ވޯޓުފޮށި ބެހެއްޓޭނެކަން މިހާތަނަށް ކަށަވަރުވެފައިވަނީ 4 ގައުމެއްގައާއި 41 ރިސޯޓްގައި
3 އޯގަސްޓު 2023 | ބުރާސްފަތި 02:31ރާއްޖެއިން ބޭރު ގައުމުތަކުގައި ވޯޓު ފޮށި ބަހައްޓާނީ މަދުވެގެން 150 މީހުން ރަޖިސްޓްރީކޮށްފައިވާނަމަ
ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަންގެ ވޯޓުލުން
ސެޕްޓެމްބަރު މަހުގެ 9 ވަނަ ދުވަހު އޮންނަ ރިޔާސީ އިންތިޚާބުގައި ވޯޓު ފޮށި ބެހެއްޓޭނެކަން މިހާތަނަށް ޔަގީންވެފައިވަނީ ރާއްޖެއިން ބޭރު 4 ގައުމެއްގައި ކަމަށް އިލެކްޝަންސް (އީސީ)ގެ ނާއިބު ރައީސް އިސްމާއީލު ހަބީބު ވިދާޅުވެއްޖެއެވެ.
ރިޔާސީ އިންތިހާބުގައި 8 ގައުމެއްގައި ވޯޓު ފޮށި ބަހައްޓަން ވަނީ ނިންމާފައެވެ. ނަމަވެސް ވޯޓު ފޮށި ބަހައްޓާނީ އެގައުމެއްގައި މަދުވެގެން 150 މީހުން ވޯޓުލާން ރަޖިސްޓްރީވުމުންނެވެ. ހަބީބު ވިދާޅުވީ ވޯޓުފޮށި ބެހެއްޓޭކަން މިހާތަނަށް ކަށަވަރުވެފައިވާ، މެލޭޝިޔާ އާއި އިނގިރޭސި ވިލާތުގެ އިތުރުން، އިންޑިޔާގެ ޓްރިވެންޑްރަމާއި، ސްރީލަންކާގެ ކޮލަމްބޯގައި ކަމަށެވެ. ސިންގަޕޫރު، ތައިލޭންޑް، އަބޫދާބީ އަދި ޖަޕާނުގައި ވޯޓުފޮށި ބެހެއްޓޭވަރަށް ވޯޓުލާ މީހުން އަދި ރަޖިސްޓަރީ ވެފައިނުވާކަމަށް ހަބީބު ވިދާޅުވިއެވެ.
އޮންލައިންކޮށް ރަޖިސްޓްރީވުމުގެ ފުރުސަތު ހަމަވެފައިވާއިރު ފޯމު ހުށަހަޅައިގެން ރީރަޖިސްޓްރީ ކުރަން ބޭނުންވާ ފަރާތްތަކަށް އެފުރުސަތު މިމަހުގެ 5 ވަނަ ދުވަހާ ހަމައަށް އޮންނާނެއެވެ.
މީގެއިތުރުން ހަބީބު ވިދާޅުވީ ވޯޓުފޮށި ބެހެއްޓުމަށް ބޭނުންވެގެން ހުށަހެޅި 75 ރިސޯޓުގެ ތެރެއިން، އަންގާރަ ދުވަހުގެ ނިޔަލަށް 41 ރިސޯޓެއްގައި ވޯޓުފޮށި ބެހެއްޓުމަށް ބޭނުންވާ މިންވަރަށް، ރިސޯޓްތަކުގެ މުވައްޒަފުން ރަޖިސްޓަރީ ކޮށްފައިވާކަމަށެވެ. ރިސޯޓުތަކުގައި ވޯޓު ފޮށި ބަހައްޓާނީ މަދުވެގެން 30 މީހުން ވޯޓުލާން ރަޖިސްޓްރީކޮށްފައިވާ ރިސޯޓުތަކުގައެވެ.
މިއަހަރު ބާއްވާ ރިޔާސީ އިންތިޚާބުގައި 282،755 މީހުންނަށް ވޯޓުލުމުގެ ޙައްގު ލިބިފައިވާ ކަމަށް އީސީން ބުނެއެވެ. އަދި 600ށް ވުރެ ގިނަ ވޯޓު ފޮށި ބަހައްޓާނެކަމަށް އީސީން ވަނީ ބުނެފައެވެ.
