ފަތުރުވެރިކަމުގެ ދާއިރާއަށް ދަރިވަރުން ހޭލުންތެރިކުރުވުމުގެ ޕްރޮގްރާމްތަކެއް އޮގަސްޓް މަހު މުޅި ރާއްޖޭގައި ހިންގަނީ
މާލޭގެ އިތުރުން ހުރިހާ އަތޮޅެއްގައިވެސް މި ޕްރޮގްރާމް ކުރިޔަށްގެންދިޔުމަށް ހަމަޖެހިފައިވޭ
ރިސޯޓެއްގެ މުވައްޒަފުންތަކެއް
ސްކޫލް ދަރިވަރުން ފަތުރުވެރިކަމުގެ ދާއިރާއަށް ހޭލުންތެރިކުރުވުމަށް ޚާއްސަ ޕްރޮގްރާމްތަކެއް އޮގަސްޓް މަހުގެ ތެރޭގައި މުޅި ރާއްޖޭގައި ކުރިޔަށް ގެންދިޔުމަށް ހަމަޖެހިފައިވާކަމަށް ޓުއަރިޒަމް މިނިސްޓްރީގެ ޕާމަނަންޓް ސެކެޓްރީ (ޕީއެސް) ފާތުމަތު ނިލްފާ ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ޓުއަރިޒަމް މިނިސްޓްރީން މިއަހަރު ކުރުމަށް ރާވާފައިވާ ކަންކަމާއި ގުޅޭގޮތުން ވާހަކަދައްކަވަމުން ނިލްފާ ވިދާޅުވީ މި ޕްރޮގްރާމް ކުރިޔަށްގެންދިޔުމަށް ހަމަޖެހިފައިވަނީ އޮގަސްޓްމަހުގެ ހުރިހާ ހަފްތާތަކަކަށް ބަހާލައިގެންކަމަށެވެ. މި ޕްރޮގްރާމް އަމާޒުކުރަނީ ގްރޭޑް 8،9 އަދި 10 ގެ ދަރިވަރުންނަށްކަމަށް ނިލްފާ ވިދާޅުވިއެވެ.
ޓުއަރިޒަމް މިނިސްޓްރީގެ ޕީއެސް އިތުރަށް ވިދާޅުވީ މި ޕްރޮގްރާމްގައި ސްކޫލް ނިމިގެން ވަޒީފާގެ މާހައުލަށް ކުދިން ނުކުންނައިރު އެކުދިންނަށް ފަތުރުވެރިކަމުގެ ދާއިރާއިން ލިބެން ހުންނަ ފުރުސަތުތަކުގެ މައުލޫމާތު ދޭނެކަމަށެވެ. މާލޭގެ އިތުރުން ހުރިހާ އަތޮޅެއްގައިވެސް މި ޕްރޮގްރާމް ކުރިޔަށްގެންދިޔުމަށް ހަމަޖެހިފައިވާކަމަށް އޭނާ ވިދާޅުވިއެވެ.
ނިލްފާ ވިދާޅުވީ މި ޕްރޮގްރާމްގައި ބައިވެރިވާނީ ހަމައެކަނި ދަރިވަރުން ނޫންކަމަށެވެ. ބެލެނިވެރިންނާއި ޓީޗަރުންނާއި ޑަބްލިޔުޑީސީ އާއި ސްކޫލް ޕީޓީއޭގެ އިތުރުން ކައުންސިލުންވެސް ބައިވެރިވާނެކަމަށް ނިލްފާ ވިދާޅުވިއެވެ.
ސެޝަންތައް ނެގުމަށް މިނިސްޓްރީގެ ޓީމުތައް ރަށްރަށަށް ދާއިރު އެރަށަކާއި އެންމެ ކައިރީގައި އޮންނަ ރިސޯޓަކުން ނުވަތަ ޓުއަރިސްޓް ފެސިލިޓީއަކުންވެސް ކަމާ ގުޅޭ މީހުން ބައިވެރިވެ މައުލޫމާތުތައް ދޭނެކަމަށް ނިލްފާ ވިދާޅުވިއެވެ. އެގޮތުން އިންޑަސްޓްރީގައި ހުރި ފުރުސަތުތަކާއި ކުރިމަތިވާނެ ގޮންޖެހުންތަކާއި އެފަދަ މައުލޫމާތުތައް ހިއްސާކުރާނެކަމަށް އޭނާ ވިދާޅުވިއެވެ.
