މިސްކިތަށް ކުޑަކަމުދިޔަ ޒިޔާދަށް އިތުރު މައްސަލައެއްގައި ޖަލު ޙުކުމެއް
3 އޯގަސްޓު 2023 | ބުރާސްފަތި 09:21ކްރިމިނަލް ކޯޓުގައި މި މައްސަލަ ނިންމެވީ ގާޒީ އިބްރާހިމް ޛިހުނީ
ހުކުރު މިސްކިތަށާއި އިސްލާމީ މަރުކަޒަށް ކުޑަކަމު ދިޔަ މައްސަލައިގައި ކުށް ސާބިތުވި މ. ޝޭޑީހޯމް, ޙަސަން ޒިޔާދު
ހުކުރު މިސްކިތަށާއި އިސްލާމީ މަރުކަޒަށް ކުޑަކަމު ދިޔަ މައްސަލައިގައި ކުށް ސާބިތުވި މ. ޝޭޑީހޯމް, ޙަސަން ޒިޔާދުގެ މައްޗަށް އިތުރު ކުށެއް ސާބިތުވެ އޭނާ ޖަލަށްލާން ޙުކުމްކޮށްފިއެވެ.
އޭނާގެ މައްޗަށް މިފަހަރު ސާބިތުވެފައިވަނީ މުދަލަށް ގެއްލުން ދިނުމުގެ ކުށުގެ ދައުވާއެކެވެ. އެގޮތުން އެ ދައުވާކޮށްފައިވަނީ އޭނާ 22 މެއި 2022 ވަނަ ދުވަހު މާލޭގައި ހުރި ފިހާރައަކަށް ވަދެ، އެ ފިހާރަ ތެރޭގައި ހަމަނުޖެހުން ހިންގައި، އެ ފިހާރައިގެ ދޮރުގެ ބިއްލޫރިގަނޑު ތަޅާލާފައިވާތީއެވެ.
ޙަސަން ޒިޔާދު ވަނީ ދައުވާއަށް އިއުތިރާފުވެފައެވެ. އެގޮތުން ދައުވާއަށް އިއުތިރާފުވަނީ އެއްވެސް މަޖުބޫރުކަމެއް ނެތިކަމަށް އޭނާ ބުންޏެވެ.
ވުމާއެކު، މި މައްސަލައިގައި އަވަސްނިޔާގެ އަޑުއެހުމެއް ބާއްވާފައިވާއިރު، އެ އަޑުއެހުމުގައިވެސް އޭނާ ވަނީ އިއުތިރާފު ދަމަހައްޓާފައެވެ. އަދި ގާޒީ ވަނީ އޭނާގެ އިއުތިރާފަކީ ސައްޙަ އިއުތިރާފެއްކަމަށް ކަނޑައަޅުއްވައި، އޭނާގެ އިއުތިރާފުން މައްސަލަ ސާބިތުވާކަމަށް ނިންމަވާފައެވެ.
ދައުލަތުން އޭނާގެ އަދަބާ ގުޅޭގޮތުން ވާހަކަ ދައްކަމުން ބުނެފައިވަނީ މިއީ ޖުނަޙުގެ ދެވަނަ ދަރަޖައިގެ ކުށެއް ކަމަށާއި، މި ކުށަށް ކަނޑައަޅާފައިވާ އަސާސީ އަދަބަކީ 2 މަހާއި 12 ދުވަހުގެ މުއްދަތަކަށް ޖަލަށް ލުން ކަމަށެވެ.
އޭނާގެ ރެކޯޑަށް ބަލާއިރު، މީގެ ކުރިން ސާބިތުވެފައިވާ ކުށްތަކަށް ބަލައި ދައުލަތުން ވަނީ އޭނާގެ އަދަބު 2 ދަރަޖަ މަތި ކުރެވޭނެކަން ބަޔާންކޮށް، އޭރުން އަންނާނެ އަދަބަކީ 3 މަހާއި 18 ދުވަހުގެ ޖަލު ޙުކުމެއްކަމަށް ބުނެފައެވެ.
އޭގެ އިތުރުން، އަދަބާ ގުޅޭގޮތުން ޙަސަން ޒިޔާދު ބުނެފައިވަނީ އޭނާގެ އަދަބަށް ލުއި ގޮތެއް ހަދައިދިނުމަށް އެދޭ ކަމަށެވެ.
ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި، އަދި ޙަސަން ޒިޔާދު ބަންދުގައި ހޭދަކޮށްފައިވާ މުއްދަތަށް ބަލައި ގާޒީ ވަނީ އޭނާގެ މައްޗަށް 3 މަސް ދުވަހުގެ ޖަލު ޙުކުމެއް އިއްވައި އޭނާ ތަންފީޒު ކުރަން ޖެހޭނީ 2 މަހާއި 14 ދުވަހުގެ ޖަލު އަދަބެއްކަމަށް ނިންމަވާފައެވެ.
ކްރިމިނަލް ކޯޓުގައި މި މައްސަލަ ނިންމެވީ ގާޒީ އިބްރާހީމް ޛިހުނީއެވެ.
އޭނާ ވަނީ ރައީސް އޮފީސް ދޮރު މައްޗަށާއި ހުކުރު މިސްކިތަށާއި އިސްލާމީ މަރުކަޒުގެ އިތުރުން ޖުމްހޫރީ މައިދާނަށް ގަސްތުގައި ކުޑަކަމުގޮސްފައެވެ. އެ މައްސަލައިގައި އޭނާގެ މައްޗަށް އުފުލާފައިވާ އާންމު މަސްލަހަތަށް ގެއްލުންހުރި އަމަލެއްކުރުމުގެ ކުށުގެ ދެ ދައުވާ ވަނީ ސާބިތުވެފައެވެ.
