ތިން ރަށެއްގައި ކުޅިވަރު ވަސީލަތްތައް ޤާއިމްކުރުމުގެ މަސައްކަތް ހަވާލުކޮށްފި
ފޮނަދުއާއު ބާރަށުގައި ތަރައްޤީކުރާނީ ޔޫތު އެންޑް ކޮމިއުނިޓީ ސެންޓަރެއް
އެއްބަސްވުމުގައި ސޮއިކުރުމުގެ ތެރެއިން
ތިން ރަށެއްގައި ކުޅިވަރު ވަސީލަތްތައް ޤާއިމްކުރުމުގެ މަސައްކަތް ކުރުމަށް ހަވާލުކޮށް ޔޫތު މިނިސްޓްރީން ކޮންޓްރެކްޓަރުންނާއެކު ސޮއިކޮށްފިއެވެ.
ބުރާސްފަތި ދުވަހު ޔޫތު މިނިސްޓްރީން ސޮއިކޮށްފައިވަނީ ލ.ފޮނަދޫ އަދި ބާރަށު ޔޫތު އެންޑް ކޮމިއުނިޓީ ސެންޓަރު ތަރައްޤީކުރުމުގެ މަސައްކަތާއި ފޮއްދޫ އައުޓްޑޯ ވޮލީކޯޓް ތަރައްޤީކުރުމުގެ މަސައްކަތުގެ އެއްބަސްވުމުގައެވެ.
ފޮނަދޫ އަދި ބާރަށުގެ ޔޫތު އެންޑް ކޮމިއުނިޓީ ސެންޓަރު ތަރައްޤީކުރުމުގެ މަސައްކަތް ހަވާލުކޮށްފައިވަނީ ލައިކަންސް އިންވެސްޓްމަންޓާއެވެ. އޭގެތެރެއިން ފޮނަދޫ ޔޫތު ސެންޓަރުގެ މަސައްކަތުގެ އަގަކީ ހަތަރު މިލިއަން ހަތަރު ލައްކަ ހަތަރުހާސް ހަސަތޭކަ ނުވަދިހަ ފަސްރުފިޔާ ހަތްލާރި އެވެ. އަދި ބާރަށު ޔޫތު ސެންޓަރުގެ މަސައްކަތުގެ އަގަކީ ހަތަރުމިލިއަން ހަލައްކަ ދެހާސް ހަސަތޭކަ ފަންސާސް ނުވަރުފިޔާ ހަތްލާރިއެވެ. ދެ މަސައްްކަތް ވެސް ނިންމުމުގެ މުއްދަތަކީ 110 ދުވަހެވެ. މި އެއްބަސްވުމުގައި ޔޫތު މިނިސްޓްރީގެ ފަރާތުން ސޮއިކުރެއްވީ، ޑެޕިއުޓީ މިނިސްޓަރ މުޙައްމަދު އަޒްމީލްއެވެ. އަދި ލައިކަންސް އިންވެސްޓްމަންޓުގެ ފަރާތުން ސޮއިކުރެއްވީ އެ ކުންފުނީގެ ވެރިފަރާތް އަބްދުﷲ ކަލީމްއެވެ.
ފޮއްދޫ ވޮލީ ކޯޓުގެ މަސައްކަތް ހަވާލުކޮށްފައިވަނީ މެކްސްޓަރ މޯލްޑިވްސް އާއެވެ. 55 ދުވަހުން ނިންމަން ޖެހޭ މި މަސައްކަތުގެ އަގަކީ އެއްމިލިއަން ތިންލައްކަ ފަސްދޮޅަސް ފަސްހާސް ނުވަސަތޭކަ ސާޅީސް ހަތަރު ރުފިޔާ އަށްޑިހަ ހަލާރިއެވެ. މި އެއްބަސްވުމުގައި ޔޫތު މިނިސްޓްރީގެ ފަރާތުން ސޮއިކުރެއްވީ، ޕަރމަނަންޓް ސެކެރެޓަރީ ހުސައިން ޝަރީފެވެ. އަދި މެކްސްޓަރ މޯލްޑިވްސްގެ ފަރާތުން ސޮއިކުރެއްވީ އެ ކުންފުނީގެ ލޮޖިސްޓިކް ސުޕަރވައިޒަރ އަބްދުﷲ އިބްރާހިމްއެވެ.
ޔޫތު މިނިސްޓްރީން މިދިޔަ އަންގާރަ ދުވަހުވެސް ވަނީ ތިން ރަށެއްގައި ކުޅިވަރު ވަސީލަތްތައް ޤާއިމްކުރުމަށް ކޮންޓްރެކްޓަރުންނާއެކު ސޮއިކޮށްފައެވެ.
