެ ތިބެނީ. ވަރަށް ހިތްދަތި ކޮންމެއަކަސް.ކޭކަސްޓްރޯ ރާޖީ؛ ލައިމްލައިޓް ކޭޓަރިންގްގެ ކޯ އޯނަރެއް
ރާޖީގެ ވިޔަފާރި ބައިވެރިޔާ ސްޓީވް މައިކަލްސަންގެ ވާހަކަވެސް ހުރީ ހަމަ އެފަދަ ގޮތަކަށެވެ. އެ ކައްކާއަކަށް ޚާއްޞަ ކެއުންތައް ތައްޔާރު ކުރުމުގެ މަސައްކަތުގައި އަވަދިނެތި ކޮޅުކޮޅު މައްޗަށް ދުވަމުން ދިޔަ ކައްކާއިން މިއަދު ފެންނާކަށް ނެތެވެ. އެ ފަޅުކަމުގެ އިޙުސާސް ކުރުވަނީ އޭގެ އެންމެ އިންތިހާއަށް ކަން މައިކަލްސަންގެ ވާހަކަތަކުން ސާފުކޮށް އެނގެއެވެ.
އަހަރަމެންނަކީ މަސައްކަތް އޮތް އިރު ވަރަށް ބުރަކޮށް އުޅުނު ބައެއް. ހަޅުތާލު ނެތް ނަމަ މިހާރުވެސް އުޅޭނީ ހަމަ އެހެން. ބައެއް ދުވަސް ދުވަހު އެބަ ކޭޓަރ ކުރަން 6 އެއް ނޫނީ 8 ޝޯއަކަށްވެސް. ހަވާއީއިން، އެލްއޭއިން ދެންވެސް އޮތް ތާކު. ކޮންމެ ޝޯއަކުން ދުވާލެއްގެ މައްޗަށް 8000 އެއްހާ ޑޮލަރު އަހަރަމެންނަށް ޖައްސާލެވޭ. އެހެންވީމަ، ބަލަމާ، ދުވާލެއްގެ މައްޗަށް އަހަރަމެންނަށް ގެއްލެމުން އެ ދަނީ ފަންސާހަކަށް، ފަސްދޮޅަސް ހާހަކަށް ޑޮލަރު.ސްޓީވް މައިކަލްސަން؛ ލައިމްލައިޓް ކޭޓަރިންގްގެ ކޯ އޯނަރެއް
ހޮލީވުޑްގެ ލިޔުންތެރިންނާއި އެކްޓަރުން ކުރިއަށް ގެންދާ ހަޅުތާލުތަކަށް ނިމުން އަންނާނެ ދުވަހެއްގެ ނިޝާންވެސް އަދި ފެންނާކަށް ނެތެވެ. ރާޖީއާއި މައިކަލްސަންގެ ޢުއްމީދުތަކުގައިވެސް މާ ބޮޑު ދިރުމެއް ނެތެވެ. އެމީހުންގެ ދިރިއުޅުމުގެ ކަންކަން މިއަދު ހަމަޖައްސަމުން ދަނީ ފަހަށް ރައްކާ ކުރި ފައިސާކޮޅު ބޭނުންކޮށްގެންނެވެ.
ހޮލީވުޑްގެ ލިޔުންތެރިން ހަޅުތާލު ފެށީ މެއި 2 ވަނަ ދުވަހު ކަމަށް ވާއިރު، އެކްޓަރުންގެ ހަޅުތާލު ކުރަން ފެށީ ޖުލައި 14 ވަނަ ދުވަހުއެވެ. ހޮލީވުޑްގެ ތާރީޚަށް ބަލާއިރު، މިއީ މިދިޔަ 63 އަހަރުގެ ތެރޭގައި، 2 ފަންނެއްގެ މަސައްކަތްތައް އެއް ވަޤުތެއްގައި މިފަދަ ގޮތަކަށް ހުއްޓުމަކަށް އައި ފުރަތަމަ ފަހަރެވެ. އެމެރިކާއާއި އެމެރިކާއިން ބޭރުގައި ކުރުމަށް ތާވަލު ކޮށްފައި ވާ އެތައް މަސައްކަތެއް މިހާރު އޮތީ މަޑުޖައްސާލާފައެވެ. ފަންނުވެރިންގެ ޑިމާންޑަކީ ފިލްމު އުފައްދާ ސްޓޫޑިއޯތަކުން ދޭ އުޖޫރަ ބޮޑުކޮށްދިނުމެވެ. އަދި ޓެކްނޮލޮޖީގެ ދުނިޔޭގައި ހަލުވިކަމާއެކު ކުރިއަރަމުން އަންނަ އަރޓިފިޝަލް އިންޓެލިޖެންސް (އޭއައި) ނުވަތަ މަސްނޫއީ ތޫނުފިލި ކަމުގެ ސަބަބުން ފަންނުވެރިންގެ މަސައްކަތަށް ކުރިމަތިވެދާނެ ނުރައްކާތަކުން ސަލާމަތްވާނެ ހުރަސްތަކެއް ޤާއިމު ކޮށްދިނުމެވެ.
