ކުންފުނީގެ އެކައުންޓުން އަމިއްލަ އެކައުންޓަކަށް ފައިސާ ޖަމާކުރުމުގެ އެއްވެސް މުއާމަލާތެއް އެއްވެސް އިރެއްގައި ހިނގާފައެއް ނުވާނެ: އާރުޑީސީ
6 ޖުލައި 2023 | ބުރާސްފަތި 01:02އެފަދަ އެއްވެސް މުއާމަލާތެއް ނުވަތަ އެފަދަ މުއާމަލާތަކާއި ގުޅުންހުރި ކަމެއް ކުންފުނީގެ އެކައުންޓުން އެއްވެސް އިރެއްގައި ހިނގާފައިނުވާނެކަމުގެ ޔަގީންކަންދޭ
އާރުޑީސީގެ މެނޭޖިންގ ޑިރެކްޓަރ މޫސާ އަލިމަނިކު
ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ)ން ބޭންކު އޮފް މޯލްޑިވްސް (ބީއެމްއެލް) ގައި ހުޅުވާފައިވާ ކުންފުނީގެ މައި އެކައުންޓުން 13 މިލިއަނަށްވުރެ ގިނަ ރުފިޔާ ކުންފުނީގެ މެނޭޖިންގ ޑިރެކްޓަރ މޫސާ އަލިމަނިކާއި ކުންފުނީގެ ޗީފް ފައިނޭންޝަލް އޮފިސަރ (ސީއެފްއޯ) ޔާސިރު ހަސަންގެ އަމިއްލަ ބޭނުމަކަށް ނަގާފައިވާކަމަށް މީޑިޔާގައި ދައުރުވަމުންދަނީ ހަގީގަތާއި ޚިލާފު ވާހަކަ އެއްކަމަށް އެކުންފުނިން ބުނެފިއެވެ.
އާރުޑީސީގެ އެކައުންޓުން އަމިއްލަ ބޭނުމަކަށް ފައިސާ ބޭނުންކޮށްފައިވާކަމަށް ބުނާ މައްސަލައާ ގުޅިގެން އާރުޑީސީން ނެރުނު ނޫސްބަޔާނެއްގައި ބުނެފައިވަނީ ކުންފުނީގެ އެކައުންޓުން 13 މިލިއަން ރުފިޔާ ކުންފުނީގެ ސީއެފްއޯގެ އަމިއްލަ އެކައުންޓަށް ޖަމާކޮށްފައިވާކަމަށް ބުނެ އެމައްސަލަ ފުލުހުން ބަލަމުންދާކަމަށް ބައެއް މީޑިޔާތަކުން ޚަބަރު ގެނެސްދީފައިވާކަމަށެވެ. ނަމަވެސް އެފަދަ އެއްވެސް މުއާމަލާތެއް ނުވަތަ އެފަދަ މުއާމަލާތަކާއި ގުޅުންހުރި މުއާމަލާތެއް ކުންފުނީގެ އެކައުންޓުން އެއްވެސް އިރެއްގައި ހިނގާފައިނުވާނެކަމުގެ ޔަގީންކަން ދޭކަމަށެވެ.
އާރުޑީސީ އަކީ ގަވާއިދުން ކޮންމެ އަހަރަކު އޮޑިޓްކުރެވޭ ކުންފުންޏެއްކަމަށާއި އަދި މިހާރުވެސް އޮޑިޓަރ ޖެނެރަލް އޮފީހުން ޚާއްސަ އޮޑިޓެއް ކުރަމުން ގެންދާކަމަށާއި ކުންފުނީގެ ފައިނޭންޝަލް ޕޮލިސީއާއި ޚިލާފު އެއްވެސް ފައިސާގެ މުއާމަލާތެއް ނުވަތަ އެއްވެސް މައްސަލައެއް ފާހަގަކޮށްފައި ނެތްކަމަށް ނޫސްބަޔާނުގައި ބުނެފައިވެއެވެ. އަދި މިޚަބަރު ބައެއް ނޫސްތަކުން ގެނެސްދީފައިވަނީ ކުންފުނީގެ ބަހެއް ނެތި މައުލޫމާތުގެ ޞައްހަކަން ކަށަވަރުކުރުމަކާ ނުލާކަމަށާއި އެއީ ނޫސްވެރިކަމުގެ ބެސްޓް ޕްރެކްޓިސް އާ ޚިލާފަށް ގެނެސްދީފައިވާ ޚަބަރެއްކަމަށްވެސް އާރުޑީސީން ބުނެއެވެ.
އާރުޑީސީ އާއި ގުޅުންހުރި ފައިސާގެ އެއްވެސް މައްސަލައެއް ތަހުގީގުކުރަމުންދާކަން ނުވަތަ ތަހުގީގުކުރަން ބޭނުންވާކަން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއި ފުލުހުން އާރުޑީސީއަށް އަންގާފައިނުވާކަމަށްވެސް ބުނެފައިވެއެވެ.
މީގެއިތުރުން އާރުޑީސީން ކުންފުނީގެ ޚަރަދުތަކާއި ފައިސާގެ މުއާމަލާތްތައް ކުރަމުން އަންނަނީ ރާއްޖޭގައި ހެދިފައިހުރި ގާނޫނުތަކާއި ގަވާއިދުތަކާއި ކުންފުނީގައި ހެދިފައިވާ ޕޮލިސީތަކާއި އެއްގޮތަށްކަމަށް އާރުޑީސީގެ ބަޔާނުގައި ބުނެފައިވެއެވެ. އެހެންކަމުން ފައިސާއަށް ޚިޔާނާތްތެރިވުމާއި ބޮޑެތި އަދަދުތަކުން ވައްކަންކޮށް އެއްވެސް މުވައްޒަފެއްގެ އަމިއްލަ އެކައުންޓަކަށް ނުވަތަ އެކައުންޓުތަކަކަށް ކުންފުނީގެ މައި އެކައުންޓުން ފައިސާ ފޮނުވޭނެ އެއްވެސް މަގެއް ނޯންނާނެކަމުގެ ޔަގީންކަން ދޭކަމަށްވެސް އާރުޑީސީގެ ނޫސްބަޔާނުގައި ބުނެފައިވެއެވެ.
އާރުޑީސީގެ ބޭންކް އެކައުންޓުން ކުންފުނީގެ އިސް ފަރާތްތަކަށް 13 މިލިއަން ރުފިޔާ ޖަމާކުރި ކަމުގެ މައްސަލައެއް ބަލަމުންދޭތޯ އެ އިދާރާގެ މީޑިއާ ގްރޫޕެއްގައި ނޫސްވެރިއަކު ސުވާލުކުރުމުން ފުލުހުން ބުނީ އާރުޑީސީއާ ގުޅުންހުރި މައްސަލައެއް ތަހުގީގު ކުރާ ކަމަށެވެ. ނަމަވެސް އިތުރު ތަފްސީލެއް ނުދެއެވެ.
