ކީޕަރު އޮނާނާ ޔުނައިޓެޑަށް ވިއްކާލައިފި، އަގަކީ 47 މިލިއަން ޕައުންޑް

އިންޓަމިލާނުން އެކުލަބުގެ ކެމަރޫން ކީޕަރު އަންދްރޭ އޮނާނާ މެންޗެސްޓާ ޔުނައިޓެޑަށް ވިއްކާލައިފި އެވެ.

ކެމަރޫނުގެ ކީޕަރަށް ޔުނައިޓެޑުން މިލާނަށް ދީފައިވަނީ 43.7 މިލިއަން ޕައުންޑެވެ. އަދި އިތުރު މާލީ އިނާޔަތްތަކުގެ ގޮތުގައި ކުރިއަށް އޮތް ދުވަސްތަކުގައި 3.4 މިލިއަން ޕައުންޑް ވެސް މިލާނަށް ލިބޭނެ އެވެ.

ޔުނައިޓެޑާ ގުޅުމަށް އޮނާނާ މިހާރު މެޑިކަލް ޓެސްޓްތައް ހަދާފައިވާ ކަމަށް ރިޕޯޓްތައް ބުނެ އެވެ. އަދި މެންޗެސްޓާ އަށް ދަތުރުކުރުމަށް މިލާނުގެ އެއާޕޯޓަށް އޮނާނާ ގޮސް ހުއްޓައި މީޑިއާތަކުން ވަނީ ރިޕޯޓްކޮށްފަ އެވެ.

ނޫސްވެރިން ސުވާލު ކުރުމުން އޭނާ ބުނީ މެންޗެސްޓާ ޔުނައިޓެޑާއި ހާއްސަކޮށް ޕްރެމިއާ ލީގުގައި ކުޅުމަކީ ދޫކޮށްނުލެވޭނެ ފުރުސަތެއް ކަމަށެވެ.

ޔުނައިޓެޑުން އައު ކީޕަރަކު ހޯދަނީ އެ ޓީމުގައި ފާއިތުވެދިޔަ 10 އަހަރު ކުޅުނު ކީޕަރު ސްޕޭނުގެ ޑޭވިޑް ޑެހަޔާ ކުލަބު ދޫކޮށްލުމުންނެވެ. ޔުނައިޓެޑާއި އޭނާއާ ދެމެދު އެއްބަސްވުމަކަށް ނާދެވުނީ ދެ ފަރާތުން ބޭނުންވި ކަންކަން ފުރިހަމަ ކުރަން ދެ ފަރާތަށް ވެސް ދަތިވުމުންނެވެ.

އިންޓައިން އޮނާނާ ދޫކޮށްލުމަށްފަހު މަސައްކަތް ކުރަމުންދަނީ ބަޔާން މިއުނިކްގެ ސޯމާ އާއި ސެވިއްޔާގެ ޔާސީން ބޫނޫ ގަތުމަށެވެ.