ގާސިމްގެ މިއަދުގެ ޝަރީއަތް ކެންސަލް ކޮށްފި
16 ޖުލައި 2017 | އާދީއްތަ 08:55ބުރާސްފަތި ދުވަހު ވަނީ އެ ދައުވާގެ ލިޔެކިޔުންތައް ގާސިމްއާ ހަވާލު ކުރައްވާފަ
ގުޅިފައިވާ ސިޔާސީ ޕާޓީތަކުގެ އިސްވެރިންނާއެކު ގާސިމް އިބްރާހީމް
ޖުމްހޫރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރު ގާސިމް އިބްރާހިމްގެ ޝަރީއަތުގެ އަޑުއެހުމެއް އާދިއްތަ ދުވަހުގެ ދޭއް ޖަހާއިރަށް ކްރިމިނަލް ކޯޓްގައި ތާވަލްކުރުމަށްފަހު ކެންސަލް ކޮށްފި އެވެ.
ޝާރީއަތް ކެންސަލް ކުރީ ގާސިމް އެޑްމިޓް ކުރެއްވުމާ ގުޅިގެންނެވެ.
ޖުމްހޫރީ ޕާޓީގެ ސެކެޓްރީ ޖެނެރަލް އަހުމަދު ސަމީރު ރާއްޖެއެމްވީއަށް ވިދާޅުވީ ގާސިމް އެޑްމިޓް ކޮށްފައިވަނީ އޮފީހަށް ވަޑައިގަންނަވަނިކޮށް ބޯ އަނބުރަައި، ހޮޑުލަވާ ގޮތްވެ، އަދި ނޭވާ ކުރުވާން ފެށުމުން ކަމަށެވެ.
"އާލާސްކަންފުޅު ޖެހުނީ ކާރުކޮޅުގައި އިންނަވަނިކޮށް،" ސަމީރު ވިދާޅުވި އެވެ.
އޭރު ކާރުކޮޅު އޮތީ ބަންޑާރަ މިސްކިތް ކައިރީގައި ކަމުން އެންމެ އަވަހަށް ދެވޭ ހޮސްޕިޓަލަކަށް ގާސިމް ވަޑައިގަތީ ކަމަށް ވެސް ސަމީރު ވިދާޅުވި އެވެ.
ދައުލަތުން ގާސިމްގެ މައްޗަށް އުފުލާފައިވާ މިދައުވާގެ ޝަރީއަތުގެ އަޑުއެހުމެއް މިދިއަ ހުކުރު ދުވަހުގެ ރެއަށް ތާވަލް ކުރުމަށްފަހު، ކްރިމިނަލް ކޯޓުން ފަހުން ވަނީ އެ އަޑުއެހުން ވެސް ކެންސަލް ކޮށްފަ އެވެ.
ދައުލަތުން މީގެ ކުރިން އޭނާގެ މައްޗަށް އުފުލި ތިން ދައުވާއެއް ކޯޓުން ބާތިލް ކުރުމުން، މިދިއަ ހަފްތާގައި ކްރިމިނަލް ކޯޓަށް އަލުން ވަނީ ހުށަހަޅާފަ އެވެ. އަދި މައްސައާއި ގުޅޭ ލިޔެކިޔުންތައް ބުރާސްފަތި ދުވަހުގެ ހެނދުނު ވަނީ ގާސިމްއާއި ހަވާލުކޮށްފައެވެ. ގާސިމްގެ މައްޗަށް ދައުލަތުން ވަނީ ރިޝްވަތު ދިނުމަށް ހުށަހެޅުމާއި، ރަސްމީ ހައިސިއްޔަތުން ކުރަންޖެހޭ ކަންކަމަށް ނުފޫޒު ފޯރުވަން އުޅުމާއި، ވޯޓު ދޭން ހުރި މީހަކަށް ނުރަނގަޅު ނުފޫޒު ފޯރުވަން އުޅުމުގެ ދައުވާއެވެ.
އާދިއްތަ ދުވަހު ކްރިމިނަލް ކޯޓަށް ހާޒިރުވުމަށް ގާސިމަށް ފޮނުވާފައިވާ ކޯޓު އަމުރުގައިވާ ގޮތުން ގާސިމް ކޯޓަށް ހާޒިރު ކުރައްވަނީ ރިޝްވަތު ދިނުމަށް ހުށަހެޅި ކަމުގެ ދައުވާއާއި ގުޅިގެންނެވެ.
