ސްމޯލް ބޯޓު އިންޖީން މެއިންޓަނަންސް ކޯސް ނިންމުމުގެ ރަސްމިއްޔާތު ބާއްވައިފި
23 ޖުލައި 2023 | އާދީއްތަ 11:23ކޯހުން ލިބިގެންދިޔަ އިލްމާއި ހުނަރުގެ ބޭނުން މުސްތަގުބަލުގައި ކުރެވިގެންދާނެކަމަށް އަދުނާން ވިދާޅުވި
ސްމޯލް ބޯޓު އިންޖީން މެއިންޓަނަންސް ކޯސް ނިންމުމުގެ ރަސްމިއްޔާތު ބާއްވައިފި
ދިވެހި ފުލުހުންގެ ޚިދުމަތާއި ޔޫ.އެން.އޯ.ޑީ.ސީ ގުޅިގެން ކުރިއަށް ގެންދިޔަ ”ސްމޯލް ބޯޓު އިންޖީން މެއިންޓަނަންސް ޓްރެއިނިންގ ކޯސް 2” ނިންމުމުގެ ރަސްމިއްޔާތު ބާއްވައިފިއެވެ.
އެ ރަސްމިއްޔާތު ޝަރަފުވެރިކޮށްދެއްވީ މެރިން ޕޮލިސްގެ ހެޑް، ޗީފް ސްޕްރިންޓެންޑެންޓް އޮފް ޕޮލިސް އިބްރާހީމް އަދުނާން އަނީސްއެވެ. މި ރަސްމިއްޔާތުގައި، ޔޫ.އެން.އޯ.ޑީ.ސީގެ ފަރާތުން ޓީމް ލީޑަރ އޮފް ދި މޯލްޑިވްސް މިސްޓަރ ދިނޭޝް ސާގަރާ ލޮކް ވަނީ ބައިވެރިވެވަޑައިގަންނަވާފައެވެ.
އެ ރަސްމިއްޔާތު ޝަރަފުވެރިކޮށްދެއްވައި އިބްރާހީމް އަދުނާން އަނީސް ދެއްކެވި ވާހަކަފުޅުގައި، ކަނޑުމަތިން އުޅަނދުގެ އިންޖީނަށް ދިމާވާ މައްސަލަތައް ހައްލުކުރުމުގެ ހުނަރާއި އުކުޅުތައް ދަސްވުމަކީ ކަނޑުމަތީގައި މަސައްކަތްކުރާ ފުލުހުންނަށް ލިބިގެންދިޔަ ފުރިހަމަ ބޭނުންތެރި ތަޖުރިބާއަކަށް ވެގެންދާނެކަމަށް ވަނީ ވިދާޅުވެފައެވެ. މީގެ އިތުރުން އަދްނާން ވަނީ މިފަދަ ކޯހެއްގެ މުހިންމުކަން ފާހަގަކުރައްވާފައެވެ. އަދި ކޯހުން ލިބިގެންދިޔަ އިލްމާއި ހުނަރުގެ ބޭނުން މުސްތަގުބަލުގައި ކުރެވިގެންދާނެކަމަށް އަދުނާން ވިދާޅުވިއެވެ.
ޖުލައި 16 އިން 20 އަށް ދިވެހި ފުލުހުންގެ ޚިދުމަތުގެ ނުވަ މުވައްޒަފުންނާއެކު ކުރިއަށް ގެންދިޔަ މި ކޯހުގައި، އުޅަނދު ގަވާއިދުން ޗެކުކުރުމުގައި ބަލަންޖެހޭ މުހިންމުކަންތައްތަކާއި އިންޖީނުތަކަށް އާންމުކޮށް ދިމާވާ މައްސަލަތަކާއި އެކަންކަން ހައްލުކުރުމަށް ކުރެވިދާނެ ކަންކަން ވަނީ ދަސްކޮށްދީފައެވެ. އޭގެ އިތުރުން، ކަނޑުމަތީގައި އިންޖީނަށް ދިމާވާ މައްސަލަތައް ހައްލުކުރުމަށް ބޭނުންކުރެވޭނެ އުކުޅުތަކާއި އިތުރަށް މައްސަލަ ގޯސްވިޔަ ނުދީ ހިކިފަސްތަނަކާ ހަމައަށް އުޅަނދު ގެންދިއުމަށް ކުރަންޖެހޭ އަދި ކުރެވިދާނެ ކަންކަމާ ގުޅޭގޮތުން މައުލޫމާތު ހިއްސާކޮށްފައިވެއެވެ.
