މޫސާ ޑިއާބީ ހޯދުމަށް އަލް ނަސްރުން ދެވަނަ ބިޑެއް ކޮށްފި

ޖަރުމަނު ލީގުގެ ބަޔާ ލެވަކޫސަނަށް ކުޅެމުން އަންނަ ފްރާންސްގެ ވިންގް ކަމަށްވާ މޫސާ ޑިއާބީ ހޯދުމަށް ސައުދީ ޕްރޯ ލީގުގެ އަލް ނަސްރުން ދެވަނަ ބިޑެއް ކޮށްފައިވާ ކަމަށް ރިޕޯޓުތައް ބުނެފިއެވެ.

ޑިއާބީ ހޯދުމުގެ ޝައުގުވެރިކަން ފާޅުކޮށް އަލް ނަސްރުން ކުރި ފުރަތަމަ ބިޑު ލެވަކޫސަނުން ވަނީ އަނބުރައި ފޮނުވާލާފައެވެ. އެހެން ނަމަވެސް، އިތުރު ކުރިއެރުންތަކާއެކު އަލް ނަސްރުން ވަނީ މި ހަފުތާތެރޭގައި ދެވަނަ ބިޑެއް ހުށަހަޅާފައި ކަމަށް ރިޕޯޓުތައް ބުނެއެވެ. އަލް ނަސްރުގެ އިތުރުން އިނގިރޭސި ޕްރިމިއާ ލީގުގެ އެސްޓަން ވިލާއިންވެސް އަންނަނީ އޭނާ ހޯދުމުގެ މަސައްކަތް ކުރަމުންނެވެ. ޑިއާބީ ވަނީ އެސްޓަން ވިލާއަށް ފެހި ސިގްނަލެއް ދީފައި ކަމަށާއި، އެހެންކަމުން އަލް ނަސްރުން އަންނަނީ އޭނާ ހޯދުމަށް އިތުރަށް ބާރުއަޅަމުން ކަމަށްވެސް ވަނީ ބުނެފައެވެ. އޭގެ ތެރޭގައި ޑިއާބީއަށް ބޮޑު މުސާރައެއް ދިނުމަށް އެ ކުލަބުން ހުށަހަޅާފައިވާކަމަށް ރިޕޯޓުތައް ބުނި ނަމަވެސް، އަގު ހާމަކޮށްފައެއް ނުވެއެވެ.

މީގެ ކުރިން ޑިއާބީއަށް ވަނީ ޕްރިމިއާ ލީގުގެ ކުލަބެއްގެ ހުށަހެޅުން ލިބިފައެވެ. ޕްރިމިއާ ލީގުގެ ނިއުކާސަލް ޔުނައިޓެޑުން ޑިއާބީ ހޯދުމަށް 50 މިލިއަން ޕައުންޑުގެ އަގަކަށް ތައްޔާރުވި ނަމަވެސް، ލެވަކޫސަނުން ވަނީ އޭނާގެ އަގު 75 މިލިއަން ޕައުންޑަށް މަތިކޮށްފައެވެ. އެ އަގަށް އެއްބަސްނުވެވުމުގެ ސަބަބުން ނިއުކާސަލްއަށް އޭނާ ހޯދޭ ގޮތް ވަނީ ނުވެފައެވެ.

ޑިއާބީ ލެވަކޫސަނަށް ބަދަލުވީ 2019 ވަނަ އަހަރުއެވެ. އޭގެ ފަހުން އޭނާ ވަނީ އެ ކުލަބަށް ކުޅެދިން 172 މެޗުގައި 49 ލަނޑު ޖަހާފައެވެ. ނިމުނު ސީޒަނުގައި ޑިއާބީ ވަނީ ލެވަކޫސަންގައި މޮޅު ކުޅުމެއް ދައްކާފައެވެ. މީގެ ކުރިން އޭނާ ވަނީ ފްރާންސް ލީގުގެ ޕެރިސް ސެއިންޓް ޖާމަން (ޕީއެސްޖީ)އަށް ވެސް ކުޅެދީފައެވެ.