އިންނަމާދޫ ގޮނޑުދޮށް ހިމާޔަތްކުރަން ފެށުމަށް ތައްޔާރުވެއްޖެ
13 ޖުލައި 2023 | ބުރާސްފަތި 02:04މި އެއްބަސްވުމުގެ ދަށުން އިންނަމާދޫގެ ގޮނޑުދޮށް ހިމާޔަތް ކުރުމަށް 360 މީޓަރުގެ ސަރަހައްދެއްގައި ގްރޮއިންސް ޖަހާނެ
އިންނަމާދޫ ގޮނޑުދޮށް ހިމާޔަތްކުރުމުގެ މަޝްރޫޢު ފެށުމަށް ބޭނުންވާ މެޝިނަރީ ގެންދަނީ
ރ. އިންނަމާދޫ ގޮނޑުދޮށް ހިމާޔަތް ކުރުމުގެ މަޝްރޫޢުގެ އަަމަލީ މަސައްކަތްފެށުމަށް އެމަސައްކަތް ހަވާލުވެފައިވާ އެމްޓީސީސީން ތައްޔާރުވެއްޖެއެވެ.
އެމްޓީސީސީން ބުނީ އެމަސައްކަތްކުރާ ޓީމާއި މެޝިނަރީ ޖުލައި 11 ވަނަ ދުވަހު ސައިޓަށް ގެންގޮސްފައިވާކަމަށެވެ. މިމަސައްކަތްކުރުމަށް އެމްޓީސީސީ އާއެކު ޕްލޭނިންގ މިނިސްޓްރީން ސޮއިކޮށްފައިވަނީ 2022 ވަނަ އަހަރުގެ އޮކްޓޯބަރު މަހުގެ 31 ވަނަ ދުވަހުއެވެ.
މި އެއްބަސްވުމުގެ ދަށުން އިންނަމާދޫގެ ގޮނޑުދޮށް ހިމާޔަތް ކުރުމަށް 360 މީޓަރުގެ ސަރަހައްދެއްގައި ގްރޮއިންސް ޖަހާނެއެވެ. އަދި މަޝްރޫއުގެ އަމަލީ މަސައްކަތް ފެށުމުގެ ކުރިން އެ މަސައްކަތަށް ބޭނުންވާ އެންވަޔަރަމެންޓަލް އިމްޕެކްޓް އެސެސްމަންޓް (އީއައިއޭ) އެމްޓީސީސީން ހަދަންޖެހެއެވެ.
މި މަޝްރޫއު އެމްޓީސީސީއާ ހަވާލު ކޮށްފައިވަނީ 15،660،758 (ފަނަރަ މިލިއަން ހަ ލައްކަ ފަސްދޮޅަސް ހާސް ހަތްސަތޭކަ ފަންސާސް އަށެއް) ރުފިޔާ އަށެވެ. މި މަސައްކަތް އެ ކުންފުންޏާ ހަވާލުކޮށްފައިވަނީ 220 ދުވަހުގެ ތެރޭގައި ނިންމާ ގޮތަށެވެ.
