36 އަހަރު ފަހުން އެމްޕީއެލް ރީ-ބްރޭންޑްކޮށްފި
14 ޖުލައި 2023 | ހުކުރު 03:57މިހާތަނަށް ބޭނުން ކުރަމުން އައީ 27 އަހަރުވެފައިވާ ލޯގޯއެއް
އެމްޕީއެލްގެ އައު ލޯގޯ
36 އަހަރަށްފަހު މޯލްޑިވްސް ޕޯޓްސް ލިމިޓެޑް (އެމްޕީއެލް) ރީ ބްރޭންޑް ކޮށްފިއެވެ.
އެ ކުންފުނިން މި ބަދަލު ގެނެސްފައިވަނީ ބުރާސްފަތި ދުވަހުގެ ރޭ ބޭއްވި ސްޓާފް ނައިޓުގައެވެ. އެގޮތުން، ކުންފުނި ރީ ބްރޭންޑްކޮށް، އައު ލޯގޯ އާއި ކުލަ ވަނީ ރަސްމީކޮށް އިފްތިތާހުކޮށްފައެވެ.
މިއީ އެމްޕީއެލްގެ 36 އަހަރުގެ ތާރީހުގައި އެ ކުންފުނި ރީ ބްރޭންޑް ކުރި ފުރަތަމަ ފަހަރެވެ. އެ ކުންފުނިން މިހާތަނަށް ބޭނުން ކުރަމުން އައި ލޯގޯ އަކީ މޯލްޑިވްސް ޕޯޓްސް އޮތޯރިޓީގެ ނަމުގައި އެ ކުންފުނި ހިންގަމުން އައި އިރުވެސް ބޭނުން ކުރަމުންއައި ލޯގޯއެވެ. އެ ކުންފުނި ކޯ ޕްރައިވަޓައިޒްކޮށް ސަރުކާރު 100 އިންސައްތަ ހިއްސާ އޮންނަ ކުންފުންޏަކަށް ހެދީ 2008 ވަނަ އަހަރުއެވެ.
ބުރާސްފަތި ދުވަހުގެ ރޭ ބޭއްވި ހަފްލާގައި އެމްޕީއެލްގެ ސީއީއޯ ޝާހިދު އަލީ ވިދާޅުވީ އެ ކުންފުނި ޕްރައިވަޓައިޒްކުރިތާ 27 އަހަރުވެފައިވާއިރު އޭރު ބޭނުން ކުރަން ފެށި ލޯގޯ ބަދަލުކޮށް ކުންފުނި ރީބްރޭންޑް ކުރީ ޕޯޓުގެ ޙިދުމަތް ޒަމާނީ ކުރުމަށް ކުރަމުން އަންނަ މަސައްކަތުގެ ބައެއްގެ ގޮތުގައި ކަމަށެވެ. އެގޮތުން، ޕޯޓުގެ ޚިދުމަތްތަކަށް ކުރިއެރުން ލިބިއްޖެ ކަމަށާއި ގިނަ ޚިދުމަތްތައް ޑިޖިޓަލައިޒް ކުރެވިފައިވާއިރު މިހާތަނަށް ކުންފުނީގެ ބްރޭންޑް އިމޭޖް އަދި ބްރޭންޑިންއެއް ހެދުމަށް އެއްވެސް މަސައްކަތެއް ކޮށްފައި ނެތްކަން އޭނާ ފާހަގަކުރެއްވިއެވެ.
މީގެ އިތުރުން ޒަމާނީ ކޯޕަރޭޓް މާހައުލެއްގައި ޕޯޓުގެ ޚިދުމަތް ފުޅާކުރުމުގެ ޕްލޭންތަކާއެކު މަސައްކަތް ކުރާއިރު ކުންފުނީގެ ބްރޭންޑް އިމޭޖް ވެސް ޒަމާނީ ވާން ޖެހޭނެ ކަމަށް ޝާހިދު ވިދާޅުވިއެވެ. އަދި ފާއިތުވި ހަތަރު އަހަރު ދުވަހުގެ ތެރޭގައި އެމްޕީއެލްގެ ހިންގުން ހަރުދަނާކޮށް، ކޯޕަރޭޓް ގަވަރނަންސް ރަނގަޅުކުރުމަށް ގިނަ މަސައްކަތްތަކެއް ކުރެވިފައިވާކަން ވެސް އޭނާ ފާހަގަކުރެއްވިއެވެ.
އެމްޕީއެލް އިން މައުލޫމާތު ދޭ ގޮތުގައި ރީ ބްރޭންޑިންއާއެކު އެ ކުންފުނިން ގެނައި އެންމެ މުހިންމު އެއް ބަދަލަކީ ޕޯޓު އޮޕަރޭޝަންސްގެ އެކި ދާއިރާތަކާ ގުޅޭގޮތަށް ޔުނީފޯމް ތައްޔާރު ކުރުމެވެ. އެގޮތުން، ޒަމާނީ ޕޯޓުތަކުގައި މިހާރު ބޭނުން ކުރަމުންދާގޮތަށް ޕޯޓު އޮޕަރޭޝަންގައި މަސައްކަތްކުރާ މުވައްޒަފުންނަށް މިހާރު ވަކިން ވެސްޓް ލާން ނުޖެހޭނެ ކަމަށާއި އައު ޔުނީފޯމުގައި ހައި ވިޒިބިލިޓީ ފަށްތައް ހިމަނާފައިވާކަން އެ ކުންފުނިން ފާހަގަކުރިއެވެ.
