ކޮވިޑްގައި ވިލާ ކުންފުނިން މުވައްޒަފުން ނިކަމެތި ކުރި: ކޮޅުފުށި ކައުންސިލްގެ ރައީސް
15 ޖުލައި 2023 | ހޮނިހިރު 09:57ވިލާ ކުންފުނިން މުއައްޒަފުން ދެބައިކުޅަ އެއްބަޔަށް މަދުކުރި
މ.ކޮޅުފުށި ކައުންސިލްގެ ރައީސް އަބްދުލްއަލީމް ވާހަކަދައްކަވަނީ
ކޮވިޑް-19ގައި ވިލާ ކުންފުނިން މުވައްޒަފުން ނިކަމެތި ކުރި ނަމަވެސް ރައީސް އިބްރާހިމް މުހައްމަދު ޞާލިހު ދިވެހި ރައްޔިތުން ބިކަވިޔަނުދީ، ގައުމު ހިންގެވި ކަމަށް މ.ކޮޅުފުށި ކައުންސިލްގެ ރައީސް އަބްދުލްއަލީމް ވިދާޅުވެއްޖެއެވެ.
ހޮނިހިރު ދުވަހު މ.ކޮޅުފުށީގައި ބޭއްވި ކެމްޕޭން ޖަލްސާގައި އަބްދުލްއަލީމް ވިދާޅުވީ ކޮވިޑް-19އާއެކު ވިލާ ކުންފުނިން މުއައްޒަފުން ދެބައިކުޅަ އެއްބަޔަށް މަދުކޮށް، މުއައްޒަފުންގެ އެލަވަންސްތައް ކަނޑާލައި، އަސާސީ މުސާރަ ކުޑަކުރި ކަމަށެވެ. ނަމަވެސް ރައީސް ޞާލިހު ރައްޔިތުންނަށްޓަކައި ކާޑުގެ ބާވަތްތައް އަގުހެޔޮކޮށް، ވާޒީފާ ގެއްލުނު މީހުންނަށް ޚާއްސަ އެލަވަންސެއް ދިން ކަމަށެވެ. އަދި ގޭގައި އާމްދަނީ ހޯދުމަށް މަސައްކަތް ކުރި މީހުންނަށް އެލަވަންސްދިން ކަމަށް އޭނާ ވިދާޅުވިއެވެ.
އަބްދުލްއަލީމް ވިދާޅުވީ ރައީސް ޞާލިހު ކޮވިޑް-19އާއެކު ވެސް ރައްޔިތުންނަށް ފުދުންތެރި ދިރިއުޅުމެއް ހޯއްދަވާދެއްވި ކަމަށެވެ. ނަމަވެސް ރައްޔިތުންނާއި ދެރޭގައި ނުވިސްނަވާ ވެރިއަކު ހުންނެވިނަމަ ދިވެހިން ބިކަވެގެންދާނެ ކަަމަށް އޭނާ ވިދާޅުވިއެވެ.
ކޮޅުފުށީ ތަރައްގީއަށް އިޝާރާތް ކުރައްވައި އަބްދުލްއަލީމް ވިދާޅުވީ ރައީސް ޞާލިހުގެ ވެރިކަމުގައި އެރަށުގެ ތަރައްގީގެ އެކިއެކި މަޝްރޫއުތަކަށް 300 މިލިއަން ރުފިޔާ ހޭދަކޮށްފައިވާ ކަމަށާއި، ރައްޔިތުން ބޭނުންވާ ތަރައްގީ ގެނެސްދިން ކަމަށެވެ. މި ދައުރުގައި 13 މަޝްރޫއެއް ކުރިއަށް ގެންދެވިފައިވާކަން އޭނާ ފާހަގަކުރެއްވިއެވެ.
އަބްދުއްއަލީމް ވިދާޅުވީ 2018 ވަނަ އަހަރުގެ ތެރޭގައި ކުރީގެ ރައީސް އަބްދުﷲ ޔާމީން އެރަށަށް ވަޑައިގަންނަވާ ދެއްކެވި ވާހަކަފުޅުތަކުން ރައްޔިތުން މާޔޫސްވި ކަމަށެވެ. ރަށުގެ އާމްދަނީ 2000ށް ވުރެ މަދުވުމުގެ ސަބަބުން ތަރައްގީގެ މަޝްރޫއުތައް ކުރިއަށް ގެންދާނެކަމުގެ އެއްވެސް އުންމީދީ ޚަބަރެއް ނުދެއްވި ކަމަށް އަބްދުއްއަލީމް ވިދާޅުވިއެވެ.
އަބްދުއްއަލީމް ވިދާޅުވީ މިވެރިކަމުގައި ލާމަރުކަޒީ ނިޒާމު ތަންފީޒުވެގެން ދިއުމަކީ ރަށަށް ލިބުނު ވަރަށް ބޮޑު ކުރިއެރުމެއް ކަމަށެވެ. އެކަމުގެ ސަބަބުން އެރަށަށް ވަންނަ އާމްދަނީ މާލެއަށް ޖަމާކުރުމުގެ ބަދަލުގައި ރަށުގައި އާމްދަނީ ހިފެހެއްޓި ރަށުގެ ތަރައްގީއަށް ބޭނުންކުރުމުގެ މަގުފަހިވެގެންދާ ކަމަށް އޭނާ ވިދާޅުވިއެވެ. އަދި ވިދާޅުވީ މިސަރުކާރަކީ ރައްޔިތުންނަށް ބާރު ދިން ސަރުކާރެއް ކަމަށާއި، ތަރައްގީއާއި ތަހުޒީބަށް ވާސިލްވުމަށް ބޭނުންވާނަމަ ރައީސް ސާލިހަށް ދެވަނަ ދައުރެއް ދޭން ޖެހޭ ކަމަށެވެ.
