ވެލެންސިއާ ދޫކޮށް ކަވާނީ ބޮކާ ޖޫނިއާސް އަށް ބަދަލުވާން ނިންމައިފި

ވެލެންސިއާ އަށް ކުޅެމުން އައި އުރުގުއޭގެ އެޑިންސަން ކަވާނީ އެ ކުލަބު ދޫކޮށް، އާޖެންޓީނާގެ ބޮކާ ޖޫނިއާސް އަށް ބަދަލުވާން ނިންމައިފި އެވެ.

މެންޗެސްޓަރ ޔުނައިޓެޑުގައި ހުރުމަށްފަހު ކަވާނީ ވެލެންސިއާ އަށް ބަދަލުވީ މިދިޔަ އަހަރު އެވެެ. އެ ކުލަބާ އެކު އޭނާ ސޮއި ކުރި ދެ އަހަރު ދުވަހުގެ އެއްބަސްވުން ހަމަވާނީ 2024 ވަނަ އަހަރުގެ ޖޫން މަހުގެ ނިޔަލަށެވެ. އެހެން ނަމަވެސް، އެއްބަސްވުމުގައި ބާކީ އެއް އަހަރު އޮއްވާ ވެލެންސިއާގެ އިސްވެރިންނާއެކު މަޝްވަރާ ކުރުމަށްފަހު، މިހާރު ވަނީ އެއްބަސްވުން އުވާލަން ނިންމާފައި ކަމަށް މީޑިއާތަކުން ބުނެ އެވެ. އެހެންކަމުން ކަވާނީ ބޮކާ ޖޫނިއާސް އަށް ބަދަލުވާނީ ހިލޭ ޓްރާންސްފާއެއްގެ ދަށުންނެވެ. އެ ކުލަބަށް ބަދަލުވުމަށް މިހާރު ކަވާނީ ވަނީ އަނގަބަހުން އެއްބަސްވެފައި ކަމަށާއި، ކުރިއަށް އޮތް ދުވަސްތަކުގެ ތެރޭގައި ކުލަބާއެކު އެއްބަސްވުމުގައި ސޮއި ކުރާނެ ކަމަށް ވެސް ވަނީ ބުނެފަ އެވެ. ބޮކާ ޖޫނިއާސް އާއެކު ކަވާނީ ސޮއި ކުރާނީ އެއް އަހަރު ދުވަހުގެ އެއްބަސްވުމެއްގަ އެވެ.

ކަވާނީ ވަނީ ވެލެންސިއާގައި ހޭދަ ކުރި މުއްދަތުގައި އެކުލަބަށް 28 މެޗު ކުޅެދީ ހަތް ލަނޑު ޖަހައިފަ އެވެ. އޭގެ ކުރިން ޔުނައިޓެޑުގައި ހޭދަކުރި ދެ ސީޒަނުގައި އޭނާ ވަނީ އެ ޓީމަށް 59 މެޗުން 19 ލަނޑު ޖަހައިފަ އެވެ. ކަވާނީ އޭނާގެ ކެރިއަރުގައި މިހާތަނަށް އެންމެ ގިނަ ދުވަހު ކުޅުނީ ފްރާންސްގެ ޕެރިސް ސެއިންޓް ޖާމަން (ޕީއެސްޖީ)އަށެވެ. އެ ކުލަބުގައި އޭނާ ވަނީ ހަތް ސީޒަން ހޭދަ ކޮށްފަ އެވެ. ޕީއެސްޖީ އަށް ކުޅެދިން 301 މެޗުގައި އޭނާ ވަނީ 200 ލަނޑު ޖަހައިފަ އެވެ. އެކުލަބު ދޫކޮށްލިއިރު، ކަވާނީ އަކީ ޕީއެެސްޖީ އަށް އެންމެ ގިނަ ލަނޑު ޖަހައިދިން ކުޅުންތެރިޔާ އެވެ. ނަމަވެސް ދާދި ފަހުން ކީލިއަން އެމްބާޕޭ ވަނީ އެ ރެކޯޑު މުގުރާލައިފަ އެވެ.