އިންޓަ އޮފީސް ކެރަމް މުބާރާތް: ފިރިހެން އަދި އަންހެން ޑަބަލްސް ޗެމްޕިއަންކަން އެމްއޭސީއެލްއަށް

މިހާރު ކުރިޔަށްދާ 10 ވަނަ އިންޓަ އޮފީސް ކެރަމް މުބާރާތުގެ ފިރިހެން އަދި އަންހެން ޑަބަލްސްގެ ޗެމްޕިއަންކަން އެމްއޭސީއެލް އިން ހޯދައިފިއެވެ.

ޑަބަލްސްގެ ފައިނަލް މެޗުތައް ކުޅެފައިވަނީ ހޯމަ ދުވަހުގެ ރެއެވެ. ފިރިހެން ޑަބަލްސްގެ ޗެމްޕިއަންކަން ހޯދާފައިވަނީ އެމްއޭސީއެލްގެ ޚާތިމް ޚަލީލާއި ނައުފަލް ޝަރީފްގެ ޕެއާ ލއެވެ. މި ޕެއާ ވަނީ ފައިނަލުގައި އެމްއޭސީއެލްގެ ނާޒިމް ހަސަންއާއި އިބްރާހީމް ޝާހީންގެ ޕެއާ، 25-0ގެ ނަތީޖާއަކުން ބަލިކޮށްފައެވެ.

އަންހެން ޑަބަލްސްގެ ޗެމްޕިއަންކަން ހޯދީ އެމްއޭސީއެލްގެ ފާތިމަތު މުހައްމަދު ސައީދުއާއި ޝުމާ އަބްދުﷲ ރަފީއުގެ ޕެއާއެވެ. ފައިނަލުގައި އައިޖީއެމްއެޗްގެ ރާފިއަތު ރިޒްމާއާއި އާމިނަތު ޖުނާނާ ސައުދުﷲގެ ޕެއާއާ ވާދަކޮށް، އެމްއޭސީއެލްގެ ޕެއާ ކުރިހޯދީ 11-9ގެ ނަތީޖާއަކުންނެވެ.

ފިރިހެން ޑަބަލްސްގެ ތިންވަނަ ހޮވާ މެޗުގައި ވާދަކުރީ ޕޮލިސް ކުލަބުގެ ސައުޝާދު ޒަމީރުއާއި އަބްދުﷲ ފިރުޝާންގެ ޕެއާއާއި، އެމްއައިބީގެ ޝިފާއު އަބްދުﷲއާއި އަހުމަދު ޝަރީފް ހުސެއިންގެ ޕެއާއެވެ. މި މެޗު 20-16ގެ ނަތީޖާއަކުން ކާމިޔާބުކޮށް، ތިންވަނަ ހޯދީ ޕޮލިސް ކުލަބުގެ ޕެއާއިންނެވެ.

އަންހެން ޑަބަލްސްގެ ތިންވަނަ ލިބުނީ އެމްއައިބީގެ ނަޒީފާ އިސްމާއީލްއާއި އާއިޝަތު ޝަރާގެ ޕެއާއަށެވެ. މި ޕެއާއިން ވަނީ ތިންވަނަ ހޮވާ މެޗުގައި އެމްއޭސީއެލްގެ ފާތިމަތު ސިޔާނާއާއި އާއިޝަތު ސީމާގެ ޕެއާ، 25-1ގެ ނަތީޖާއަކުން ބަލިކޮށްފައެވެ.

12 އޮފީހަކުން ބައިވެރިވެފައިވާ މި މުބާރާތުގެ ޑަބަލްސް ބައިގައި 80އަށްވުރެ ގިނަ ކުޅުންތެރިން ވާދަކޮށްފައިވެއެވެ. މުބާރާތުގައި ދެން ކުރިޔަށްދާނީ އަންހެން އަދި ފިރިހެން ސިންގަލްސް ބައިގެ މެޗުތަކެވެ.