ފުލަމްގެ ކޯޗު މާކޯ ސިލްވާ ހޯދުމަށް ސައުދީ ޕްރޯ ލީގުގެ އަލް އަހްލީ އިން މަސައްކަތް ފަށައިފި އެވެ.

އުމުރުން 46 އަހަރުގެ ސިލްވާ ހޯދުމުގެ މަސައްކަތުގެ ތެރެއިން އަލް އަހްލީ އިން މިހާރު ވަނީ ރަސްމީ ބިޑެއް ވެސް ހުށަހަޅައިފަ އެވެ. މީޑިއާތަކުގައި އެ ވާހަކަ ރިޕޯޓުކޮށްފައި ވަނިކޮށް، ސިލްވާ ވަނީ އެކަން ކަށަވަރު ކޮށްދީފަ އެވެ. އޭނާ ބުނީ، އަލް އަހްލީގެ ފަރާތުން އޭނާ އަށް އައު ހުށަހެޅުމެއް ލިބިފައިވާ ކަމަށެވެ. ނަމަވެސް އެ ހުށަހެޅުން ޤަބޫލު ކުރާނެ ކަމެއް ނުވަތަ ނޫން ކަމެއް ޔަގީންކޮށްދޭން މިވަގުތު އުނދަގޫ ކަމަށް އޭނާ ވަނީ ބުނެފަ އެވެ. އޭނާ ބުނީ ފުލަމްގެ ކޯޗުކަމާ ހަވާލުވީ ދުވަހުން ފެށިގެން މިއަދާ ހަމައަށް ދައްކައިދީފައި ވާނީ އެ ކުލަބަށް އޮތް ލޯތްބާއި، މަަސައްކަތަށް އޮތް އިހުތިރާމް ކަމަށެވެ. ސިލްވާ ބުނީ ކޮންމެ ގޮތެއް އޭނާ ނިންމި ނަމަވެސް، އެކަން ނިންމާނީ ފުލަމްގެ އިސްވެރިންނާ ބައްދަލުކޮށް ވާހަކަ ދެއްކުމަށް ފަހު ކަމަށެވެ. އަލް އަހްލީ އިން ސިލްވާ އަށް ހުށަހަޅާފައި ވަނީ ދެ އަހަރު ދުވަހުގެ އެއްބަސްވުމެއް ކަމަށް މީޑިއާތަކުން ބުނެ އެވެ. އެއީ މުސާރައިގެ ގޮތުގައި 40 މިލިއަން ޔޫރޯ ލިބޭ ހުށަހެޅުމެއް ކަމަށް ވެސް ވަނީ ބުނެފަ އެވެ.

ޕޯޗުގަލަށް ނިސްބަތްވާ ސިލްވާ އޭނާގެ ކޯޗިން ކެރިއަރު ފެށީ 2011 ވަނަ އަހަރު އެވެ. އޭގެ ފަހުން މިހާތަނަށް އައިއިރު، ފުލަމް އަކީ އޭނާ އިރުޝާދު ދޭ ހަތް ވަނަ ކުލަބެވެ. އޭނާ އިރުޝާދު ދިން ކުލަބުތަކުގެ ތެރޭގައި ޕޯޗުގަލްގެ އެސްޓޮރިލް، ސްޕޯޓިން، ގްރީކްގެ އޮލިމްޕިއާކޯސް، އިންގްލެންޑުގެ ހަލް ސިޓީ، ވަޓްފޯޑު އަދި އެވަޓަން ހިމެނެ އެވެ. އެވަޓަންގެ ކޯޗުކަމުން އޭނާ ވަކިކޮށްފައި ވަނީ 2019 ވަނަ އަހަރު އެވެ. އޭގެ ފަހުން ފުލަމްއާ ހަވާލުވީ 2021 ވަނަ އަހަރު އެވެ. އޭނާގެ އިރުޝާދުގެ ދަށުން ފުލަމް ވަނީ މިހާތަނަށް 94 މެޗު ކުޅެފަ އެވެ. އޭގެ ތެރެއިން އެ ޓީމު ވަނީ 47 މެޗުން މޮޅުވެ، 29 މެޗުން ބަލިވެފަ އެވެ. 18 މެޗެއް ނިމުނީ އެއްވަރުވެގެންނެވެ.