ދިވެހިން އެންމެ ގިނައިން ހިޖުރަކުރަނީ ތައުލީމު ހޯދުމަށް
11 ޖުލައި 2023 | އަންގާރަ 13:23ރާއްޖޭގައި އާންމުކޮށް ދިރިއުޅޭ ދިވެހިންގެ ތެރެއިން 46 އިންސައްތަ މީހުންނަކީ އުމުރުގެ ކޮންމެވެސް ހިސާބެއްގައި ހިޖުރަކޮށްފައިވާ މީހުން
އައިޔޫއެމްގެ ގްރެޖުއޭޝަން
ދިވެހިންގެ ތެރެއިން ހިޖުރަކޮށްފައިވާ އާބާދީއަށް ބަލާއިރު ގިނަ މީހުން ހިޖުރަކޮށްފައިވަނީ ތައުލީމު ހޯދުމަށްކަމަށް ބޯހިމެނުމުގެ ރިޕޯޓުގައި ބުނެފިއެވެ.
ދުނިޔޭގެ އާބާދީގެ ދުވަހުގެ މުނާސަބަތުގައި އަންގާރަ ދުވަހު ބޭއްވި ރަސްމިއްޔާތުގައި ވަނީ މިދިޔަ އަހަރު ރާއްޖޭގައި ކުރިޔަށްގެންދިޔަ ބޯހިމެނުމުގެ ރިޕޯޓް ނެރެފައެވެ.
ބޯހިމެނުމުގައި ހިޖުރަކޮށްފައިވާ މީހުންކަމަށް ކަނޑައަޅާފައިވަނީ އެމީހަކު އާންމުކޮށް ދިރިއުޅޭ ރަށް ނޫން އެހެން ރަށެއް ނުވަތަ ގައުމެއްގައި 1 އަހަރު ނުވަތަ އެއަށްވުރެ ގިނަ ދުވަހު އުޅެފައިވާނަމައެވެ. ނުވަތަ އެއް އަހަރާއި އެއަށްވުރެ ގިނަ ދުވަހު ދިރިއުޅެން ގަސްތުކޮށްގެން އެތަނެއްގައި ދިރިއުޅެމުން ގެންދާނަމައެވެ.
ބޯހިމެނުގެ ތަފާސްހިސާބުން ދައްކާގޮތުގައި ރާއްޖޭގައި އާންމުކޮށް ދިރިއުޅޭ ދިވެހިންގެ ތެރެއިން 46 އިންސައްތަ މީހުންނަކީ އުމުރުގެ ކޮންމެވެސް ހިސާބެއްގައި ހިޖުރަކޮށްފައިވާ މީހުންނެވެ. ހިޖުރަކޮށްފައިވާ މީހުންގެ ތެރެއިން 40 އިންސައްތައަކީ އުމުރުން 25 އަހަރާއި 39 އަހަރާ ދެމެދުގެ މީހުންނެވެ.
ދިވެހިން ހިޖުރަކުރާ މައިގަނޑު ސަބަބެއްގެ ގޮތުގައި ބޯހިމެނުމުން ހާމަވެފައިވަނީ ތައުލީމު ހޯދުމެވެ. އެގޮތުން 20 އިންސައްތަ މީހުން ތައުލީމު ހޯދުމަށް ހިޖުރަކޮށްފައިވާއިރު ވަޒީފާ ހޯދުމަށް 19 އިންސައްތަ އަދި އާއިލާ ހިޖުރަކުރުމުން އާއިލާއާއެކު ދިރިއުޅުމަށް 19 އިންސައްތަ މީހުން ހިޖުރަކޮށްފައިވެއެވެ.
މާލެއަށް ގިނަ މީހުން ހިޖުރަކޮށްފައިވަނީ ތައުލީމު ހޯދުމަށެވެ. އެއީ 37 އިންސައްތަ މީހުންނެވެ. އާއިލާ ހިޖުރަކުރުމުން އާއިލާ އާއެކު ދިރިއުޅުމަށް މާލެއަށް 21 އިންސައްތަ މީހުން ހިޖުރަކުރިއިރު ވަޒީފާ އަދާކުރުމަށް މާލެ އަށް 14 އިންސައްތަ މީހުން ހިޖުރަކޮށްފައިވެއެވެ.
މައިގަނޑު ގޮތެއްގައި އަތޮޅުތެރެއަށް މީހުން ހިޖުރަކޮށްފައިވަނީ ރަށުގައި އެނބުރި ދިރިއުޅުމަށެވެ. ދެން އެންމެ ގިނަ މީހުން އަތޮޅުތެރެއަށް ހިޖުރަކޮށްފައިވަނީ އާއިލާއާއެކު ދިރިއުޅުމަށެވެ. ދެން ކައިވެންޏާ ގުޅިގެންނެވެ.
ބޯހިމެނުމުގެ ނަތީޖާ ދައްކާގޮތުގައި ރާއްޖޭގައި މިވަގުތު ދިރިއުޅޭ އާބާދީ އަކީ 515،132 އެވެ.
