މިހާތަނަށް ތަޖުރިބާކުރި އެންމެ ތަފާތު އައިސްކްރީމް ފްލޭވަރ ބުނެބަލަ!

އައިސްކްރީމެކޭ ބުނެފިނަމަ އެންމެ ގިނަ ބައެއްގެ ހިތަށް އެންމެ ފުރަތަމަވެސް އަރާނީ ޗޮކްލެޓާއި، ވެނީލާ ނުވަތަ ސްޓްރޯބެރީފަދަ އާންމު ރަހަތަކެވެ. އެކި ބާވަތް ބާވަތުގެ ބަދަނާއި މެޓާގެ ރަހަތަކުގެ ވާހަކަ ނުދައްކާނެއެކޭ ނޫނެވެ. ނަމަވެސް، ހައިންޒް ޓޮމާޓޯ އައިސްކްރީމްގައި ލާނެ ރަހައަކާމެދު ވިސްނައިލެވުނީ ކިތައް މީހުންނަށް ބާއެވެ؟ ނުވަތަ މެކްވިޓީޒް ޑައެޖިސްޓިވް ބިސްކިޓްސް އައިސްކްރީމެއް ބޯންވެއްޖެއޭ އެއްވެސް އިރަކު ހިތަށްއެރިބާއެވެ؟ ވަރަށް ނާދިރެވެ.

ލަންޑަނުގައި ހިންގާ "ދި އައިސްކްރީމް ޕްރޮޖެކްޓް"އަށް ވަދެލައިފިނަމަ، އެކަން މުޅިން ބަދަލުވެގެންދާނެކަން ގައިމެވެ. މި ފިހާރައަކީ އިނގިރޭސި ފެޝަންގެ ދުނިޔޭގައި ނަން ހިނގާ، އަންޏާ ހައިންޑްމަރކް، އަހަރުގެ ހޫނު މޫސުމުގެ ދުވަސްވަރަށް ހާއްސަކޮށްގެން، ޖޫން މަހުގެ ފަހުކޮޅު ހުޅުވި ފިހާރައެކެވެ.

އައިސްކްރީމާއި ފޮނި، ފިނި އެކި ބާވަތްތައް ލިބެން ހުރި "ދި އައިސްކްރީމް ޕްރޮޖެކްޓް"ގެ މެނޫ ހާއްސަވަނީ، ހައިންޑްމަރކް އެންމެ ގަޔާވާ ރަހަތަކަށެވެ. އޭގެ ތެރޭގައި ސްވީޓް ޗިލީ ސޯސް، ކެލޯގްސް ރައިސް ކްރިސްޕީޒް އަދި ކޮކޯ ޕޮޕްސް ސީރިއަލްގެ ރަހަތައް ހިމެނެއެވެ.

"ދި އައިސްކްރީމް ޕްރޮޖެކްޓް"ގެ އެހީތެރިއެއްގެ ގޮތުގައި މަސައްކަތްކުރާ ސޭރާ ސްޓޭންޑިންގް ސިފަކުރިގޮތުގައި، އެ ފިހާރައިން ލިބެން ހުރި ރަހަތަކަކީ، އާންމު ބަދިގެއަކުން ލިބެންހުރި ބާވަތްތަކެވެ. ނަމަވެސް ހީވެސް ނުކުރާފަދަ ގޮތަކަށް އައިސްކްރީމަކަށް ބަދަލުކޮށްލާފައެވެ.

ފިހާރައަށް އަންނަ ކަސްޓަމަރުންގެ ޝައުގުވެރިކަން ފެނި، ސޭރާވެސް ހުރީ ހައިރާން ކަމެއްގެ ތެރޭގައެވެ. އެއްކޮށްފާނެއޭ ހީވެސްނުކުރާ ރަހަތައް އެއްކޮށްގެން އައިސްކްރީމްގެ ރަހަތަކަށް ތަޖުރިބާކުރާ ކަސްޓަމަރުން، ސޭރާ އާޝޯހު ކުރުވައެވެ.

ހައިންޑްމަރކްގެ އައިސްކްރީމް ފިހާރައިގެ އުފެއްދުންތައް ތަޖުރިބާކުރި އެކަކީ، ކާބޯތަކެއްޗަށް ހާއްސަކޮށްގެން ހިންގާ އިނގިރޭސި ވެބްސައިޓެއް ކަމަށްވާ "ޑެލީޝް"ގެ ސޯޝަލް މީޑިއާ އެޑިޓަރު، ލީޑިއާ ބެއިތުއެވެ. ލީޑިއާ ފާހަގަކުރިގޮތުގައި، ފިހާރައިން ލިބެންހުރި ބައެއް ރަހަތަކަކީ، މިހެން ހަމަ ހުރެލާފައި މީހަކު އިންސާފުކޮށްލަން ހިތަށްވެސް އަރާނެ ރަހަތަކެއް ނޫނެވެ.

ގިނަ ބައެއްގެ ސަމާލުކަން ހޯދާފައި ވާ "ދި އައިސްކްރީމް ޕްރޮޖެކްޓް" އޯގަސްޓް މަހުގެ 27ގެ ނިޔަލަށް ކުރިއަށް ގެންދިއުމަށް ވަނީ ނިންމާފައެވެ.