އައްޑޫސިޓީގައި ކޮންމެ އަހަރެއްގެވެސް އަޟްޙާ އީދު ކުލަގަދަކޮށް ފާހަގަކުުރުމުގެ ގޮތުން ބާއްވާ ބައިބަލާ މުބާރާތުގެ މިއަހަރުގެ މިސްޓަރ ބައިބަލާގެ މަގާމު ސޮފްވަތު ޒާހިރު (ސޮއްޕެ) ހޯދައިފިއެވެ.
ސޮއްޕެވަނީ ކުޅުނު ތިން މެޗުގެ ތެރެއިން 2 މެޗުގެ މޭން އޮފް ދަ މެޗްކަން ހޯދާފައެވެ. އަދި ކުޅުނު ހުރިހާ މެޗެއްގައިވެސް ސޮއްޕެ ވަނީ މޮޅު ކުޅުމެއް ދައްކައި، މި މުބަރާތުގެ އެންމެ މޮޅު ކުޅުންތެރިޔަގެ މަގާމަށް ހޮވިފައެވެ. ސޮވްފަތަކީ ގިނަ އަހަރުތަކެއް ވަންދެން ބައިބަލާ މުބާރާތްތަކުގައި، އެލްޓީ ސްޕޯޓްސް ކްލަބަށް ކުޅެދިން ކުޅުންތެރިއެކެވެ. އަދި މިދިޔަ އަހަރުގެ މިސްޓަރ ބައިބަލާ މުހައްމަދު އަމީތަކީވެސް ގިނަ އަހަރުތަކެއް ވަންދެން ބައިބަލާ މުބާރާތްތަކުގައި، އެލްޓީ ސްޕޯޓްސް ކްލަބަށް ކުޅެދިން ކުޅުންތެރިއެކެވެ.
މި އަހަރުގެ މި މުބާރާތުގައި މި ދެ ކުޅުންތެރިންވެސް ވަނީ ސްކޫޕް ކަންމަތި ސްޕޯޓްސް ކުލަބުގައި ކުޅެފައެވެ. މިދިޔަ އަހަރު މި ދެ ކުޅުންތެރިން ކުޅެފައިވަނީ އައްޑޫ ސިިޓީ ކަައުންސިލް ޓީމަށެވެ. 1443 ވަނަ އަހަރުގެ ބައިބަލާ ޗެމްޕިއަނަކީ ސިޓީ ކައުންސިލް ޓީމްއެވެ.
އީދި ސަމާ 1444ގެ ނަމުގައި ކުރިއަށްގެންދިޔަ އީދުގެ ކުޅިވަރުގެ ހަރަކާތްތަކުގެ ތެރެއިން ބައިބަލާ މުބާރާތުގެ ޗެމްޕިއަންކަން ސްކޫޕް ކަންމަތި ސްޕޯޓްސް ކްލަބުން ވަނީ ހޯދާފައެވެ. ފައިނަލް މެޗުގައި ހިތަދޫ ޕޯޓްސް ލިމިޓެޑާ ވާދަކޮށް، ސްކޫޕަށް ޗެމްޕިއަންކަން ލިބިފައިވަނީ، އެޗްޕީއެލްއިން ކުރި ފައުލްއަކާއި ގުޅިގެން އަލުން މެޗް ކުޅުމަށް ރެފްރީން ނިންމުމާއެކު، އެޗްޕީއެލްއިން މެޗް ދޫކޮށްލުމުންނެވެ.
ފާއިތުވި އަހަރުތަކަށްވުރެ މިއަހަރުގެ މުބާރާތުގެ ފޯރި ދަށްކަން ފާހަގަކުރެވުނު ނަމަވެސް، މުބާރާތް އިންތިޒާމްކުރި އައްޑޫ ސިޓީ ކައުންސިލުން ހާމަކޮށްފައިވަނީ މިއަންނަ އަހަރުގެ މުބާރާތުގެ ފޯރިގަދަ ކުރުމަށް މަސައްކަތް ކުރާނެ ކަމަށެވެ.
