ޕްރިޔަންކާގެ ހޮލީވުޑްގެ ދެވަނަ ފިލްމުގެ ޓްރެއިލާ ދައްކާލައިފި

އަންނަ ޖޫން މަހުގެ 8 ގައި ރިލީޒްކުރާ ޕްރިޔަންކާ ޗޮޕްޅާގެ ދެވަނަ ހޮލީވުޑްގެ ފިލްމު "އަ ކިޑް ލައިކް ޖޭކް"ގެ ޓްރެއިލާ ދައްކާލައިފިއެވެ.

މި ފިލްމުގައި ޕްރިޔަންކާ ފެންނާނީ ސަޕޯޓިން ރޯލަކުންނެވެ. އެހެންކަމުން ޓްރެއިލާ އިން ވެސް އޭނާ ފެނިގެންދަނީ ތަންކޮޅެއްގައެވެ.

"އަ ކިޑް ލައިކް ޖޭކް"ގެ ޑައިރެކްޓަރަކީ ސިލާސް ހޮވާޑްއެވެ. އޭނާއަކީ އިނގިރޭސި ސީރީޒް ޓްރާންސްޕޭރެންޓް ވެސް ޑައިރެކްޓް ކުރި ފަރާތެވެ.

މި ފިލްމުން ޕްރިޔަންކާގެ އިތުރުން ފެނިގެންދާނީ ކްލެއަރ ޑޭންސް، ޖިމް ޕާސަންސް އަދި އޮކްޓަވިއާ ސްޕެންސާއެވެ.

ޕްރިޔަންކާގެ ހޮލީވުޑްގެ ތިންވަނަ ފިލްމު "އިޒިންޓް އިޓް ރޮމޭންޓިކް" ގެ ޝޫޓިން މިހާރު ނިމިފައިވާއިރު އެ ފިލްމު ދައްކާނީ އަންނަ އަހަރުގެ ފެބްރުއަރީ މަހުގެ 14 ވަނަ ދުވަހުގައެވެ. އަދި މީގެ އިތުރުން އޭނާގެ ހޮލީވުޑް ސީރީޒް "ކުއަންޓިކޯ"ގެ ތިން ވަނަ ސީޒަން މި މަހުގެ 26 އިން ފެށިގެން ދައްކަން ފަށާނެއެވެ.

"އަ ކިޑް ލައިކް ޖޭކް"ގައި ފެންނަ އެކްޓަރ ޖިމް ޕާސަންއަކީ އިންޑިއާގައި ވަރަށް ތަރުހީބު ބޮޑު އެކްޓަރެކެވެ. ހާއްސަކޮށް އޭނާގެ ސީރީޒް "ދަ ބިގް ބޭންގް ތިއަރީ" އަކީ އިންޑިއާގައި ވަރަށް މަގުބޫލު ސީރީޒްއެކެވެ.