މުލީ އެއާޕޯޓްގެ ގޮނޑުދޮށުގައި ރިވެޓްމެންޓް ޖެހުމުގެ މަސައްކަތް ނިންމާލައިފި
މުލީ އެއަރޕޯޓްގެ 60 އިންސައްތަ މަސައްކަތް މިހާރު ވަނީ ނިމިފައި
މުލީ އެއަރޕޯޓް ހެދުމުގެ މަސައްކަތް އެމްޓީސީސީން ކުރަމުންދަނީ
މ. އަތޮޅު މުލީގައި ތަރައްގީކުރަމުން އަންނަ އެއަރޕޯޓްގެ ގޮނޑުދޮށުގައި ރިވެޓްމެންޓް ޖެހުމުގެ މަސައްކަތް ނިންމާލާފައިވާކަމަށް އެމަސައްކަތްކުރަމުން އަންނަ އެމްޓީސީސީން ބުނެފިއެވެ.
މުލީގައި ތަރައްގީކުރަމުން އަންނަ އެއަރޕޯޓްގެ މަސައްކަތްތައް ގޮސްފައިވާ ހިސާބާއި ގުޅޭގޮތުން އެމްޓީސީސީން ބުނީ ފަޔަރ ރޯޑާއި ފަޔަރ ޕެޑްގެ ސަބްގްރޭޑް މަސައްކަތްތައްވެސް ނިމިފައިވާކަމަށެވެ. މުލީ އެއަރޕޯޓްގެ 60 އިންސައްތަ މަސައްކަތް މިހާރު ނިމިފައިވާކަމަށް އެމްޓީސީސީން ބުނެއެވެ.
މުލީ އެއާޕޯޓް މަޝްރޫއުގެ ދަށުން 14 ހެކްޓަރުގެ ބިން ހިއްކުމާއި 1812 މީޓަރުގެ ސަރަހައްދެއްގެ ގޮނޑުދޮށް ހިމާޔަތް ކުރާނެ އެވެ. އަދި 1200 މީޓަރު ދިގު 30 މީޓަރު ފުޅާ ރަންވޭއެއް ގާއިމުކޮށް، ޓެކްސީވޭ އަކާއި އޭޕްރަންއެއް އެޅުމުގެ މަސައްކަތް ހިމެނެއެވެ.
ޖުމްލަ 221.7 މިލިއަން ރުފިޔާގެ އެ މަޝްރޫއުގައި ސޮއިކުރީ ފެބްރުއަރީ 28، 2021 ގައެވެ. އަމަލީ މަސައްކަތް ފެށީ އޭޕްރިލް 6، 2021 ގައެވެ.
ސަރުކާރުން މަސައްކަތްކުރަމުން އަންނަނީ މިއަހަރު ތެރޭގައި މުލި އެއަރޕޯޓްގެ މަސައްކަތް ނިންމާ ޚިދުމަތް ދިނުމަށެވެ.
މީހުން ދިރިއުޅޭ ކޮންމެ ރަށަކުން 20 މިނެޓުން ދެވޭނެ އިންތިޒާމު ހަމަޖެއްސުމަކީ މި ސަރުކާރުގެ ވައުދެކެވެ. ސަރުކާރުން އަންނަނީ ހދ. މަކުނުދޫ އާއި ށ. ބިލަތްފަހި އާއި ބ. ތުޅާދޫ އާއި ތ. ވިލުފުއްޓާއި ފ. މަގޫދޫ އާއި ރ. އަތޮޅުގައި އެއަރޕޯޓް އެޅުމުގެ މަސައްކަތްކުރަމުންނެވެ.
