ކުރިއަށް އޮތް އައު ސީޒަަނަށް ތައްޔާރުވުމުގެ ގޮތުން އައު ފޯވާޑެއް ހޯދުމަށް ކުރެވެން ހުރި ހުރިހާ މަސައްކަތެއް ކުރާނެ ކަމަށް މެންޗެސްޓަރ ޔުނައިޓެޑުގެ ކޯޗު އެރިކް ޓެން ހާގް ބުނެފި އެވެ.
ޓެން ހާގް މިހެން ބުނީ ޔުނައިޓެޑުން އައު ކުޅުންތެރިން ހޯދުމަށް ކުރަމުން އަންނަ މަސައްކަތާ ގުޅޭ ގޮތުން ވާހަކަ ދައްކަމުންނެވެ. އޭނާ ބުނީ އައު ކުޅުންތެރިޔަކު ހޯދުމުގެ މަސައްކަތުގައި ޔުނައިޓެޑުން ކުރިއެރުންތަކެއް ހޯދާފައިވާ ކަމަށާއި، ނަމަވެސް އެކަން ކުރިއަށް ދާނީ ކޮން މިސްރާބެއްގައިކަން ބުނަން ނޭންގޭ ކަމަށެވެ. އެކަން ކާމިޔާބު ކުރުމަށް ޔުނައިޓެޑަށް ލިބިގެންވާ އެންމެހައި ބާރެއްގެ ބޭނުން ކުރާނެކަން ފާހަގަކޮށް ޓެން ހާގް ބުނީ، އެކަން ވަރަށް އަވަހަށް ކާމިޔާބުވާން ވެސް ޖެހޭ ކަމަށެވެ. އިތުރަށް އޭނާ ބުނީ ފެންނަ ފެނުމުގައި ޔުނައިޓެޑަށް ކުޅުންތެރިޔަކު ހޯދޭނެ ކަމަށާއި، ނަމަވެސް ކޮންމެ މަސަައްކަތެއް ކާމިޔާބު ނުވެދާނެ ކަމަށެވެ.
ކުރިއަށް އޮތް ސީޒަނަށް ތައްޔާރުވުމުގެ ގޮތުން ޔުނައިޓެޑުން ބޭނުންވާ ކުޅުންތެރިންގެ ލިސްޓުގައި ޓޮޓެންހަމަށް ކުޅެމުން އަންނަ އިންގްލެންޑުގެ ކެޕްޓަން ހެރީ ކޭން ހިމެނޭ ކަމަށް މީޑިއާ ރިޕޯޓުތައް ބުނެ އެވެ. މީގެ އިތުރުން އިޓަލީގެ އެޓަލަންޓާ އަށް ކުޅެމުން އަންނަ ޑެންމާކުގެ ޒުވާން ފޯވާޑް ރަސްމުސް ހޮލުންޑް ހޯދުމުގެ ޝައުޤުވެރިކަން އެކުލަބުން ގެންގުޅޭ ކަމަށް ވެސް ވަނީ ބުނެފަ އެވެ. ހޮލުންޑް ހޯދުމަށް ކުރަމުން އަންނަ މަސައްކަތުގައި ޔުނައިޓެޑުން ކުރިއަށް އޮތް ދުވަސްތަކުގެ ތެރޭގައި ރަސްމީކޮށް ހުށަހަޅާނެ ކަމަށް މީޑިއާ ތަކުން ބުނެ އެވެ.
ކުރިއަށް އޮތް ސީޒަނަށް ތައްޔާރުވަމުން އަންނަ ޔުނައިޓެޑުން ވަނީ ދާދި ފަހުން ކުޅުނު ރަޙުމަތްތެރިކަމުގެ މެޗުގައި އާސެނަލް ބަލިކޮށްފަ އެވެ.
