ޔޫކްރެއިންގެ 700،000ށް ވުރެ ގިނަ ކުޑަކުދިން ރަޝިއާ އަށް ގެންގޮސްފި

ޔޫކްރެއިންގައި ހަނގުރާމަ ހިނގަމުންދާ ސަރަހައްދުގައި ތިބި 700،000ށް ވުރެ ގިނަ ކުޑަ ކުދިން ރަޝިޔާއަށް ގެންގޮސްފިއެވެ. 

ރަޝިއާ އާއި ޔޫކްރެއިނާ ދެމެދު ހިނގާ ހަނގުރާމަ ހައްލުނުވެ އެ ހަނގުރާމައިގައި އަދިވެސް އެތައް ބަޔަކު ދަނީ ނުރައްކަލަށް ހުށަހެޅެމުންނެވެ. ރޮއިޓަރސް އިން ރިޕޯޓްކޮށްފައިވާ ގޮތުގައި ރަޝިއާގެ ޤާނޫނުހަދާ ގޭގެ މަތިގޭގެ އިންޓަރނޭޝަނަލް ކޮމިޓީ އިން ދަ ފެޑެރަލް ކައުންސިލްގެ ހެޑް، ގްރިގޮރީ ކަރަސިން ވަނީ އެ ގައުމުގެ ސަރަހައްދަށް 700،000ށް ވުރެ ގިނަ ކުޑަކުދިން ގެންގޮސްފައިވާ ކަން ކަށަވަރުކޮށްދީފައެވެ. އޭނާ އެކަން ހާމަކުރެއްވީ މީޑިއާތަކަށް ފޮނުއްވި ޓެލެގްރާމެއްގައެވެ.

އޭނާ ވިދާޅުވީ 700،000 ކުޑަކުދިން އެ ގައުމުގެ ހިޔާވަހިކަން ހޯދީ ރެފިއުޖީންގެ ގޮތުގައި ކަމަށެވެ. އަދި އެކަން އެގޮތަށް ކުރީ ރަޝިއާ އާއި ޔޫކްރެއިނާ ދެމެދު ހިނގަމުންދާ ހަނގުރާމައިގައި ބޮޮމުގެ ހަމަލާތަކުން ރައްކާތެރިކަން ދިނުމަށް ކަމަށެވެ.

ރަޝިިއާ އިން ޔޫކްރެއިނާ ދެކޮޅަށް ހަނގުރާމަ ފަށާފައިވަނީ މިދިޔަ އަހަރުގެ ފެބްރުއަރީ މަހުގެ ތެރޭގައެވެ.

ރަޝިއާގެ މޮސްކޯ އިން ބުނާގޮތުން އެ ގައުމުން ކުޑަކުދިން އެ ގައުމުގެ ސަރަަހައްދަށް ގެންދަމުން ދަނީ އެ ހަނގުރާމައިގެ އަސަރު ކުޑަކުދިންނަށްކޮށް، ކުޑަކުދިން ޔަތީމުވުމާއި އަޅާލާނެ މީހެއް ނެތި ބިކަވުން ހުއްޓުވުމަށް ކަމަށެވެ.

އެހެންނަމަވެސް ޔޫކްރެއިނުން ރަޝިއާގެ މި އަމަލު ސިފަކުރަމުން ދަނީ ގަވާއިދާއި ޤާނޫނާއި ޚިލާފަށް ކުޑަކުދިން ޑީޕޯޓްކުރުމުގެ އަމަލެއްގެ ގޮތުގައެވެ. މީގެއިތުރުން އެމެރިކާ އިން މިކަމާމެދު ހަދާފައިވާ ރިޕޯޓެއްގައި ބުނެފައި ވަނީ އެތައް ހާސް ކުދިން ޔޫކްރެއިނުން ރަޝިއާއަށް ގެންގޮސްފައި ވަނީ ގަދަބާރުން މަޖުބޫރުކޮށްގެން ކަމަށެވެ. ރަޝިއާއިން ކުޑަކުދިން ގެންދަނީ އެކުދިންގެ ގޭގައި ތިއްބާ ބާރުގެ ބޭނުންކޮށްގެން ކަމަށް ވެސް އެމެރިކާއިން ބުނެއެވެ.

ޖުލައި މަހުގެ 22 ވަނަ ދުވަހު އެމެރިކާ އިން ބުނީ ރަޝިއާއިން ޔޫކްރެއިނަށް 260،000ށް ވުރެ ގިނަ ކުދިން އެ ކުދިންގެ ރުހުމަކާއި ނުލާ ޑީޕޯޓްކޮށްފައިވާ ކަމަށެވެ. އަދި ޔޫކްރެއިން ސަރުކާރުން ބުނީ 19،492 ކުދިން ގަވާއިދާއި ޚިލާފަށް ޑީޕޯޓް ކުރިކަން ކަށަވަރުވާ ކަމަށެވެ.