"ރިޔާސީ އިންތިޚާބަށް ބޭނުންވާ އޮފިޝަލުން ހޯދުމުގައި އެންމެ ބޮޑަށް ދަތިކަން ދިމާވަނީ މާލެ ސަރަހައްދުން"

ރިޔާސީ އިންތިޚާބަށް ބޭނުންވާ އޮފިޝަލުން ހޯދުމުގައި އެންމެ ބޮޑަށް ދަތިކަން ދިމާވަނީ މާލެ ސަރަހައްދުން ކަމަށް އިލެކްޝަންސް ކޮމިޝަންގެ ސެކެޓްރީ ޖެނެރަލް ހަސަން ޒަކަރިއްޔާ ވިދާޅުވެއްޖެއެެވެ.

އޭނާ އެފަދައިން ވިދާޅުވީ ރާއްޖެޓީވީގެ "ފަލަ ސުރުޚީ" ޕްރޮގްރާމްގައި ވާހަކަދައްކަވަމުންނެވެ.

އޭނާ ވިދާޅުވީ އޮފިޝަލުން ލިބުމުގެ ދަތިކަން އަދިވެސް އެބަހުރި ކަމަށާއި ރިޔާސީ އިންތިޚާބަށް 6000 ވަަރަކަށް އޮފިޝަލުން ބޭނުންވާ އިރު އަދި ޔަޤީންކަމާއެކު ލިބިފައި ވަނީ 3000 ވަރަކަށް އޮފިޝަލުން ކަަމަށެވެ. އަތޮޅުތެރޭގެ ފޮށިތަކަށް ބޭނުންވާ އޮފިޝަލުންގެ ތެރެއިން ހަމަނުވެ ހުރި މަޤާމުތަކަށް އޮފިޝަލުން ހޯދުމުގެ މަސައްކަތް ކުރިއަށް ދަނީ ރަށްރަށުގައި ތިބި އީސީގެ ފޯކަލް ޕޮއިންޓްތަކުގެ އެހީތެރިކަމާއި އެކުގައި ކަމަށް ވެސް އޭނާ ވިދާޅުވިއެވެ. އެހެންކަމުން އެ ސަރަހައްދުތަކުން އޮފިޝަލުން ހޯދުމުގައި މާބޮޑު ކަންބޮޑުވުމެއް ނެތް ކަމަށް އޭނާ ވިދާޅުވިއެވެ. އަދި ރިސޯޓްތަކަށް އޮފިޝަލުން ހޯދުމުގައި ވެސް މާބޮޑު ދަތިތަކެއް ނެތް ކަމަށް އޭނާ ވިދާޅުވިއެވެ.

ރިޔާސީ އިންތިޚާބަށް ވާދަކުރުމުގެ ފުރުސަތު 23 ޖުލައިން ފެށިގެން 7 އޮގަސްޓްގެ ނިޔަލަށް ހުޅުވާލާފައިވާ ކަމަށާއި، ކުރިއަށް އޮތް ތިން ހަތަރު ދުވަހުގެ ތެރޭގައި ކެނޑިޑޭޓުންގެ ފޯމުތައް ލިބެން ފަށާނެ ކަމަށް އޭނާ ވިދާޅުވިއެވެ. އަދި ފަހު ވަގުތު ފޯމް ހުށަހެޅުމަކީ ފޯމުގައި ހުންނަ މައްސަލަތައް ރަނގަޅުކޮށްގެން އަލުން ހުށަހެޅުމަށް އޮތް ފުރުސަތު ކުޑަވާނެ ކަމެއް ކަން ފާހަގަކުރައްވާ އޭނާ ވިދާޅުވީ ވީހާވެސް އަވަހަށް ކެނޑިޑެސީ ފޯމް ހުށަހެޅުމަކީ އެންމެ އެދެވޭ ގޮތް ކަަމަށެވެ.

ފޯމް ހުށަހަޅާތާ 48 ގަޑިއިރު ތެރޭގައި އޭނާގެ ކެންޑިޑެސީއާ މެދު ނިންމާ ގޮތް އީސީން އެ މީހަކަށް އަންގަންވާނެ ކަމަށް އިންތިޚާބުތަކާއި ބެހޭ ޤާނޫނު ބުނެއެވެ. 48 ގަޑިއިރު ތެރޭގައި ވަކި އެއްޗެއް އެ ކެނޑިޑޭޓަކަށް ނާންގައިފިނަމަ އޭނާ އަކީ ކެންޑިޑޭޓެއް ކަަމަށް އޮޓޮމެޓިކުން ބެލޭނެއެވެ.