އދން ސީރިޔާއަށް ކަނޑައަޅުއްވާފައި ހުންނަވާ މަންދޫބު ނޮވެމްބަރު މަހު އިސްތިއުފާ ދެއްވަނީ
17 އޮކްޓޯބަރު 2018 | ބުދަ 18:05މިސްޗޫރާ މަގާމުން ވަކިވެ ވަޑައިގަންނަވާނީ ނޮވެމްބަރު މަސް ނިމުމުން
ސްޓެފަން ޑި މިސްޗޫރާ މަގާމާ ހަވާލުވެވަޑައިގެންނެވީ ޖުލައި 2014 ގައި
އދން ސީރިޔާއަށް ކަނޑައަޅުއްވާފައިވާ ހުންނަވާ ޚާއްސަ މަންދޫބު، ސްޓެފަން ޑި މިސްޗޫރާ ހަތަރު އަހަރަށް ވުރެ ގިނަ ދުވަހަށް ފަހު، ނޮވެމްބަރު މަސް ނިމުމުން މަގާމުން އިސްތިއުފާދެެއްވާކަން އިއުލާނު ކުރައްވައިފިއެވެ.
އިޓަލީއާ ސްވިޑެންގެ ރައްވެހިކަން އޮންނަ ޑިޕްލޮމޭޓް، އދން ސީރިޔާއަށް ކަނޑައެޅުއްވި ތިންވަނަ މަންދޫބުގެ ގޮތުގައި އެ މަގާމާ ހަވާލުވެވަޑައިގެންނެވީ ޖުލައި 2014 ގައެވެ.
އދގެ ސަލާމަތީ މަޖިލީހުގައި ބުދަ ދުވަހު ވާހަކަ ދައްކަވަމުން އޭނާ ވިދާޅުވީ އިސްތިއުފާ ދެއްވަނީ ސީދާ އަމިއްލަ ސަބަބުތަކަކާ ހުރެ ކަމަށެވެ.
އޭނާ ވިދާޅުވީ ހަވާލުކުރެވުނު މެންޑޭޓުގެ އެންމެ ފަހު ދުވަހުގެ އެންމެ ފަހު ގަޑިއާ ޖެހެންދެން މަސައްކަތް ހުއްޓަވާ ނުލައްވާ ކަމަށެވެ.
ޑި މިސްޗޫރާ ވިދާޅުވީ އަންނަ މަހު އޭނާ އިސްތިއުފާ ދެއްވުމުގެ ކުރިން، ހަނގުރާމައިގެ ސަބަބުން ވީރާނާވެފައިވާ ސީރިޔާގައި ގާނޫނު އަސާސީއެއް ޑްރާފްޓް ކުރާނެ ކޮމިޓީއެއް އެކުލަވާލުމަށް އެއްބަސްވުމަކަށް އާދެވޭތޯ މަސައްކަތް ކުރައްވާނެ ކަމަށެވެ.
ސީރިޔާގެ ސަރުކާރުގެ ދެކޮޅުހެދުމާއެކު ކޮމިޓީ އެކުލަވާލުމުގެ މަސައްކަތް އަދިވެސް އޮތީ ހުއްޓިފައި ކަމަށް އޭނާ ވިދާޅުވިއެވެ.
އޭނާވަނީ ސަރުކާރުގެ 50 މެމްބަރުން އަދި އިދިކޮޅު ފަރާތްތައް ހިމެނޭގޮތަށް ކޮމިޓީހެދުމަށް ސަރުކާރުން ވެފައިވާ އެއްބަސްވުމާ ސަރުކާރުން ދެކޮޅުކަމަށް ވިދާޅުވެފައެވެ.
މިސްޗޫރާވަނީ އެ ކޮމިޓީ އުފެއްދުމަށް މަޝްވަރާ ކުރުމަށް އަންނަ ހަފްތާގައި ދިމިޝްގަށް ވަޑައިގަންނަވާނެ ކަމަށް ވިދާޅުވެފައެވެ.
