ޗެލްސީ އަށް ބޭނުންވަނީ 40 މިލިއަން، އިންޓައިން ހުށަހަޅަނީ 30 މިލިއަން
11 ޖުލައި 2023 | އަންގާރަ 02:25ޗެލްސީ އަށް ކުޅެން އޭނާ ބޭނުމެއްނުވޭ
ލުކާކޫ
ޗެލްސީގެ ފޯވަޑް ރޮމެލޫ ލުކާކޫ ވިއްކާލުމަށް އެކުލަބުން ކިޔާ އަގަކީ އިންޓަމިލާނުން ހުށަހަޅާފައިވާ އަގަށްވުރެ 10 މިލިއަން ބޮޑު އަދަދަކަށް ވެއްޖެ އެވެ.
ބެލްޖިއަމްގެ ފޯވަޑް އަލުން ދާއިމީ ކުރުމަށް އިންޓަމިލާނުން ހުށަހަޅާފައިވަނީ 30 މިލިއަން ޕައުންޑެވެ. ނަމަވެސް ޗެލްސީން ގަދަ ދައްކަމުންދަނީ މި އަގު 40 މިލިއަން ޕައުންޑަށް އިތުރުކުރުމަށެވެ.
މީގެ ދެ އަހަރު ކުރިން އިންޓަމިލާނަށް 100 މިލިއަން ޕައުންޑް ދީފައި ޗެލްސީން ގަތް ފޯވަޑް މިދިޔަ ސީޒަނުގައި ކުޅުނީ އިންޓަމިލާނަށެވެ. އަދި އޭނާ ހުރީ އެނބުރި ޗެލްސީ އަށް ނުދާން ނިންމައިގެންނެވެ. ސަބަބަކީ އޭނާ އަށް އެކުލަބުގައި ކުރިއެރުން ނުލިބި މައްސަލަޖެހި އަލުން އެނބުރި އިންޓައަށް އަންނަން ޖެހުމުންނެވެ.
އިންޓަމިލާނުގެ އަގު މަތިނުކުރާނަމަ ޗެލްސީން ލުކާކޫ ޔުވެންޓަސް ނުވަތަ އޭސީ މިލާނަށް ވިއްކާލުން ގާތެވެ. އެ ދެކުލަބުން ދަނީ ލުކާކޫގެ ޓްރާންސްފާ ހިނގާގޮތް ބަލަމުންނެވެ.
ޗެލްސީގެ އައު ކޯޗު މައުރީސިއޯ ޕޮޗެޓީނޯ ބުނެފައިވަނީ މި މަހުގެ 18 ވަނަ ދުވަހު ޕްރެކްޓިސް ފަށާއިރު ޗެލްސީގެ ކުޅުންތެރިއެއްކަން ގަބޫލުކުރާނަމަ އޭނާގެ އޮފީހަށް ލުކާކޫ އަންނަންޖެހޭނެ ކަމަށް ބުނެފަ އެވެ. ނަމަވެސް މިގޮތަށް ލުކާކޫ އަމަލުނުކުރާނެ ކަމަށްވެ އެވެ.
