އޭޝިޔަން ސާފިންގ ޗެމްޕިއަންޝިޕް: ހުސައިން އަރީފް، ނާސިހު އަދި އިސްމާއީލް މިގްލާލް ތިންވަނަ ބުރަށް

ތުލުސްދޫގައި މިހާރު ކުރިޔަށްދާ އޭޝިއަން ސާފިންގ ޗެމްޕިއަންޝިޕުގެ ތިންވަނަ ބުރަށް، ރާއްޖޭގެ ހުސައިން އަރީފް، ހަސަން ނާސިހު އަދި އިސްމާއީލް މިގްލާލް ދަތުރުކޮށްފިއެވެ.

މި މުބާރާތުގެ ފިރިހެނުންގެ ބައިން ވާދަކުރި ރާއްޖޭގެ ހުރިހާ ސާފަރުންވެސް ވަނީ ދެވަނަ ބުރަށް ދަތުރުކޮށްފައެވެ. އެގޮތުން، ޖައިލަމް ނިޒާރު، އަބްދުﷲ އަރީފް (އިބޫ)، އިސްމާއީލް މިގްލާލް، ހޫދު އަހުމަދު (ހޫބްޒް)، އަހުމަދު އާގިލް (އަންމަޑޭ) އަދި ހުސައިން އަރީފް ފުރަތަމަ ބުރުގެ ހީޓުތަކުން އެއްވަނަ ހޯދާފައިވާއިރު، އާދަމް މުއީން އިބްރާހީމާއި ނާސިހު ވަނީ ދެވަނަ ހޯދާފައެވެ.

ނާސިހު ތިންވަނަ ބުރަށް ދަތުރުކުރީ ދެވަނަ ބުރުގެ ފުރަތަމަ ހީޓުން، 8 ޕޮއިންޓާއެކު ހީޓުގެ ދެވަނަ ހޯދައިގެންނެވެ. 18.67އާއެކު މި ހީޓުގެ އެއްވަނަ ހޯދީ ޖަޕާނުގެ އިއްކޯއެވެ. އާދަމް މުއީން އިބްރާހީމާއި ޖައިލަމް ނިޒާރުވެސް ވަނީ މި ހީޓުގައި ވާދަކޮށްފައެވެ.

ދެވަނަ ބުރުގެ ތިންވަނަ ހީޓުން އިސްމާއީލް މިގްލާލް ވަނީ 8.17ގެ ސްކޯއަކާއެކު ދެވަނަ ހޯދާފައެވެ. 8.47ގެ ނަތީޖާއަކާއެކު މި ހީޓުގެ އެއްވަނަ ހޯދީ އިންޑިއާގެ ސިވަރާޖް ބާބޫއެވެ.

ރާއްޖޭގެ ކެޕްޓަން ހުސައިން އަރީފް ވަނީ ދެ ބުރުގައިވެސް އެއްވަނަ ހޯދާފައެވެ. ފުރަތަމަ ބުރުން 12.33 ހޯދިއިރު، ދެވަނަ ބުރުގެ ހަވަނަ ހީޓުގައި އޭނާ ވަނީ 9.94 ހޯދަފައެވެ.

މިއަހަރުގެ މުބާރާތުގައި 18 ގައުމަކުން ޖުމްލަ 87 ސާފަރުން ވާދަކުރެއެވެ.