ޔުނައިޓެޑަށް ބަދަލުވުމަށް ރަސްމުސް ހޮލުންޑް މެޑިކަލް ޓެސްޓުތައް ފުރިހަމަކޮށްފި

މެންޗެސްޓަރ ޔުނައިޓެޑަށް ބަދަލުވުމުގެ ގޮތުން ފުރިހަމަ ކުރަން ޖެހޭ މެޑިކަލް ޓެސްޓުތައް ޑެންމާކުގެ ފޯވާޑް ރަސްމުސް ހޮލުންޑް ފުރިހަމަކޮށްފި އެވެ.

ކުރިއަށް އޮތް ސީޒަނަށް ޔުނައިޓެޑުގެ ފޯވާޑް ލައިން ވަރުގަދަ ކުރުމަށް އެެ ޓީމުގެ ކޯޗު އެރިކް ޓެން ހާގް ކުރަމުން އަންނަ މަސައްކަތުގެ ތެރެއިން، ހޮލުންޑަކީ އޭނާ އެންމެ ބޭނުންވި އެއް ކުޅުންތެރިޔާ އެވެ. އެކަމުގެ ތެރެއިން ޔުނައިޓެޑުން ވަނީ އެޓަލަންޓާ އާއެކު މަޝްވަރާތައްކޮށް، އޭނާ ހޯދުމުގައި އެއްބަސްވުމަށް އައިސްފަ އެވެ. މިދިޔަ އަހަރު އެޓަލަންޓާ އަށް ބަދަލުވި، އުމުރުން 20 އަހަރުގެ ކުޅުންތެރިޔާ ހޯދުމަށް ޔުނައިޓެޑުން ގާތްގަނޑަކަށް 70 މިލިއަން ޔޫރޯ ޚަރަދު ކުރާނެ ކަމަށް މީޑިއާ ރިޕޯޓުތައް ބުނެ އެވެ. ޔުނައިޓެޑުގެ މެޑިކަލް ޓެސްޓުތައް ހޮލުންޑް ފުރިހަމަ ކޮށްފައިވާއިރު، ކުރިއަށް އޮތް ވަގުތުތަކުގެ ތެރޭގައި ރަސްމީ ގޮތުން ލިޔެކިޔުންތަކުގައި އޭނާ ސޮއިކުރާނެ ކަމަށް ވެސް މީޑިއާތަކުން ބުނެ އެވެ. އެއަށްފަހު ޔުނައިޓެޑުން ހޮލުންޑްގެ ސޮއި ހޯދިކަން އެ ކުލަބުން ރަސްމީކޮށް އިއުލާން ކުރާނެ އެވެ.

ހޮލުންޑް ވަނީ އެޓަލަންޓާ އަށް ކުޅެދިން 34 މެޗުގައި 10 ލަނޑު ޖަހައިފަ އެވެ. ޑެންމާކުގެ ޤައުމީ ޓީމުން ވެސް އޭނާ އަށް ފުރުސަތު ލިބުނީ މިދިޔަ އަހަރު އެވެ. މިހާތަނަށް ޤައުމީ ޓީމަށް ކުޅެދިން ހަ މެޗުގައި އޭނާ ވަނީ ހަ ލަނޑު ޖަހައިފަ އެވެ.