ދައުލަތަކީ ރައްޔިތުން ކޮންޓްރޯލްކުރާ އެއްޗެއް، ވެރިކަން ވެއްޓެނީ: ނާޒިމް
15 ޖުލައި 2017 | ހޮނިހިރު 04:55އަދުލު އިންސާފާ ނުލައި ތަރައްޤީއެއް ކުރިއަކަށް ނުދާނެ
މަޑަވެލީ ދާއިރާގެ ކުރީގެ މެމްބަރު މުހައްމަދު ނާޒިމް
ވެރިކަން ފެށެނީ ވެސް އަދި ދެމި އޮންނާނީ ވެސް ރައްޔިތުންގެ ކިބައިން ކަމަށްވާއިރު ދައުލަތަކީ ރައްޔިތުން ކޮންޓްރޯލް ކުރާ އެއްޗެއް ކަމަށް މަޑަވެލީ ދާއިރާގެ ކުރީގެ މެމްބަރު މުހައްމަދު ނާޒިމް ވިދާޅުވެއްޖެއެވެ.
ތިނަދޫގައި ހުކުރު ދުވަހުގެ ރޭ ބޭއްވި "ރައްޔިތުންގެ ބަދަލު" ޖަލްސާގައި ވާހަކަ ދައްކަވަމުން ނާޒިމް ވިދާޅުވީ ޤާނޫނު އަސާސީ ދަންނަ ގޮތުން ވެރިކަމުގެ އެންމެ ބާރު އޮތީ ރައްޔިތުންގެ އަތް މަތީގައި ކަމަށާއި ވެރިކަން ފެށިގެން އަންނަނީ ވެސް ރައްޔިތުންނާ ހިސާބުން ކަމަށާއި ވެރިކަން ނިމިގެންދާނީ ވެސް ރައްޔިތުންނާ ހިސާބުން ކަމަށެވެ.
އެހެންކަމުން ޤާނޫނު އަސާސީ ނެތިކުރުމަކީ ސުޕްރީމް ކޯޓަށް އޮތް ބާރެއް ނޫން ކަމަށާއި ސުޕްރީމްކޯޓަށް އޮތް ހަމައެކަނި ބާރަކީ ދުސްތޫރީ މައްސަލައެއްގައި ކަންކަމުގެ ރައުޔު ނެރުން ކަމަށްވާއިރު އެއީ ގޯސް ނިންމުމެއް ނަމަ އެކަން ވެސް ބަދަލު ކުރުމުގެ ބާރު އޮތީ ރައްޔިތުންގެ މަޖިލީހަށް ކަމަށް ވެސް އޭނާ ވިދާޅުވިއެވެ.
ނާޒިމް ވިދާޅުވީ ޤާނޫނު އަސާސީގައި މިހުރިހާ ކަމެއް ވެސް ލިޔެ ބަޔާންކޮށްފައިވާއިރު މިއީ އެއްވެސް ބަހުސް ކުރަން ޖެހޭ ކަމެއް އޮތް ކަމެއް ނޫން ކަމަށެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހާ ދެކޮޅަށް ރާއްޖޭގެ ތާރީހުގައި މަޖިލިޙުގެ ރައީސްކަން ކުރެއްވި ގިނަ ބޭފުޅުން މިދަނީ ނޫނެކޭ ބުނަމުން ކަމަށާއި އެމަނިފާނު ރައްޔިތުންނާ މެދު ކިރިޔާ ވެސް ވިސްނަވާލައްވާ ނަމަ މިހާރު މަޤާމުން އިސްތިއުފާ ދެއްވާނެ ކަމަށް ވެސް ވިދާޅުވިއެވެ.
ޤާނޫނު އަސާސީ އުލު ބައިންދަން އުއްތަމަ ފަނޑިޔާރު އެކުރައްވާ މަސައްކަތަކީ ބަލައިގަންނާނެ ކަމެއް ނޫން ކަމަށާއި އުއްތަމަ ފަނޑިޔާރަކީ އެއިރު ވެސް މިހާރު ވެސް ކަމުދާ ބޭފުޅެއް ނޫން ކަމަށް ނާޒިމް ވިދާޅުވިއެވެ.
"ރާއްޖެއަށް ތަރައްޤީއެއް ވެސް އެހެން ކަންތައް ވެސް އަދުލު އިންސާފާ ނުލައި ކުރިއަކަށް ނުދާނެ. ނިޒާމުން ބޭރުން ވުދޫޖުގައި ނެތް ކަމެއް ހިފައިގެން ގޮސް ޤާނޫނު އަސާސީ އިސްލާޙް ކުރިތަން ފެނިގެން މިދިޔައީ،" ނާޒިމް އިތުރަށް ވިދާޅުވިއެވެ.
މިހެން ނެރޭ ކިތަންމެ ކަމަން ރައީސް ޔާމިންއަށް ލިބޭ ނިކަމެތިކަން އިތުރުވެގެންދާނެ ކަމަށް ވިދާޅުވަމުން ރައީސް ޔާމިން ވެރިކަމަށް މިއަދު މިއޮތީ ފެއިލްވެފައި ކަމަށް އޭނާ ވިދާޅުވިއެވެ.
