ސަރުކާރުގެ އިދާރާތަކުގެ ޖަވާބުތަކުން އެކަން ކުރި މީހުން ހިމާޔަތްކުރަން އުޅޭކަން އެނގޭ: ޔާމީން ބައްޕަ
ވޭތުވެދިޔަ ދެ މަސްދުވަހަކީ އޭނާ އާއި އޭނާގެ އާއިލާއަށް ކުރިމަތިވި އެންމެ ހިތްދަތި ދުވަސްތައް
ޔާމީން ރަޝީދުގެ ބައްޕަ، ހުސައިން ރަޝީދު
ގެއްލުވާލާފައިވާ ނޫސްވެރިޔާ އަހްމަދު ރިލްވާން އާއި މަރާލާފައިވާ ބްލޮގަރ ޔާމީން ރަޝީދުގެ އާއިލާތަކަށް ދިވެހި ރާއްޖޭގެ ސަރުކާރުން ދެމުންދާ ޖަވާބުތަކުން، އެކަން ކުރި މީހުން ސަލާމަތްކުރުމަށް ސަރުކާރުން އަމަލީ ގޮތުން މަސައްކަތްކުރާ ކަން އެނގިގެންދާ ކަމަށް ޔާމީން ރަޝީދުގެ ބައްޕަ، ހުސައިން ރަޝީދު ބުނެފިއެވެ.
މިހާރު ޖެނީވާގައި ކުރިއަށްދާ އިންސާނީ ހައްގުތަކާ ބެހޭ ސަމިޓްގައި ވާހަކަދައްކަމުން، ހުސައިން ރަޝީދު ބުނީ ވޭތުވެދިޔަ ދެ މަސްދުވަހަކީ އޭނާ އާއި އޭނާގެ އާއިލާއަށް ކުރިމަތިވި އެންމެ ހިތްދަތި ދުވަސްތައް ކަމަށެވެ.
ޔާމީން މަރަށް އިންސާފު ހޯދަން ޖެހޭ ކަމަށާއި އެކަން ކުރެވޭނީ ބައިނަލްއަގްވާމީ މިނިވަން އިންސާފުވެރި ތަހުގީގެއްގެ ތެރެއިންކަން ހުސައިން ރަޝީދު ފާހަގަކުރިއެވެ. ރާއްޖޭގައި އިންސާފެއް ނެތް ކަމަށާއި ވޭތުވެދިޔަ އަހަރުތަކުގައި ހިނގި އެތަށް އަނިޔާވެރި މަރުގެ ހާދިސާތައް ފުރިހަމައަށް ތަހުގީގުކުރެވިފައި ނުވާ ކަމަށް ވެސް އޭނާ ބުނެފައިވެއެވެ. އަދި، ޔާމީން އަށް އައި އިންޒާރުތައް ތަހުގީގުކުރުމަށް ވެސް ދައުލަތުގެ މުއައްސަސާތަކުން ނުކުޅެދިފައިވާ ކަމަށް ވެސް ޔާމީންގެ ބައްޕަ ވަނީ ބުނެފައެވެ.
"ރިލްވާން ގެއްލުވާލުމުގެ ހަގީގަތް ހޯދުމަށް ޔާމީން ކެނޑިނޭޅި ދިޔައީ މަސައްކަތް ކުރަމުން. އޭނާގެ އަޑު މިހާރު ވަނީ ކަނޑުވާލާފަ. ބައިނަލްއަގްވާމީ ތަހުގީގީ ޖަމާއަތްތަކުން ޔާމީންގެ މަރުގެ ތަހުގީގަށް ސަމާލުވުމަކީ މުހިއްމު ކަމެއް. ރާއްޖޭގައި މިނިވަން ހިޔާލަށް އަންނަ ހަމަލާތައް ހުއްޓުވުމާއި، ޔާމީން އާއި ޔާމީން ފަދަ އެހެން ފަރާތްތަކަށް އިންސާފު ހޯދުމުގައި ބޭރުގެ ފަރާތްތަކުގެ އަމަލީ އެއްބާރުލުން ބޭނުންވޭ،" ޔާމީން ބައްޕަ އދގެ އިންސާނީ ހައްގުތަކާއި ބެހޭ ސަމިޓަށް އިއްވި ކުރު ބަޔާނުގައި ބުނެފައިވެއެވެ.
ޔާމީންގެ މަރަށް 50 ދުވަހަށް ވުރެ ގިނަ ދުވަސްވެފައިވާ އިރު، ހަ މީހަކު ހައްޔަރުކޮށްފައިވާ ކަމަށް ފުލުހުން ބުނެފައިވެެއެވެ. ޔާމީންގެ މަރާއި ރިލްވާން ގެއްލުވާލުމާއި ގުޅިގެން މަޖިލިހަށް ހުށަހެޅި މައްސަލަތައް މަޖިލިހުން ވަނީ ބޭރުކޮށްލާފައެވެ. އަދި، ޔާމީންގެ މަރަށް އިންސާފުވެރި ތަހުގީގެއް ކުރުމަށް ގޮވާލާ ފުލުހުންނަށް ހުށަހެޅި އެތަށް ސަތޭކަ ސިޓީތަކެއް ފުލުހުން ވަނީ ބޭރުކޮށްލާފައެވެ.
