ކުރީގެ ރައީސް އަބްދުﷲ ޔާމީނަށް ކުރާ ދައުވާގެ އަޑުއެހުންތައް އަވަަހަށް ކުރިއަށް ގެންދާތީވެސް، އިދިކޮޅު ބައެއް ފަރާތްތަކުން ކަންބޮޑުވާހެން ހީވެއެވެ.

ސަބަބަކީ މި މައްސަލައިގެ އަޑުއެހުންތައް ގާތް ގާތުގައި ތާވަލު ކުރަމުންދާ ވާހަކައާއި، މައްސަލަ އަވަސް އަރުވާލައިގެން ނިންމުމަށް މަސައްކަތް ކުރަމުންދާ ވާހަކަ، އެކި ސިޔާސީ ޕޯޑިއަމްތަކާއި ނޫސްވެރިންގެ ބައްދަލުވުންތަކުގައި ނުރުހުންވެ ތިއްބަވައި ދައްކަވަމުން ގެންދަވާތީއެވެ.

އެހެންނަމަވެސް ހަގީގަތަކީ ފުއްގިރި މައްސަލައަކީ އިއްޔެއަކު ނުވަތަ މިއަދަކު ހުށަހެޅިފައިވާ މައްސަލައެއް ނޫނެވެ.

ފުއްގިރި ހިޔާނާތުގެ މައްސަލާގައި ކުރީގެ ރައީސް އަބްދުﷲ ޔާމީނުގެ މައްޗަށް ދައުވާ އުފުލީ 2020 ވަނަ އަހަރުއެވެ. އެ މައްސަލައަށް މިހާރު 3 އަހަރުވާން ދާއިރު، މައްސަލާގައި އަދި ކިރިޔާ ހެކިބަސް ނަގަން ފަށައިގަނެވުނީއެވެ. އަދިވެސް ދައުލަތުގެ ހެކިންގެ ހެކިބަސްތައް ނެގުން އެބައޮތެވެ. ދިފާއީ ހެކިންގެ ހެކިބަސްވެސް އަދި އޮންނާނެތާއެވެ.

ވ. އާރަށު ހިޔާނާތުގެ މައްސަލާގައި ޔާމީނުގެ މައްޗަށް 11 އަހަރުގެ ޖަލު ހުކުމެއް އިއްވިގެންދިޔައިރުވެސް، ފުއްގިރި މައްސަލަ އޮތީ މަޑުޖެހިފައެވެ. މިހާރު އެހެން ގާޒީއެއް މައްސަލަ ބައްލަވަން ހަވާލުވެވަޑައިގެން، އަވަހަށް މައްސަލަ ނިންމެވުމަށްޓަކައި އަޑުއެހުންތައް ގެންދަނީ ތާވަލު ކުރައްވަމުންނެވެ.

ފުއްގިރި މައްސަލަ ކުރިއަށް ނުދާތީއާއި، އެ މައްސަލައިގެ އަޑުއެހުންތައް ލަސްވަމުންދާތީ، ހުދު އިދިކޮޅު ފަރާތްތަކުންނާއި ޔާމީނުގެ ވަކީލުންވެސް އެކި މަހައްލުތަކުގައި ވާހަކަ ދައްކަވާފައި ތިއްބެވީ މަދަކުން ނޫނެވެ. ސުވާލަކީ އިއްޔެ މި މައްސަލަ އަވަސްކޮށް ގެންދަވަން ބޭނުންވެ، މިއަދު މި މައްސަލަ ލަސް ކުރައްވަން އެދިވަޑައިގަންނަވާ ސަބަބަކީ ކޮބައިބާއެވެ؟

ޔާމީނަކީ މިވަގުތު އޮތް އިދިކޮޅު އެންމެ ބޮޑު ޕާޓީގެ ލީޑަރެވެ. ޔާމީނުގެ މައްޗަށް ދައުވާއެއް އުފުލާފައިވާނަމަ، އެމަނިކުފާނަށްވެސް އެންމެ މަސްލަހަތު އޮތް ގޮތަކަށްވާނީ މައްސަލަ އަވަހަށް ކުރިއަށް ދިއުމެވެ. އިދިކޮޅު ލީޑަރުގެ ހައިސިއްޔަތުން ބޮޑެތި ޖިނާއީ ދައުވާތަކެއް އިސްތަށިފުޅުގައި އަޅުއްވައިގެން ހުންނެވުމަށް އެމަނިިކުފާނަށްވެސް ފަސޭހަފުޅެއް ނުވާނެއެވެ.

ނުވިތާކަށް، އިދިކޮޅު ފަރާތްތަކުން އެ އެދޭ ގޮތަށް ޔާމީނުގެ މައުސޫމުކަން ސާބިތުކޮށްދީ، އެއީ ޔާމީނު ނުކުރައްވާ ކުށެއްނަމަ އެ ކުށަކުން ބަރީއަވުމުގެ ފުރުސަތުވެސް ލިބިވަޑައިގަންނަވާނީ މި މައްސަލަތަކުގެ އަޑުއެހުންތައް އަވަހަށް ކުރިއަށް ގެންދެވިގެންނެވެ. އެއީ ކޮންމެ ކޯޓެއްގައި އޮތް މައްސަލައެއް ކަމުގައިވިޔަސް އެކަން އޮތީ އެހެންނެވެ.

އޭގެ އިތުރުން، މި މައްސަލާގައި ޔާމީނާއި ދައުލަތުންވެސް، އަދި މި މައްސަލާގައި ދެން ދައުވާ އުފުލާފައިވާ ފަރާތްތަކުގެ މަސްލަހަތުވެސް އެންމެ ފުރިހަމައަށް ރައްކާތެރި ކޮށްދެވޭނީ މި މައްސަލަތައް އަވަހަށް ނިމިގެންނެވެ. ނުވިތާކަށް ދައުލަތާއި ދިފާއުންވެސް ޝަފަހީ ހެކިން ހުށަހަޅާފައިވާއިރު، ދައުވާ ހުށަހަޅާތާ އެތައް އަހަރެއް ފަހުން އަޑުއެހުންތައް ބޭއްވުމަކީ ހެކިވެރިންގެ ހެކިބަހަށްވެސް އޭގެ ސަބަބުން އަސަރުކުރުވާ ކަމެއްކަން މިއީ މި ރާއްޖޭގެ ޝަރުއީ ނިޒާމުން ފެންނަން އޮތް ހަގީގަތެކެވެ.

ރ. ފުއްގިރި ކޮރަޕްޝަން މައްސަލައަކީ ފުލުހުންނާއި އެސެޓް ރިކަވަރީ ކޮމިޝަންގެ އިތުރުން އެންޓި ކޮރަޕްޝަން ކޮމިޝަން (އޭސީސީ)ން ތަހުގީގުކުރި މައްސަލައެކެވެ. މި މައްސަލާގައި އެ މަނިކުފާނުގެ މައްޗަށް އުފުލާފައިވަނީ ރިޝްވަތު ގަބޫލުކުރުމުގެ ދައުވާއަކާއި މަނީ ލޯންޑަރިންގެ ދައުވާއެކެވެ.