ދަ ޑިމޮކްރަޓްސް އިން ރިޔާސީ ޕްރައިމަރީއަށް ހުޅުވާލައިފި

ކުރިޔަށް އޮތް ރިޔާސީ އިންތިޚާބުގައި ވާދަކުރާނެ ކެންޑިޑޭޓަކު ކަނޑައެޅުމަށް ދަ ޑިމޮކްރަޓްސް އިން ރިޔާސީ ޕްރައިމަރީ އަށް ހުޅުވާލައިފިއެވެ.

އެޕާޓީން ބުނީ ޕްރައިމަރީ އޮންނާނީ ޖުލައި 28 ވާ ހުކުރު ދުވަހުގެ މެންދުރު 2ން އިރުއޮއްސި 6 ޖެހުމާ ހަމައަށްކަމަށެވެ. ޑިމޮކްރެޓުން ރިޔާސީ ޕްރައިމަރީގައި ވާދަކުރުމަށް ބޭނުންވާ ފަރާތްތަކަށް ކުރިމަތިލުމަށް ފުރުސަތު ހުޅުވާލާފައިވަނީ 22 ޖުލައިވާ ހޮނިހިރު ދުވަހުގެ ހަވީރު 4:00ގެ ނިޔަލަށެވެ. ޕްރައިމަރީގައި ވޯޓުލެވޭނީ ރިޔާސީ ޕްރައިމަރީ އަށް ހުޅުވާލުމާ ހަމައަށް ޕާޓީގެ މެންބަރަކަށް ވުމަށް އެދި ޕާޓީއަށް ފޯމު ހުށަހަޅާފައިވާ ލިސްޓަށެވެ.

ޕްރައިމަރީއަށް ހުޅުވާލުމާއެކު ހުޅުދޫ ދާއިރާގެ މެންބަރު އިލްޔާސް ލަބީބް ވަނީ ޕްރައިމަރީގައި ވާދަކުރައްވާނެ ކަން އިއުލާންކުރައްވާފައެވެ. ޑިމޮކްރެޓުންގެ ރިޔާސީ ޓިކެޓުގައި ރިޔާސީ އިންތިޚާބުގައި ރައީސް މުހައްމަދު ނަޝީދު ވާދަކުރައްވާނެކަމަށް ކުރިން ބެލެވުނުނަމަވެސް އިދިކޮޅު ފަރާތްތަކުން ބޭއްވި ބައްދަލުވުމަށްފަހު ނޫސްވެރިންނާ ވާހަކަފުޅުދައްކަވަމުން ނަޝީދު ވިދާޅުވެފައިވަނީ ޑިމޮކްރެޓްސްގެ ރިޔާސީ ޓިކެޓަށް ޝައުގުވެރިކަން ނެތް ކަމަށެވެ.

ސެޕްޓެމްބަރު މަހުގެ 9 ވަނަ ދުވަހު އޮންނަ ރިޔާސީ އިންތިޚާބުގައި ވާދަކުރަން ބޭނުންވާ ކެންޑިޑޭޓުންނަށް އެކަމަށް އެދި ޖުލައި 23 ވަނަ ދުވަހު އިލެކްޝަންސް ކޮމިޝަނުން ހުޅުވާލާނެއެވެ. އަދި އޮގަސްޓް 7 އާ ހަމައަށް އެފުރުސަތު އޮންނާނެއެވެ.