މިމަހުގެ 20 ވަނަ ދުވަހު ފަށާ އަންހެނުންގެ ވޯލްޑްކަޕް ފުޓްބޯޅަ މުބާރާތުގެ އިނާމް ފީފާއިން ތިންގުނަ ބޮޑުކޮށްފި އެވެ.

މި ގޮތުން ނިއުޒީލަންޑާއި އޮސްޓްރޭލިޔާގައި ބާއްވާ މުބާރާތަށް ކަނޑައަޅާފައިވަނީ 110 މިލިއަން ޑޮލަރެވެ.

މި ފައިސާގެ ތެރެއިން މުބާރާތުގެ ޗެމްޕިއަންކަން ހޯދާ ބަޔަކަށް ދޭން ހަމަޖައްސާފައިވަނީ 4.2 މިލިއަން ޑޮލަރެވެ. ރަނަރއަޕް ޓީމަށް ތިން މިލިއަން ޑޮލަރެވެ. ތިން ވަނަ ޓީމަށް 2.6 މިލިއަން ޑޮލަރު އަދި ހަތަރުވަނަ ޓީމަށް 2.1 މިލިއަން ޑޮލަރެވެ.

މުބާރާތުގެ ކުއާޓަރ ފައިނަލް ކުޅޭ ކޮންމެ ގައުމަކަށް ވެސް 2.1 މިލިއަން ޑޮލަރު ލިބޭނެ އެވެ. އަދި ދެ ވަނަ ބުރަށް ދަތުރުކުރާ ޓީމުތަކަށް 1.8 މިލިއަން ޑޮލަރު ލިބޭއިރު މުބާރާތަށް ކޮލިފައިވި 32ގައުމަށް 1.5 މިލިއަން ގްރޫޕް ސްޓޭޖުގައި ލިބޭނެ އެވެ.

ފީފާގެ ރައީސް ޖިއާނީ އިންފަންޓީނޯ ވަނީ ފުޓްބޯޅައިގައި ހަމަހަމަ ސިޔާސަތެއް ތަންފީޒުކުރުމުގެ ރޯޑްމެޕްގެ ދަށުން 2027 ވަނަ އަހަރު ބާއްވާ އަންހެނުންގެ ވޯލްޑްކަޕުގައި ފިރިހެނުންގެ މުބާރާތަށް ކަނޑައަޅާ ފައިސާގެ އަދަދާ އެއްވަރުގެ އަދަދެއް ދޭން ވައުދުވެފަ އެވެ.

ޤަތަރުގައި މިދިޔަ އަހަރު ބޭއްވި ފިރިހެނުންގެ ވޯލްޑްކަޕުގައި ވަނީ 440 މިލިއަން ޑޮލަރު އިނާމް ފައިސާގެ ގޮތުގައި ހޭދަކޮށްފަ އެވެ.