އައިސީޔޫއިން ނެރުމަށްފަހު ރިކޯ، "އަހަރެން ވަރަށް ނަސީބު ރަނގަޅު"

އެކްސިޑެންޓެއްވެ, ބޮލަށް އަނިޔާވުމުގެ ސަބަބުން އައިސީޔޫގައި ފަރުވާދިން، ޕީއެސްޖީގެ ކީޕަރު، ސާޖިއޯ ރިކޯ އައިސީޔޫއިން ނެރެފިއެވެ.

އައިސީޔޫއިން ނެރުމުން ރިކޯ ބުނީ އޭނާއަކީ ވަރަށް ނަސީބު ރަނގަޅު މީހެއް ކަމަށެވެ. އިންސްޓަގްރާމް މެދުވެރިކޮށް ކުރި ޕޯސްޓެއްގައި އޭނާ ވަނީ، އޭނާއަށް އެހީތެރިވެ ހިތްވަރުދިން އެންމެންނަށް ޝުކުރު އަދާކޮށްފައެވެ. އަދި އޭނާ ބުނީ، ހާލު ރަނގަޅުވަމުން އަންނަކަމަށެވެ.

މެއި މަހު 28 ވަނަ ދުވަހު ސްޕެއިންގައި ހިނގި އެކްސިޑެންޓަކާ ގުޅިގެން އުމުރުން 29 އަހަރުގެ ރިކޯ ވަނީ ކޯމާއަކަށް ގޮސްފައެވެ. ބުދަ ދުވަހު އައިސީޔޫއިން ނެރުމަށްފަހު އޭނާއަށް އިތުރު ފަރުވާދެމުން ދަނީ ސެވިއްޔާގެ ހޮސްޕިޓަލެއްގެ ވޯޑުގައެވެ.

2019 ވަނަ އަހަރު ލޯނު އެއްބަސްވުމެއްގެ ދަށުން ޕީއެސްޖީއާ ގުޅުނު ރިކޯ ވަނީ ޖެހިގެން އައި އަހަރު ޕީއެސްޖީއާއެކު ދާއިމީ އެއްބަސްވުމެއްގައި ސޮއިކޮށްފައެވެ. އޭގެ ކުރިން 2018-2019 ވަނަ ސީޒަން އޭނާ ހޭދަކުރީ ލޯނު އެއްބަސްވުމެއްގެ ދަށުން، ފުލަމްއާއެކުއެވެ.

މެއި މަހު ހިނގި މި ހާދިސާ ހިނގިއިރު އޭނާގެ އާއިލާއިން ބުނީ އެ ހާދިސާ ހިނގީ ބާރަށް ދުއްވާފައި ދިޔަ އަސްގާޑިޔަލަކުން ޖެހިގެން ކަމަށެވެ.